మీ తల ఊపితే చాలు.. సిరి రియాక్ట్ అవుతుంది! యాపిల్ కొత్త హెడ్‌ఫోన్స్‌లో క్రేజీ ఫీచర్లు!

యాపిల్ తన ప్రీమియం ఆడియో విభాగంలో ఐదేళ్ల నిరీక్షణకు తెరదించుతూ, ఎట్టకేలకు మోస్ట్ అవేటెడ్ 'ఎయిర్‌పాడ్స్ మాక్స్ 2' హెడ్‌ఫోన్స్‌ను మార్కెట్లోకి గ్రాండ్‌గా లాంచ్ చేసింది. పాత మోడల్ డిజైన్‌ను అలాగే కొనసాగిస్తూనే, లోపల మాత్రం భారీ మార్పులతో ఈ లేటెస్ట్ గ్యాడ్జెట్‌ను అప్‌గ్రేడ్ చేసింది. ముఖ్యంగా ఇందులో అమర్చిన సరికొత్త 'H2 చిప్' దీనికి మెదడులా పనిచేస్తూ ఆడియో క్వాలిటీని నెక్స్ట్ లెవల్‌కు తీసుకెళ్లింది. మ్యూజిక్ లవర్స్ ఎప్పటినుంచో కోరుకుంటున్న మెరుగైన ఆక్టివ్ నాయిస్ క్యాన్సిలేషన్ , ట్రాన్స్‌పరెన్సీ మోడ్‌ను ఇందులో యాపిల్ కంపెనీ అద్భుతంగా ఇంప్రూవ్ చేసింది. ఈ క్రమంలోనే ప్రీమియం లుక్‌తో పాటు పవర్‌ఫుల్ ఫీచర్లను కోరుకునే నేటితరం టెక్ ప్రియులకు ఈ హెడ్‌ఫోన్స్ ఒక డ్రీమ్ గ్యాడ్జెట్‌గా మారనున్నాయి.

భారత మార్కెట్లో ఈ లగ్జరీ హెడ్‌ఫోన్స్ ధరను రూ. 67,900గా నిర్ణయించడం ఆసక్తికరంగా మారింది. స్టైల్,  ట్రెండ్‌కు ప్రాధాన్యతనిచ్చే నేటి యువత కోసం మిడ్‌నైట్, స్టార్‌లైట్, బ్లూ, ఆరెంజ్, పర్పుల్ వంటి ఐదు అద్భుతమైన రంగుల్లో ఇవి అందుబాటులోకి వచ్చాయి. అమెరికాతో పాటు ఇతర దేశాల్లో మార్చి 25 నుంచే బుకింగ్స్ మొదలవుతుండగా, వచ్చే నెల ప్రారంభం నుంచి ఇవి కస్టమర్ల చేతుల్లోకి వస్తాయి. కేవలం ప్రొడక్ట్ మాత్రమే కాకుండా, మూడు నెలల ఉచిత యాపిల్ మ్యూజిక్ సబ్‌స్క్రిప్షన్, అదనపు రక్షణ కోసం యాపిల్ కేర్ ప్లస్ వంటి సేవలను కూడా కంపెనీ అందిస్తోంది. అంటే ఒక్కసారి కొంటే ఆడియో అనుభవంతో పాటు సర్వీస్ విషయంలో కూడా పూర్తి భరోసా లభిస్తుందన్నమాట.

సాంకేతికపరంగా చూస్తే, పాత H1 చిప్ స్థానంలో వచ్చిన H2 చిప్ వల్ల నాయిస్ క్యాన్సిలేషన్ గతంలో కంటే ఒకటిన్నర రెట్లు ఎక్కువగా పనిచేస్తుంది. అంటే విమాన ప్రయాణాల్లో ఇంజిన్ సౌండ్ గానీ లేదా బయట ట్రాఫిక్ గోల గానీ అసలు వినబడకుండా కేవలం సంగీతాన్ని మాత్రమే ఎంజాయ్ చేయవచ్చు. అలాగే మనం ఎవరితోనైనా మాట్లాడేటప్పుడు వాల్యూమ్‌ను ఆటోమేటిక్‌గా తగ్గించే 'కాన్వర్జేషన్ అవేర్‌నెస్', పరిసరాల శబ్దాన్ని బట్టి సౌండ్‌ను అడ్జస్ట్ చేసే 'అడాప్టివ్ ఆడియో' వంటి ఫీచర్లు నేటి స్మార్ట్ లైఫ్‌స్టైల్‌కు పర్ఫెక్ట్‌గా సరిపోతాయి. గేమింగ్ ఆడే వారికి లేదా ప్రొఫెషనల్ ఎడిటర్లకు ఉపయోగపడేలా ఇందులో 'అల్ట్రా-లో లాటెన్సీ' ఆడియోను కూడా యాపిల్ అందించడం గమనార్హం.

ఈ జనరేషన్ యూజర్ల కోసం యాపిల్ ఇందులోకి 'యాపిల్ ఇంటెలిజెన్స్' ఫీచర్లను కూడా జొప్పించింది. అందులో ప్రధానంగా చెప్పుకోవాల్సింది 'లైవ్ ట్రాన్స్‌లేషన్' గురించి, దీనివల్ల వేర్వేరు భాషల వారితో మాట్లాడుతున్నప్పుడు రియల్ టైమ్‌లో అనువాదం జరుగుతుంది. కాలింగ్ విషయానికి వస్తే, వాయిస్ ఐసోలేషన్ ఫీచర్ ద్వారా చుట్టూ ఎంత గోల ఉన్నా అవతలి వారికి మీ మాటలు చాలా క్లియర్‌గా వినిపిస్తాయి. క్రియేటర్ల కోసం స్టూడియో క్వాలిటీ రికార్డింగ్ సదుపాయం కల్పిస్తూనే, డిజిటల్ క్రౌన్ ద్వారా కెమెరాను కంట్రోల్ చేసే వీలు కల్పించడం అదనపు ప్లస్ పాయింట్. సిరితో ఇంటరాక్ట్ అవ్వడానికి కేవలం తల ఊపితే సరిపోయేలా కొత్త జెస్చర్స్ ఫీచర్లు కూడా ఇందులో హైలైట్‌గా నిలుస్తున్నాయి.

పర్యావరణంపై బాధ్యతగా యాపిల్ 2030 లక్ష్యాలకు అనుగుణంగా, ఈ హెడ్‌ఫోన్స్ తయారీలో 100 శాతం రీసైకిల్ చేసిన మెటీరియల్స్‌ను వాడటం విశేషం. ప్లాస్టిక్ రహిత ప్యాకేజింగ్, రీసైకిల్డ్ గోల్డ్, టిన్ వాడటం ద్వారా పర్యావరణ స్పృహ ఉన్న యూజర్లను కూడా ఇది ఆకట్టుకుంటోంది. ఒక్కసారి ఫుల్ ఛార్జ్ చేస్తే దాదాపు 20 గంటల పాటు నిరంతరాయంగా పాటలు వినే బ్యాటరీ లైఫ్‌తో పాటు, ఫాస్ట్ ఛార్జింగ్ సపోర్ట్ కూడా ఇందులో ఉంది. ఫైనల్‌గా చెప్పాలంటే, హై-ఎండ్ ఆడియో క్వాలిటీతో పాటు ఐఫోన్ ఎకోసిస్టమ్‌తో డీప్ ఇంటిగ్రేషన్ కోరుకునే వారికి ఎయిర్‌పాడ్స్ మాక్స్ 2 ఒక అల్టిమేట్ ఆప్షన్ అని చెప్పవచ్చు.