ఈవెంట్‌లో విడుదలైన ఉత్పత్తుల ప్రీ-ఆర్డర్లు నవంబర్ 7 నుండి ప్రారంభమయ్యే అవకాశం ఉంది

ఇటీవల విడుదలైన iPhone 17 తర్వాత, ఇప్పుడు టెక్ ప్రపంచం దృష్టంతా Apple అక్టోబర్ ఈవెంట్‌పైనే నిలిచింది. ఈ నెల చివర్లో జరగనుందని భావిస్తున్న ఈ ఈవెంట్‌లో, కుపర్టినో ఆధారిత టెక్ దిగ్గజం తన కొత్త iPad Pro, స్మార్ట్ హోమ్ డివైజ్‌లు, అలాగే ఇతర గ్యాడ్జెట్లను పరిచయం చేసే అవకాశం ఉంది. గత కొన్ని వారాలుగా వెలువడిన లీక్‌ల ప్రకారం, M5 చిప్‌తో నడిచే iPad Pro, AirTag 2, మరియు అప్‌డేటెడ్ Vision Pro వంటి డివైజ్‌లు ఈ ఈవెంట్‌లో వెలుగులోకి వచ్చే అవకాశముంది. అయితే, Apple ఇప్పటివరకు ఈ ఈవెంట్ ఖచ్చితమైన తేదీపై నోరు విప్పలేదు. కానీ, గత సంవత్సరాల ట్రెండ్‌ను పరిశీలిస్తే, ఈ నెలలోనే ఆపిల్ ఈవెంట్‌కు సంబంధించిన అధికారిక ప్రకటన వెలువడే అవకాశాలు ఎక్కువగా ఉన్నాయి.

ఆపిల్ అక్టోబర్ ఈవెంట్:

2021లో అక్టోబర్ 18న జరిగిన ఫాల్ ఈవెంట్‌లో, ఆపిల్ M1 MacBook Pro, AirPods 3, అలాగే కొత్త HomePod mini రంగులను పరిచయం చేసింది.

తదుపరి సంవత్సరం, 2022లో, కంపెనీ M2 iPad, 10వ తరం iPad, మరియు Apple TV 4K (3rd Gen)ను ఒక సాధారణ ప్రెస్ రిలీజ్ ద్వారా అక్టోబర్ 18ననే ప్రకటించింది.2023లో మాత్రం మళ్లీ లైవ్ ఈవెంట్ రూపంలో “Scary Fast” పేరుతో అక్టోబర్ 30న ఆపిల్ ఈవెంట్ నిర్వహించి, M3 MacBook Pro మరియు iMacలను విడుదల చేసింది.

2024లో మాత్రం ఆపిల్ ప్రత్యేక ఈవెంట్ నిర్వహించకుండా, M4 MacBook Pro, iMac, మరియు Mac miniలను చిన్న వీడియో పరిచయం ద్వారా మార్కెట్లోకి తీసుకువచ్చింది. ఈ ప్యాటర్న్ చూస్తే, ఆపిల్ ప్రతి రెండో సంవత్సరం లైవ్ ఈవెంట్ రూపంలో ఉత్పత్తులను ప్రకటించే పద్ధతిని అనుసరిస్తోంది. అందువల్ల, 2025లో లైవ్ ఈవెంట్ ఉండే అవకాశాలు చాలా బలంగా కనిపిస్తున్నాయి.

ఈవెంట్ ఎప్పుడు జరుగుతుంది:

ముందుగా ఆపిల్ అక్టోబర్ మధ్యలోనే తన ఉత్పత్తులను పరిచయం చేసేది. కానీ, గత రెండు సంవత్సరాలుగా కంపెనీ నెలాఖరులో విడుదల చేసే పద్ధతికి మారింది. ఈ నేపధ్యంలో, Apple October Event 2025 కూడా అక్టోబర్ 28 నుండి 30 మధ్య జరిగే అవకాశం ఉంది.ఈ అంచనా సరైనదై ఉంటే, ఈవెంట్‌లో విడుదలైన ఉత్పత్తుల ప్రీ-ఆర్డర్లు నవంబర్ 7 నుండి ప్రారంభమయ్యే అవకాశం ఉంది.

అయితే, ఇవన్నీ గత ట్రెండ్‌ల ఆధారంగా చేసిన అంచనాలే. అధికారిక సమాచారం ఇంకా వెలువడలేదు. అయినప్పటికీ, టెక్ అభిమానులు ఆసక్తిగా ఎదురుచూస్తున్న ఆపిల్ అక్టోబర్ ఈవెంట్ 2025 గురించి కంపెనీ త్వరలోనే అధికారిక ప్రకటన చేసే అవకాశం ఉంది.