అదే సమయంలో iPhone 17e కూడా ఈ వేదికపై ఆవిష్కృతం కావచ్చని భావిస్తున్నారు.

మార్చి ప్రారంభంలో “స్పెషల్ ఆపిల్ ఎక్స్‌పీరియెన్స్” పేరుతో ఒక ప్రత్యేక ఈవెంట్‌ను నిర్వహించేందుకు ఆపిల్ సన్నాహాలు చేస్తున్నట్లు టెక్ వర్గాల్లో గట్టిగా చర్చ జరుగుతోంది. ముఖ్యంగా కొత్త నాన్-ప్రో ఐఫోన్ మోడల్ ఆవిష్కరణపై ఆసక్తి నెలకొంది. కుపర్టినోకు కేంద్రంగా పనిచేస్తున్న ఈ టెక్ దిగ్గజం ఒకేసారి మూడు నగరాల్లో కార్యక్రమాలు నిర్వహించే అవకాశముందని నివేదికలు చెబుతున్నప్పటికీ, కంపెనీ నుంచి అధికారిక ప్రకటన మాత్రం ఇంకా వెలువడలేదు. ఈ ఈవెంట్‌లో iPhone 17e, M5 చిప్‌తో కొత్త MacBook Air, అలాగే M5 Pro, M5 Max ప్రాసెసర్లతో MacBook Pro మోడళ్లను ప్రకటించే అవకాశముందని అంచనా వేస్తున్నారు. అంతేకాదు, ఆపిల్ చరిత్రలోనే తొలిసారిగా తక్కువ ధరలో ఒక MacBookను పరిచయం చేసే అవకాశం ఉందన్న వార్తలు కూడా వినిపిస్తున్నాయి.

9toMacకు అందిన ఆహ్వాన పత్రం ప్రకారం, మార్చి 4న ఉదయం 9 గంటలకు (భారత కాలమానం ప్రకారం సాయంత్రం 7:30 గంటలకు) న్యూయార్క్‌లో ఈ కార్యక్రమం జరగనుంది. సోషల్ మీడియాలో వచ్చిన మరో సమాచారం ప్రకారం, అదే రోజున షాంఘై, లండన్ నగరాల్లోనూ వేర్వేరు ఈవెంట్లు నిర్వహించే అవకాశముంది. అయితే ఆహ్వానంలో “స్పెషల్ ఆపిల్ ఎక్స్‌పీరియెన్స్” అనే పదజాలం తప్ప ఇతర వివరాలు వెల్లడించలేదు.

బ్లూమ్‌బర్గ్ జర్నలిస్ట్ మార్క్ గుర్మన్ పేర్కొన్న వివరాల ప్రకారం, ఆహ్వాన పత్రంలో కనిపించిన 3డీ ఆపిల్ లోగో పసుపు, ఆకుపచ్చ, నీలం రంగుల డిస్క్‌లతో రూపొందించబడింది. ఇవే రంగులు తక్కువ ధరలో రాబోయే కొత్త MacBook మోడల్‌కు ఉండొచ్చని లీకులు సూచిస్తున్నాయి. ధర పరంగా ఇది 1,000 డాలర్లలోపే ఉండవచ్చని, అంటే సుమారు రూ. 90,000 పరిధిలో మార్కెట్లోకి రావచ్చని సమాచారం.

ఖర్చును నియంత్రించేందుకు iPhone 16 Pro మోడళ్లలో ఉపయోగించిన A18 Pro చిప్‌ను ఇందులో అమర్చే అవకాశముంది. అలాగే డిస్‌ప్లే పరిమాణం 13 అంగుళాల కంటే కొద్దిగా తక్కువగా ఉండొచ్చని చెబుతున్నారు.

ఈవెంట్‌లో మరో ప్రధాన ఆకర్షణగా iPhone 17e ఉండే అవకాశం ఉంది. ఫిబ్రవరిలోనే విడుదల అవుతుందని ముందుగా ప్రచారం జరిగినప్పటికీ, ఇప్పుడు మార్చి ఈవెంట్ వేదికగానే ఇది పరిచయం కావచ్చని భావిస్తున్నారు. డిజైన్ పరంగా పెద్ద మార్పులు లేకపోయినా, వేగవంతమైన నెట్‌వర్క్ కనెక్టివిటీ కోసం కొత్త C1X మోడెమ్‌ను అందించే అవకాశం ఉందని సమాచారం. అలాగే MagSafe చార్జింగ్ సపోర్ట్ జోడించడం ద్వారా వేగంగా వైర్‌లెస్ చార్జింగ్ సౌకర్యాన్ని కల్పించే అవకాశముంది. మొత్తం మీద మార్చి 4న జరిగే ఈ కార్యక్రమం ఆపిల్ అభిమానుల్లో కొత్త ఉత్కంఠను రేకెత్తిస్తోంది.