వన్‌ప్లస్ 15T వచ్చేస్తోంది.. 100W ఫాస్ట్ ఛార్జింగ్, ఆండ్రాయిడ్ 16.. ఫ్లాగ్‌షిప్ ఫోన్లకు గట్టి పోటీ..!

వన్ ప్లస్ ప్రియులకు అదిరిపోయే గుడ్ న్యూస్ వచ్చేసింది. మార్కెట్లో ఇప్పటికే సంచలనం సృష్టిస్తున్న వన్ ప్లస్ 15 సిరీస్‌లో భాగంగా, ఇప్పుడు చైనాలో వన్ ప్లస్ 15టీ లాంచ్‌కు సర్వం సిద్ధమైంది. మార్చి 24వ తేదీన సాయంత్రం చైనా కాలమానం ప్రకారం ఈ ఫోన్‌ను అధికారికంగా విడుదల చేయనున్నారు. ఇప్పటికే ఈ ఫోన్ కోసం ప్రీ-ఆర్డర్లు ప్రారంభమయ్యాయి, అంటే టెక్ ప్రియుల్లో దీనిపై ఉన్న క్రేజ్ ఏ రేంజ్‌లో ఉందో అర్థం చేసుకోవచ్చు. కంపెనీ తన వెబ్ సైట్, సోషల్ మీడియా ప్లాట్‌ఫారమ్ వీబో ద్వారా ఈ ఫోన్ కీలక ఫీచర్లను వరుసగా టీజ్ చేస్తూ హైప్‌ను నెక్స్ట్ లెవల్‌కు తీసుకెళ్తోంది. ముఖ్యంగా మూడు విభిన్నమైన కలర్ ఆప్షన్లలో, ఐదు రకాల స్టోరేజ్ వేరియంట్లలో ఈ ఫోన్ అందుబాటులోకి రాబోతోంది.

ఈ ఫోన్ డిజైన్ విషయానికి వస్తే, వన్ ప్లస్ ఈసారి చాలా క్లాసీ లుక్‌ను ఎంచుకుంది. వెనుక వైపు ఫ్లాట్ ప్యానెల్‌తో పాటు చతురస్రాకారపు కెమెరా మాడ్యూల్‌ను అమర్చారు, ఇది ఫోన్‌కు ఒక ప్రీమియం లుక్‌ను ఇస్తుంది. హీలింగ్ వైట్ చాక్లెట్, ప్యూర్ కోకో, రిలాక్సింగ్ మ్యాచ్ఛా అనే కొత్త రంగుల్లో ఈ ఫోన్ లభిస్తుంది. సెక్యూరిటీ పరంగా ఇందులో ఇన్-డిస్ప్లే అల్ట్రాసోనిక్ ఫింగర్‌ప్రింట్ స్కానర్‌ను ఇచ్చారు, ఇది వేలిముద్రను చాలా వేగంగా గుర్తిస్తుంది. అంతేకాకుండా, దీనికి IP66 నుండి IP69K వరకు రేటింగ్స్ ఉన్నాయి, అంటే దుమ్ము, నీటి నుండి ఈ ఫోన్‌కు అత్యున్నత స్థాయి రక్షణ లభిస్తుంది. 6.32 అంగుళాల ఫ్లాట్ డిస్ప్లేతో వచ్చే ఈ ఫోన్, ఏకంగా 165Hz రిఫ్రెష్ రేట్‌ను సపోర్ట్ చేయడం విశేషం.

పెర్ఫార్మెన్స్ గురించి చెప్పాలంటే, వన్ ప్లస్ 15టీ లో అత్యంత శక్తివంతమైన 3nm ఆక్టా-కోర్ స్నాప్‌డ్రాగన్ 8 ఎలైట్ జెన్ 5 చిప్‌సెట్‌ను వాడారు. ఇదే ప్రాసెసర్ కంపెనీ ఫ్లాగ్ షిప్ మోడల్ వన్ ప్లస్ 15లో కూడా ఉంది. గేమర్స్ కోసం ప్రత్యేకంగా 'వన్ ప్లస్ ఈ-స్పోర్ట్స్ ట్రిపుల్ కోర్' టెక్నాలజీని ఇందులో జోడించారు. దీనివల్ల భారీ గ్రాఫిక్స్ ఉన్న గేమ్స్ ఆడేటప్పుడు కూడా ఫోన్ అస్సలు హ్యాంగ్ అవ్వదు. బెంచ్‌మార్కింగ్ ప్లాట్‌ఫారమ్‌లలో ఈ ఫోన్ 44,50,000 కంటే ఎక్కువ స్కోరు సాధించి తన సత్తా చాటింది. అలాగే, ఇందులో ఉన్న 'విండ్ ఛేజర్ గేమింగ్' కెర్నల్ వల్ల 1.5K రిజల్యూషన్‌లో కూడా 165 fps వరకు స్మూత్ గేమింగ్ అనుభూతిని పొందవచ్చు.

సాఫ్ట్‌వేర్, బ్యాటరీ విషయాల్లో వన్ ప్లస్ మరోసారి తన మార్కును చూపిస్తోంది. ఈ ఫోన్ ఆండ్రాయిడ్ 16 ఆధారిత కలర్ ఓఎస్ 16తో పని చేస్తుంది. కంపెనీ ఈ ఫోన్ కోసం నాలుగు ఏళ్ల మేజర్ ఓఎస్ అప్‌డేట్స్, ఐదేళ్ల సెక్యూరిటీ అప్‌డేట్స్ ప్రామిస్ చేసింది. బ్యాటరీ విషయానికి వస్తే, ఇందులో భారీ 7,500mAh గ్లేసియర్ బ్యాటరీని అమర్చారు. ఒక్కసారి ఛార్జ్ చేస్తే దాదాపు 22 గంటల పాటు ఆన్‌లైన్ వీడియోలు చూడవచ్చని కంపెనీ చెబుతోంది. దీనికి తోడు 100W సూపర్ వూక్ వైర్డ్ ఛార్జింగ్ , 50W వైర్‌లెస్ ఛార్జింగ్ సపోర్ట్ కూడా ఉంది. అంటే ఇంత పెద్ద బ్యాటరీని కూడా చాలా తక్కువ సమయంలోనే ఫుల్ ఛార్జ్ చేసుకోవచ్చు.

కెమెరా లవర్స్ కోసం ఇందులో అదిరిపోయే డ్యూయల్ రియర్ కెమెరా సెటప్ ఉంది. 50 మెగాపిక్సెల్ సోనీ అల్ట్రా విజన్ ప్రైమరీ సెన్సార్‌తో పాటు మరో 50 మెగాపిక్సెల్ పెరిస్కోప్ టెలిఫోటో కెమెరాను అందించారు. ఈ టెలిఫోటో లెన్స్ ద్వారా 3.5x ఆప్టికల్ జూమ్ ,  7x లాస్‌లెస్ డిజిటల్ జూమ్ చేయవచ్చు. తక్కువ వెలుతురులో కూడా అద్భుతమైన ఫోటోలు తీసేలా ఒప్పో యొక్క లూమో ఇంజిన్‌ను ఇందులో వాడారు. అలాగే 'షాడోలెస్ క్యాప్చర్' వంటి ఫీచర్లు ఫోటోగ్రఫీని మరింత సులభతరం చేస్తాయి. సెల్ఫీల కోసం ముందు వైపు ఉన్న కెమెరా 4K అల్ట్రా హెచ్‌డీ వీడియో రికార్డింగ్‌ను సపోర్ట్ చేస్తుంది, ఇది వ్లాగర్లకు ఎంతో ఉపయోగపడుతుంది.

ధర విషయానికి వస్తే, చైనాలో దీని ప్రారంభ ధర సుమారు 3,399 యువాన్లు (సుమారు రూ.39,000) నుండి మొదలయ్యే అవకాశం ఉంది. అయితే టాప్ ఎండ్ 16GB + 1TB వేరియంట్ ధర 4,499 యువాన్ల (సుమారు రూ.52,000) వరకు ఉండవచ్చు. గత ఏడాది వచ్చిన వన్ ప్లస్ 13టీ కంటే దీని ధర కొంచెం ఎక్కువగా ఉండవచ్చని సమాచారం. ఏది ఏమైనా, అదిరిపోయే ప్రాసెసర్, భారీ బ్యాటరీ,  అదిరిపోయే కెమెరాతో వస్తున్న వన్ ప్లస్ 15టీ స్మార్ట్‌ఫోన్ మార్కెట్లో కొత్త రికార్డులు సృష్టించడం ఖాయంగా కనిపిస్తోంది. చైనాలో లాంచ్ అయిన కొద్ది కాలానికే ఇది మన ఇండియాలోకి కూడా వచ్చే అవకాశం ఉంది.