యాపిల్ కొత్త స్కెచ్.. మ్యాప్స్ ద్వారా రూ. 70,000 కోట్ల ఆదాయమే లక్ష్యం!

యాపిల్ ప్రియులకు ఒక షాకింగ్ అప్‌డేట్. ఐఫోన్ వాడకందారులకు అత్యంత ఇష్టమైన,  క్లీన్ ఇంటర్‌ఫేస్ కలిగిన 'యాపిల్ మ్యాప్స్'లో ఇకపై ప్రకటనలు దర్శనమివ్వనున్నాయి. టెక్ దిగ్గజం యాపిల్ తన సేవల విభాగం నుండి ఆదాయాన్ని మరింత పెంచుకోవాలనే ప్లాన్‌లో భాగంగా ఈ నిర్ణయం తీసుకున్నట్లు ప్రముఖ జర్నలిస్ట్ మార్క్ గుర్మన్ వెల్లడించారు. ఇప్పటివరకు యాడ్-ఫ్రీ అనుభవాన్ని ఆస్వాదించిన యూజర్లకు ఇది కొంత అసహనానికి గురిచేసే విషయమే అయినా, వ్యాపార కోణంలో యాపిల్ తన అడుగులను వేగంగా వేస్తోంది. గూగుల్ మ్యాప్స్ తరహాలోనే యాపిల్ మ్యాప్స్‌లో కూడా బిజినెస్ ప్రమోషన్లు కనిపించనున్నాయి. త్వరలోనే దీనిపై అధికారిక ప్రకటన వెలువడే అవకాశం ఉంది.

ఈ కొత్త అడ్వర్టైజింగ్ సిస్టమ్ ఎలా పనిచేస్తుందనే దానిపై ప్రస్తుతం ఆసక్తికర చర్చ నడుస్తోంది. దీని ప్రకారం, స్థానిక వ్యాపార సంస్థలు యాపిల్ మ్యాప్స్ సెర్చ్ రిజల్ట్స్‌లో టాప్‌లో కనిపించడానికి వేలం వేయాల్సి ఉంటుంది. ఉదాహరణకు మీరు మ్యాప్స్‌లో 'సుషీ' లేదా 'కాఫీ' అని సెర్చ్ చేసినప్పుడు, ఏ హోటల్ యజమాని అయితే ఎక్కువ బిడ్ వేస్తారో వారి షాప్ వివరాలు సెర్చ్ లిస్టింగ్‌లో అందరికంటే పైన కనిపిస్తాయి. ఇది గూగుల్ మ్యాప్స్, యెల్ప్ వంటి ప్లాట్‌ఫామ్స్ అనుసరించే మోడల్‌నే పోలి ఉంటుంది. దీనివల్ల చిన్న, పెద్ద వ్యాపారాలకు తమ కస్టమర్లను సులభంగా చేరుకునే అవకాశం లభిస్తుంది.

ఈ ప్రకటనల ప్రస్థానం కేవలం ఐఫోన్లకు మాత్రమే పరిమితం కాకుండా యాపిల్‌కి చెందిన ఇతర డివైజ్‌లు, వెబ్ వెర్షన్లలో కూడా ఈ వేసవి నుండే అందుబాటులోకి వచ్చే అవకాశం ఉంది. నిజానికి 2025 అక్టోబర్‌లోనే యాపిల్ మ్యాప్స్‌లో యాడ్స్ వచ్చే అవకాశం ఉందని వార్తలు వచ్చాయి. ఆర్టిఫిషియల్ ఇంటెలిజెన్స్ టూల్స్ సహాయంతో యూజర్లకు ఏది అవసరమో, ఏది రెలవెంట్‌గా ఉంటుందో గుర్తించి మరీ టార్గెటెడ్ యాడ్స్ చూపించాలని యాపిల్ భావిస్తోంది. దీనివల్ల ప్రకటనలు ఇబ్బందికరంగా కాకుండా యూజర్లకు ఉపయోగపడేలా ఉంటాయని కంపెనీ వర్గాల అంచనా.

గత ఏడాది ఏప్రిల్‌లో యాపిల్ తన అడ్వర్టైజింగ్ విభాగాన్ని 'సెర్చ్ యాడ్స్' నుండి 'యాపిల్ యాడ్స్'గా పేరు మార్చి తన లక్ష్యాన్ని స్పష్టం చేసింది. ఎడ్డీ క్యూ నేతృత్వంలోని ఈ విభాగం, 2026 నాటికి దాదాపు 8.5 బిలియన్ డాలర్ల (సుమారు రూ. 70,000 కోట్లు) ఆదాయాన్ని ఆర్జించాలని లక్ష్యంగా పెట్టుకుంది. యాపిల్ తన సర్వీసెస్ పోర్ట్‌ఫోలియోను బలోపేతం చేసుకోవడానికి ప్రకటనల రంగాన్ని ప్రధాన వనరుగా ఎంచుకుంది. ఇప్పటికే యాప్ స్టోర్‌లో కొత్త యాడ్ స్లాట్లను ప్రవేశపెట్టిన సంస్థ, ఇప్పుడు తన పరిధిని మ్యాప్స్ వరకు విస్తరించడం టెక్ ప్రపంచంలో హాట్ టాపిక్‌గా మారింది.

కేవలం మ్యాప్స్ మాత్రమే కాకుండా, యాపిల్ తన ఇతర అప్లికేషన్లైన న్యూస్ యాప్, పాడ్‌కాస్ట్ ప్లాట్‌ఫామ్స్‌లో కూడా మానిటైజేషన్ అవకాశాలను వెతుకుతోంది. అలాగే యాపిల్ టీవీలో ప్రసారమయ్యే మేజర్ లీగ్ సాకర్ వంటి స్పోర్ట్స్ కంటెంట్‌లో కూడా ప్రకటనలను చొప్పించే ఆలోచనలో ఉంది. పోటీ కంపెనీలైన గూగుల్, మెటాతో పోలిస్తే యాపిల్ ప్రకటనల వ్యాపారం ప్రస్తుతం చిన్నదే అయినప్పటికీ, భవిష్యత్తులో ఇది కంపెనీకి అతిపెద్ద ఆదాయ వనరుగా మారనుంది. యూజర్ ప్రైవసీకి పెద్దపీట వేస్తామని చెప్పే యాపిల్, ప్రకటనల విషయంలో ఎలాంటి నిబంధనలు పాటిస్తుందో చూడాలి.

మొత్తానికి టెక్‌లోకంలో యాపిల్ మార్పుల పవనాలు వీస్తున్నాయి. క్లీన్ అండ్ సింపుల్ సాఫ్ట్‌వేర్ అనుభవం కోరుకునే ఐఫోన్ యూజర్లు ఈ మార్పును ఎలా రిసీవ్ చేసుకుంటారో వేచి చూడాలి. అయితే వ్యాపారవేత్తలకు మాత్రం ఇది ఒక గోల్డెన్ ఛాన్స్ అని చెప్పవచ్చు, ఎందుకంటే యాపిల్ యూజర్ బేస్ చాలా ప్రీమియంగా ఉంటుంది. టెక్నాలజీ పెరుగుతున్న కొద్దీ ఇలాంటి మార్పులు సహజమే అని కొందరు అంటుంటే, యూజర్ ఎక్స్‌పీరియన్స్ దెబ్బతింటుందని మరికొందరు ఆందోళన చెందుతున్నారు. యాపిల్ తన బ్రాండ్ వాల్యూను కాపాడుకుంటూనే ఈ ప్రకటనల ఆదాయాన్ని ఎలా సమన్వయం చేసుకుంటుందో వేచి చూడాల్సిందే.