స్మార్ట్‌ఫోన్ వార్.. OnePlus Nord 6 వర్సెస్ Redmi Note 15 Pro+.. ఫీచర్లు, ధరల విషయంలో ఏది టాప్?

నేటి స్మార్ట్‌ఫోన్ మార్కెట్‌లో మిడ్-ప్రీమియం విభాగం గతంలో కంటే చాలా ఆసక్తికరంగా మారింది. ముఖ్యంగా రూ. 40,000 ధరలో ఫ్లాగ్‌షిప్ స్థాయి ఫీచర్లను అందించేందుకు బ్రాండ్‌లు పోటీపడుతున్నాయి. ఈ నేపథ్యంలో వన్‌ప్లస్ నార్డ్ 6, రెడ్మీ నోట్ 15 ప్రో+ 5G, నథింగ్ ఫోన్ 4a ప్రో వంటి ఫోన్‌లు యూజర్ల ముందుకు వచ్చాయి. గత ఏడాది వచ్చిన నార్డ్ 5కి కొనసాగింపుగా వచ్చిన వన్‌ప్లస్ నార్డ్ 6 తన పవర్‌ఫుల్ పర్ఫార్మెన్స్‌తో యువతను ఆకట్టుకుంటోంది. అదే సమయంలో రెడ్మీ తన కెమెరా నాణ్యతతో, నథింగ్ బ్రాండ్ తన విభిన్నమైన డిజైన్, కెమెరా జూమ్ సామర్థ్యాలతో మార్కెట్‌లో తమదైన ముద్ర వేయడానికి సిద్ధమయ్యాయి. ఈ మూడు ఫోన్‌లు వేర్వేరు బలాబలాలను కలిగి ఉన్నందున, సరైన ఫోన్‌ను ఎంచుకోవడం వినియోగదారులకు ఇప్పుడు ఒక సవాలుగా మారింది.

ధర,లభ్యత విషయానికి వస్తే, వన్‌ప్లస్ నార్డ్ 6 బేస్ వేరియంట్ రూ. 38,999 వద్ద అందుబాటులో ఉండగా, అమెజాన్ ద్వారా ఏప్రిల్ 9 నుండి అమ్మకాలు ప్రారంభం కానున్నాయి. ఇది ఫ్రెష్ మింట్, క్విక్ సిల్వర్ వంటి ఆకర్షణీయమైన రంగుల్లో లభిస్తుంది. మరోవైపు రెడ్మీ నోట్ 15 ప్రో+ 5G ధర రూ. 37,999 నుండి ప్రారంభమవుతూ ఫ్లిప్‌కార్ట్ ద్వారా వినియోగదారులకు చేరువలో ఉంది. ఇది కాఫీ మోచా, మిరాజ్ బ్లూ వంటి విభిన్న రంగులతో క్లాసీ లుక్‌ను ఇస్తుంది. ఇక నథింగ్ ఫోన్ 4a ప్రో ప్రారంభ ధర రూ. 39,999గా నిర్ణయించబడింది. నథింగ్ ఫోన్ స్టైలిష్‌గా ఉండే పింక్, సిల్వర్ రంగుల్లో లభిస్తూ, కేవలం ఫ్లిప్‌కార్ట్ ద్వారా మాత్రమే కొనుగోలు చేయడానికి వీలుంటుంది. మూడు ఫోన్‌లు కూడా ధర పరంగా ఒకదానికొకటి గట్టి పోటీని ఇస్తున్నాయి.

డిస్‌ప్లే, డిజైన్ పరంగా చూస్తే వన్‌ప్లస్ నార్డ్ 6 అత్యున్నతమైన 165Hz రిఫ్రెష్ రేట్‌తో గేమింగ్ ప్రియులకు అద్భుతమైన అనుభవాన్ని ఇస్తుంది. దీని 6.78 అంగుళాల అమోలెడ్ స్క్రీన్ 3,600 నిట్స్ బ్రైట్‌నెస్‌తో వెలుతురులో కూడా స్పష్టంగా కనిపిస్తుంది. రెడ్మీ నోట్ 15 ప్రో+ 5G కొంచెం పెద్దదైన 6.83 అంగుళాల స్క్రీన్‌ను కలిగి ఉండి, గొరిల్లా గ్లాస్ విక్టస్ 2 రక్షణతో వస్తుంది. ఇది మన్నికకు ప్రాధాన్యత ఇచ్చే వారికి మేలు చేస్తుంది. నథింగ్ ఫోన్ 4a ప్రో కూడా 6.83 అంగుళాల అమోలెడ్ డిస్‌ప్లేతో వస్తున్నప్పటికీ, ఇది ఏకంగా 5,000 నిట్స్ గరిష్ట బ్రైట్‌నెస్‌ను కలిగి ఉండి మార్కెట్‌లో రికార్డు సృష్టిస్తోంది. ఈ మూడు ఫోన్‌లు కూడా 1.5K రిజల్యూషన్‌తో హై-డెఫినిషన్ విజువల్స్‌ను అందిస్తాయి కాబట్టి కంటెంట్ చూడటం చాలా సరదాగా ఉంటుంది.

పర్ఫార్మెన్స్ విషయంలో వన్‌ప్లస్ నార్డ్ 6 అందరికంటే ముందంజలో ఉంది. ఇందులో ఉపయోగించిన స్నాప్‌డ్రాగన్ 8s Gen 4 చిప్‌సెట్ దాదాపు 25 లక్షలకు పైగా అంటుటూ స్కోరును సాధించి, అత్యంత వేగవంతమైన ఫోన్‌గా నిలిచింది. ఇది ఆండ్రాయిడ్ 16 ఆధారిత ఆక్సిజన్ ఓఎస్ 16తో పని చేస్తుంది. రెడ్మీ నోట్ 15 ప్రో+ 5Gలో డైమెన్సిటీ 7400-అల్ట్రా చిప్‌సెట్ ఉంది, ఇది రోజువారీ పనులను, మల్టీ టాస్కింగ్‌ను సులువుగా నిర్వహిస్తుంది. నథింగ్ ఫోన్ 4a ప్రో స్నాప్‌డ్రాగన్ 7 Gen 4 ప్రాసెసర్‌తో వస్తూ క్లీన్ సాఫ్ట్‌వేర్ అనుభవాన్ని ఇచ్చే నథింగ్ ఓఎస్ 4.1పై నడుస్తుంది. వేగం, గేమింగ్ ముఖ్యం అనుకునే వారికి వన్‌ప్లస్ సరైన ఎంపిక కాగా, సాఫ్ట్‌వేర్ ఇంటర్‌ఫేస్, సాధారణ వినియోగానికి మిగిలిన రెండు ఫోన్‌లు బాగుంటాయి.

కెమెరా విభాగంలో మూడు ఫోన్‌లు విభిన్న వ్యూహాలను అనుసరించాయి. రెడ్మీ నోట్ 15 ప్రో+ 5G ఏకంగా 200 మెగాపిక్సెల్ ప్రధాన కెమెరాతో ఫోటోగ్రఫీ ప్రేమికులను ఆకర్షిస్తోంది. అత్యంత స్పష్టమైన చిత్రాలను తీయడానికి ఇది ఎంతో ఉపయోగపడుతుంది. నథింగ్ ఫోన్ 4a ప్రోలో ఉన్న 50 మెగాపిక్సెల్ టెలిఫోటో కెమెరా 140x జూమ్ సామర్థ్యాన్ని కలిగి ఉండటం విశేషం, ఇది సుదూర వస్తువులను కూడా స్పష్టంగా చూపిస్తుంది. వన్‌ప్లస్ నార్డ్ 6లో సోనీ లిటియా-600 సెన్సార్‌తో కూడిన 50 మెగాపిక్సెల్ మెయిన్ కెమెరా ఉంది, ఇది సహజమైన రంగులను, స్థిరమైన వీడియోలను అందిస్తుంది. సెల్ఫీల కోసం మూడింటిలోనూ 32 మెగాపిక్సెల్ కెమెరాలు ఉండటం వల్ల సోషల్ మీడియాలో పోస్ట్ చేయడానికి కావాల్సిన నాణ్యమైన ఫోటోలు లభిస్తాయి.

 చివరిగా బ్యాటరీ, ఛార్జింగ్ గురించి మాట్లాడుకుంటే, వన్‌ప్లస్ నార్డ్ 6 ఏకంగా 9,000mAh భారీ బ్యాటరీతో ఈ సెగ్మెంట్‌లో రికార్డు సృష్టించింది. దీనికి తోడు 80W ఫాస్ట్ ఛార్జింగ్ సదుపాయం ఉండటం వల్ల బ్యాటరీ సమస్య అనేది ఉండదు. రెడ్మీ 6,500mAh బ్యాటరీతో పాటు 100W అత్యంత వేగవంతమైన ఛార్జింగ్‌ను అందిస్తోంది, ఇది తక్కువ సమయంలో ఫోన్ నిండటానికి సహాయపడుతుంది. నథింగ్ ఫోన్ 4a ప్రోలో 5,400mAh బ్యాటరీ, 50W ఛార్జింగ్ ఉన్నాయి, ఇది సాధారణ వినియోగానికి సరిపోతుంది. మొత్తం మీద, మీకు భారీ బ్యాటరీ , వేగం కావాలంటే వన్‌ప్లస్, మంచి కెమెరా, వేగవంతమైన ఛార్జింగ్ కావాలంటే రెడ్మీ, ఇక విభిన్నమైన జూమ్ కెమెరా, కొత్తదనం కావాలంటే నథింగ్ ఫోన్‌ను ఎంచుకోవచ్చు.