యాప్ ఇన్‌స్టాల్‌కి వన్ డే వెయిటింగ్! గూగుల్ కొత్త ఆండ్రాయిడ్ రూల్స్.. బైపాస్ చేసే ట్రిక్ ఇదే!

ఆండ్రాయిడ్ స్మార్ట్‌ఫోన్ యూజర్లకు గూగుల్ ఒక షాకింగ్ అప్‌డేట్ ఇచ్చింది. ఇకపై గూగుల్ ప్లే స్టోర్ కాకుండా బయట నుంచి యాప్స్ డౌన్‌లోడ్ చేసుకోవడం  అంత ఈజీ కాదు. సెక్యూరిటీ పేరుతో గూగుల్ తన పాలసీలను పూర్తిగా మార్చేస్తోంది. దీని ప్రకారం, వెరిఫై కాని డెవలపర్ల నుంచి మీరు ఏదైనా యాప్‌ను ఇన్‌స్టాల్ చేయాలని ప్రయత్నిస్తే, కచ్చితంగా 24 గంటల పాటు వేచి చూడాల్సిందే. స్కామ్‌లు, మాల్వేర్ దాడులను అరికట్టడమే దీని ఉద్దేశమని గూగుల్ చెబుతున్నప్పటికీ, టెక్ ప్రియులకు, పవర్ యూజర్లకు ఇది ఒక తలనొప్పిగా మారనుంది. అయితే, ఈ 24 గంటల నిరీక్షణను తప్పించుకోవడానికి ఒక టెక్నికల్ మార్గం ఉంది, అదే ఆండ్రాయిడ్ డీబగ్ బ్రిడ్జ్. ఈ టూల్ ద్వారా మీరు గూగుల్ పెట్టిన కొత్త రూల్స్ బ్రేక్ చేసి యాప్స్‌ను వెంటనే ఇన్‌స్టాల్ చేసుకోవచ్చు.

గూగుల్ ప్రవేశపెట్టిన ఈ కొత్త డెవలపర్ వెరిఫికేషన్ సిస్టమ్ చాలా కఠినంగా ఉండబోతోంది. ఇకపై డెవలపర్లు తమ ఐడెంటిటీని సబ్మిట్ చేయాలి, యాప్ సైనింగ్ కీలను అప్‌లోడ్ చేయాలి, కొంత ఫీజు కూడా చెల్లించాలి. ఒకవేళ డెవలపర్ వెరిఫై కాకపోతే, వారి యాప్స్ ఆండ్రాయిడ్ ఫోన్లలో ఆటోమేటిక్‌గా బ్లాక్ అయిపోతాయి. ఒకవేళ యూజర్ ఆ యాప్‌ను కావాలని ఇన్‌స్టాల్ చేయాలనుకుంటే, డెవలపర్ సెట్టింగ్స్‌లో ఒక దాగి ఉన్న ఆప్షన్‌ను ఎనేబుల్ చేయాలి. ఈ ప్రాసెస్ కావాలనే చాలా క్లిష్టంగా డిజైన్ చేశారు. అంతా పూర్తయ్యాక కూడా గూగుల్ విధించిన ఆ 24 గంటల సెక్యూరిటీ డిలే ముగిసే వరకు మీరు ఆగాల్సిందే. సోషల్ ఇంజనీరింగ్ దాడుల నుండి యూజర్లను రక్షించడానికి ఈ విండో పీరియడ్ అవసరమని గూగుల్ గట్టిగా వాదిస్తోంది.

ఇక్కడే మనకు ఏడీబీ అనే ఒక పవర్‌ఫుల్ కమెండ్ లైన్ టూల్ ఉపయోగపడుతుంది. సాధారణంగా దీనిని డెవలపర్లు యాప్స్‌ను టెస్ట్ చేయడానికి వాడుతుంటారు, కానీ ఇప్పుడు ఇది సామాన్య యూజర్లకు కూడా ఒక ఆయుధంగా మారింది. కంప్యూటర్ ద్వారా మీ ఫోన్‌తో కమ్యూనికేట్ చేయడానికి ఏడీబీ ఉపయోగపడుతుంది. ఆండ్రాయిడ్ సెట్టింగ్స్‌ను నేరుగా మోడిఫై చేయడం ద్వారా, ఈ 24 గంటల వెయిటింగ్ పీరియడ్‌ను ఏడీబీ పూర్తిగా బైపాస్ చేస్తుంది. అంటే మీరు గూగుల్ అనుమతి కోసం రోజులు గడపాల్సిన అవసరం లేదు. కాకపోతే, దీనిని వాడాలంటే కొంచెం టెక్నికల్ నాలెడ్జ్ ఉండాలి. అలాగే డెవలపర్ ఆప్షన్స్ ఎనేబుల్ చేయడం వల్ల కొన్ని బ్యాంకింగ్ యాప్స్ పని చేయకపోవచ్చనే విషయాన్ని కూడా మీరు గుర్తుంచుకోవాలి.

ఈ బైపాస్ ప్రాసెస్‌ను ప్రారంభించాలంటే మొదట మీరు మీ ఫోన్ సెట్టింగ్స్‌లోకి వెళ్లి, 'అబౌట్ ఫోన్' లో ఉన్న 'బిల్డ్ నంబర్' పై ఏడు సార్లు ట్యాప్ చేయాలి. ఇలా చేయడం వల్ల 'డెవలపర్ ఆప్షన్స్' యాక్టివేట్ అవుతాయి. ఆ తర్వాత సిస్టమ్ సెట్టింగ్స్‌లోకి వెళ్లి 'యూఎస్‌బీ డీబగ్గింగ్' ఆప్షన్‌ను ఎనేబుల్ చేయాలి. ఇప్పుడు మీ కంప్యూటర్‌లో ఏడీబీ సాఫ్ట్‌వేర్‌ను ఇన్‌స్టాల్ చేసి, యూఎస్‌బీ కేబుల్ ద్వారా ఫోన్‌ను కనెక్ట్ చేయాలి. కంప్యూటర్ స్క్రీన్‌పై కమెండ్ ప్రాంప్ట్ ఓపెన్ చేసి మీ డివైజ్ కనెక్ట్ అయిందో లేదో చెక్ చేసుకోవాలి. వన్స్ అంతా సెట్ అయ్యాక, ఒక సింపుల్ కమెండ్ ద్వారా మీకు కావాల్సిన ఏపీకే ఫైల్‌ను డైరెక్ట్‌గా ఇన్‌స్టాల్ చేసుకోవచ్చు.

అయితే, ఈ ప్రాసెస్‌లో కొన్ని రిస్క్‌లు కూడా ఉన్నాయి. గూగుల్ సెక్యూరిటీని బైపాస్ చేయడం అంటే మీరు ఒక రకమైన రిస్క్ తీసుకుంటున్నట్లే లెక్క. కేవలం నమ్మకమైన సోర్సెస్ లేదా డెవలపర్ల వెబ్‌సైట్ల నుండి మాత్రమే యాప్స్ డౌన్‌లోడ్ చేసుకోవడం ఉత్తమం. ఏది పడితే అది ఇన్‌స్టాల్ చేస్తే మీ డేటా చోరీకి గురయ్యే ప్రమాదం ఉంది. ఈ ఏడీబీ పద్ధతి కేవలం నిపుణులకు లేదా అవగాహన ఉన్న వారికి మాత్రమే రికమెండ్ చేయబడుతుంది. యాప్ ఇన్‌స్టాల్ అయిపోయిన తర్వాత వెంటనే డెవలపర్ ఆప్షన్స్‌ను, యూఎస్‌బీ డీబగ్గింగ్‌ను డిసేబుల్ చేయడం మర్చిపోవద్దు, అప్పుడే మీ బ్యాంకింగ్ యాప్స్ మళ్లీ మామూలుగా పని చేస్తాయి.

మొత్తానికి గూగుల్ తెచ్చిన ఈ కొత్త రూల్స్ ఆండ్రాయిడ్ ప్లాట్‌ఫారమ్‌ను మరింత క్లోజ్డ్ సిస్టమ్‌గా మార్చేస్తున్నాయి. ఆపిల్ ఐఫోన్ల లాగే ఆండ్రాయిడ్‌లో కూడా కంట్రోల్ అంతా గూగుల్ చేతుల్లోకి వెళ్తోంది. దీనివల్ల సామాన్య యూజర్లకు రక్షణ పెరిగినప్పటికీ, స్వతంత్రంగా యాప్స్ వాడుకునే స్వేచ్ఛ తగ్గుతోందని టెక్ విశ్లేషకులు భావిస్తున్నారు. అందుకే ఏడీబీ వంటి ప్రత్యామ్నాయ మార్గాల గురించి తెలుసుకోవడం ఈ జనరేషన్ యూజర్లకు చాలా ముఖ్యం. రాబోయే రోజుల్లో గూగుల్ ఈ ఏడీబీ మార్గాన్ని కూడా మూసేస్తుందా లేక పవర్ యూజర్ల కోసం వదిలేస్తుందా అనేది వేచి చూడాలి. ప్రస్తుతం అయితే గూగుల్ ఆంక్షలను ధిక్కరించడానికి ఏడీబీ ఒక్కటే సరైన మార్గంగా కనిపిస్తోంది.