ఇంత భారీ బ్యాటరీ ఉన్నప్పటికీ ఫోన్ బరువు కేవలం 216 గ్రాములే ఉండటం విశేషం.

HONOR చెప్పిన మాట ప్రకారం చైనాలో HONOR Power2 స్మార్ట్‌ఫోన్‌ను అధికారికంగా విడుదల చేసింది. భారీ బ్యాటరీ, శక్తివంతమైన ప్రాసెసర్, అత్యాధునిక డిస్‌ప్లే టెక్నాలజీతో ఈ ఫోన్ మార్కెట్‌లో ప్రత్యేక ఆకర్షణగా నిలుస్తోంది. ముఖ్యంగా పవర్ యూజర్లను దృష్టిలో పెట్టుకుని రూపొందించిన ఈ డివైస్, బ్యాటరీ లైఫ్ విషయంలో కొత్త ప్రమాణాలను నెలకొల్పుతోంది. HONOR Power2లో 6.79 ఇంచుల 1.5K AMOLED డిస్‌ప్లేను అందించారు. 2640×1200 పిక్సెల్ రిజల్యూషన్‌తో పాటు 120Hz రిఫ్రెష్ రేట్ ఉండటం వల్ల స్క్రోలింగ్, గేమింగ్ అనుభవం చాలా స్మూత్‌గా ఉంటుంది. HDR కంటెంట్ కోసం గరిష్టంగా 8000 నిట్స్ పీక్ బ్రైట్‌నెస్‌ను, సాధారణ వినియోగానికి 1800 నిట్స్ గ్లోబల్ బ్రైట్‌నెస్‌ను ఇది సపోర్ట్ చేస్తుంది. అలాగే 3840Hz హై ఫ్రీక్వెన్సీ PWM డిమ్మింగ్ ఉండటం వల్ల కళ్లపై ఒత్తిడి తక్కువగా ఉంటుంది.

ఈ ఫోన్‌లో తొలిసారిగా కొత్త MediaTek Dimensity 8500 Elite చిప్‌సెట్‌ను ఉపయోగించారు. 4nm టెక్నాలజీపై తయారైన ఈ ప్రాసెసర్ 3.4GHz వరకు క్లాక్ స్పీడ్‌ను అందిస్తుంది. AnTuTu బెంచ్‌మార్క్‌లో దాదాపు 2.4 మిలియన్ స్కోర్ సాధించడం ద్వారా దీని పనితీరు ఎంత శక్తివంతమో స్పష్టమవుతోంది. 12GB LPDDR5X ర్యామ్‌తో పాటు 256GB లేదా 512GB UFS 4.1 స్టోరేజ్ ఆప్షన్లు ఉన్నాయి. Android 16 ఆధారిత MagicOS 10.0పై ఈ ఫోన్ రన్ అవుతుంది.

HONOR Power2లో అసలు హైలైట్ దాని బ్యాటరీ. 10080mAh నాలుగో తరం సిలికాన్-కార్బన్ బ్యాటరీని ఇందులో అమర్చారు. ఆరు సంవత్సరాల దీర్ఘకాలిక మన్నికను కలిగిన ఈ బ్యాటరీ, HONOR WIN సిరీస్ తర్వాత 10,000mAh సెగ్మెంట్‌లోకి వచ్చిన రెండో ఫోన్‌గా నిలిచింది. ఇంత భారీ బ్యాటరీ ఉన్నప్పటికీ ఫోన్ బరువు కేవలం 216 గ్రాములే ఉండటం విశేషం. మందం కూడా 8mm కంటే తక్కువగా ఉంది. 80W ఫాస్ట్ ఛార్జింగ్‌తో పాటు 27W రివర్స్ వైర్డ్ ఛార్జింగ్ సపోర్ట్ కూడా ఉంది.

కెమెరా విషయానికి వస్తే, వెనుక భాగంలో 50MP ప్రధాన కెమెరాను OIS సపోర్ట్‌తో అందించారు. దీనికి తోడు 5MP అల్ట్రా వైడ్ కెమెరా ఉంది. 4K వీడియో రికార్డింగ్ చేయవచ్చు. ముందు భాగంలో 16MP సెల్ఫీ కెమెరా ఉంది. ఇన్-డిస్‌ప్లే ఫింగర్‌ప్రింట్ సెన్సార్, ఇన్‌ఫ్రారెడ్ సెన్సార్ వంటి అదనపు ఫీచర్లు కూడా ఉన్నాయి.
డ్యూరబిలిటీ పరంగా HONOR Power2 చాలా ముందుంది. గోల్డ్ లేబుల్ త్రీ-ప్రూఫ్ సర్టిఫికేషన్, SGS ఫైవ్ స్టార్ రిలయబిలిటీ సర్టిఫికేషన్‌తో పాటు IP69K, IP69, IP68, IP66 డస్ట్ & వాటర్ రెసిస్టెన్స్‌ను ఇది కలిగి ఉంది. అధిక ప్రెషర్ వాటర్ గన్ స్ప్రేలు, 85 డిగ్రీల వరకు వేడి నీటిలో ముంచినా ఫోన్‌కు హాని కలగదని కంపెనీ చెబుతోంది.

నెట్‌వర్క్ పనితీరును మెరుగుపరచేందుకు HONOR ప్రత్యేకంగా అభివృద్ధి చేసిన C1+ RF చిప్, పవర్ సిగ్నల్ ఐలాండ్ డిజైన్, ప్యారలల్ డ్యూయల్-రైల్ యాంటెనా టెక్నాలజీని ఉపయోగించింది. వీటి వల్ల వీక్ నెట్‌వర్క్ సిగ్నల్స్‌లో కూడా 200% వరకు మెరుగైన పనితీరు లభిస్తుందని HONOR వెల్లడించింది.
ధరల విషయానికి వస్తే, 12GB + 256GB వేరియంట్‌కు 2699 యువాన్, 12GB + 512GB వేరియంట్‌కు 2999 యువాన్ ధరను నిర్ణయించారు. సన్రైజ్ ఆరెంజ్, స్నో వైట్, ఫాంటమ్ బ్లాక్ రంగుల్లో ఈ ఫోన్ అందుబాటులో ఉంటుంది. జనవరి 9 నుంచి చైనాలో అమ్మకాలు ప్రారంభం కానున్నాయి.