ఇకపోతే, Two-Step Verification కూడా ఈ మోడ్‌లో ఆటోమేటిక్‌గా ఎనేబుల్ అవుతుంది.

WhatsApp త్వరలో వినియోగదారులను సైబర్ దాడుల నుంచి రక్షించడానికి కొత్త సెక్యూరిటీ ఫీచర్‌ను అందించేందుకు సిద్ధమవుతోంది. యాప్‌లోని కొన్ని ఫీచర్లను పూర్తిగా లాక్ చేసి, హ్యాకింగ్ ప్రయత్నాల నుంచి అకౌంట్‌ను కాపాడే విధంగా రూపొందించిన ఈ కొత్త సెట్టింగ్ ప్రస్తుతం అభివృద్ధి దశలో ఉందని నివేదికలు చెబుతున్నాయి. ప్రత్యేకంగా లక్ష్యంగా చేసుకునే సైబర్ దాడులు ఎదుర్కొనే యూజర్ల కోసం రూపొందిస్తున్న ఈ ఫీచర్, WhatsApp Android బీటా వెర్షన్‌లో కనిపించిందని ఫీచర్ ట్రాకర్ తెలిపింది. అదేవిధంగా, తెలియని నంబర్ల నుంచి వచ్చే మెసేజ్‌లను పరిమితం చేసే మరో ఫీచర్‌పైనా WhatsApp పని చేస్తోంది. దీని ద్వారా స్పామ్ మెసేజ్‌లు, అవాంచిత సందేశాలు తగ్గించడమే కాకుండా, అధిక సంఖ్యలో అనపరచిన కాంటాక్ట్‌ల నుంచి వచ్చే కమ్యూనికేషన్లను యాప్ స్వయంగా గుర్తించి బ్లాక్ చేయగలదు.

Strict Account Settings.. ఎలా పని చేస్తుంది:

WABetaInfo వెల్లడించిన వివరాల ప్రకారం, WhatsApp Android కోసం 2.25.33.4 బీటా వెర్షన్‌లో "Strict account settings" పేరుతో కొత్త మోడ్ కనిపించింది. ఇది ప్రస్తుతం యాప్‌లో యూజర్లు టెస్ట్ చేయగలిగే స్థితిలో లేదు, ఎందుకంటే ఇంకా డెవలప్మెంట్ స్టేజీలోనే ఉంది. ఈ మోడ్ ఆన్ చేసిన వెంటనే, యూజర్లు ఒక్క టాగుల్‌తోనే మరింత కఠినమైన సెక్యూరిటీ సెట్టింగ్‌లను యాక్టివేట్ చేసుకోవచ్చు. అంటే, ప్రతి ప్రైవసీ ఆప్షన్‌ని వేర్వేరు‌గా మార్చాల్సిన పని ఉండదు. WhatsApp ఈ ఫీచర్‌ను రాబోయే అప్‌డేట్‌లో అందించనున్నట్లు అంచనా.

ఈ ప్రత్యేక మోడ్ ఆన్ చేసినప్పుడు, IP address ప్రొటెక్షన్, అన్‌నోన్ సెన్డర్ల నుంచి ఫైళ్ల బ్లాక్, ఆటో డౌన్‌లోడ్ ఆపడం వంటి కీలక రక్షణ వ్యవస్థలు ఆటోమేటిక్‌గా యాక్టివ్ అవుతాయి. WhatsApp కాల్స్ సమయంలో IP అడ్రస్‌ బయటపడకుండా, కమ్యూనికేషన్‌ను కంపెనీ సర్వర్ల ద్వారా రూట్ చేయడం కూడా ఇందులో భాగమే. తెలియని అకౌంట్‌ల నుంచి వచ్చే ఫోటోలు, వీడియోలు, డాక్యుమెంట్లు వంటి మీడియా ఫైళ్లను యాప్ ఆటోమేటిక్‌గా డౌన్‌లోడ్ కాకుండా నిరోధిస్తుంది. అటువంటి వారితో చాట్ చేస్తే, కేవలం టెక్స్ట్ మెసేజ్‌లకే అనుమతి ఉంటుందని తెలుస్తోంది.

అదనంగా, లింక్ ప్రీవ్యూ ఆప్షన్‌ను కూడా ఆటోమేటిక్‌గా డిసేబుల్ చేస్తుంది. సాధారణంగా WhatsApp చాట్‌లో లింక్ షేర్ చేస్తే, యాప్ ఆ లింక్‌కు కనెక్ట్ అయి ప్రీవ్యూ చూపిస్తుంది. కానీ ఇది యూజర్ IP అడ్రస్ బయటపడే ప్రమాదాన్ని కలిగిస్తుంది. Strict Mode ఆన్ చేసినప్పుడు, లింక్ ప్రీవ్యూలు కనిపించవు, తద్వారా ట్రాకింగ్ ప్రమాదం తగ్గుతుంది.

ఈ మోడ్ ద్వారా సేవ్ చేయని నంబర్ల నుంచి వచ్చే కాల్స్ సైలెంట్ చేయబడతాయి. అదేవిధంగా, గ్రూపుల్లో యూజర్లను చేర్చే అధికారం కాంటాక్ట్‌లకే పరిమితం అవుతుంది. ప్రొఫైల్ ఫోటో, స్టేటస్, లాస్ట్ సీన్ వంటి వివరాలు కూడా కాంటాక్ట్‌లకే కనిపించేలా మారతాయి. ఎన్‌క్రిప్షన్ కోడ్ మార్పులు జరిగితే, యూజర్‌కు నోటిఫికేషన్ వస్తుంది, తద్వారా చాట్ సెక్యూరిటీని ధృవీకరించుకునే అవకాశం ఉంటుంది.

ఇకపోతే, Two-Step Verification కూడా ఈ మోడ్‌లో ఆటోమేటిక్‌గా ఎనేబుల్ అవుతుంది. దీని ద్వారా అకౌంట్ హ్యాకింగ్, OTP దొంగిలింపు, SIM స్వాప్ అటాక్స్ వంటి వాటి నుంచి రక్షణ మరింత బలపడుతుంది. మొత్తంగా చూస్తే, ఈ మోడ్ సాధారణ యూజర్‌ల కోసం కాదు, అధిక స్థాయి సైబర్ బెదిరింపులు ఎదుర్కొనే వారికి ప్రత్యేక రక్షణగా వస్తోంది. అయితే మిగతా యూజర్‌లకు ఇప్పటి వరకు ఉన్న ఎండ్-టు-ఎండ్ ఎన్క్రిప్షన్ మరియు ప్రస్తుత సెక్యూరిటీ ప్రధానంగా అలాగే కొనసాగుతాయి.