ఏప్రిల్ 7న వన్‌ప్లస్ నార్డ్ 6 గ్రాండ్ లాంచ్! అదిరిపోయే ఫీచర్లు.. అంతకు మించి పెర్ఫార్మెన్స్

స్మార్ట్‌ఫోన్ లవర్స్‌కి అదిరిపోయే న్యూస్. వన్ ప్లస్ నుంచి మోస్ట్ అవేటెడ్ 'నార్డ్ 6' ఇండియాలోకి అడుగుపెట్టడానికి ముహూర్తం ఖరారైంది. ఏప్రిల్ 7వ తేదీ సాయంత్రం 7 గంటలకు ఈ ఫోన్ గ్రాండ్‌గా లాంచ్ కాబోతోంది. గత ఏడాది వచ్చిన నార్డ్ 5కి సక్సెసర్‌గా వస్తున్న ఈ హ్యాండ్‌సెట్ కోసం ఇప్పటికే అమెజాన్ వంటి ఇ-కామర్స్ సైట్లలో సపరేట్ పేజీలు కూడా రెడీ అయిపోయాయి. చూస్తుంటే ఈసారి వన్ ప్లస్ మార్కెట్‌ను ఒక రేంజ్‌లో షేక్ చేసేలా కనిపిస్తోంది. ట్రెండీ లుక్, పవర్‌ఫుల్ ఫీచర్లతో రాబోతున్న ఈ ఫోన్ యూత్ అంచనాలను ఏ మేరకు అందుకుంటుందో చూడాలి.

ఈ ఫోన్ డిజైన్ గురించి చెప్పాలంటే వన్ ప్లస్ తన సిగ్నేచర్ స్టైల్‌ను కాపాడుకుంటూనే కొన్ని మార్పులు చేసింది. ఇది చూడటానికి చైనాలో రిలీజ్ అయిన టర్బో 6 మోడల్‌ను పోలి ఉంటుంది. బాడీ వెనుక భాగంలో స్క్వేర్ షేప్ కెమెరా మాడ్యూల్ ఉండబోతోంది, అందులోనే డ్యూయల్ కెమెరా సెటప్, ఎల్ఈడీ ఫ్లాష్ సెట్ చేశారు. కలర్స్ విషయానికి వస్తే ఫ్రెష్ మింట్, పిచ్ బ్లాక్, క్విక్ సిల్వర్ అనే మూడు ట్రెండీ ఆప్షన్లలో లభించనుంది. అంతేకాదు, ఈసారి ప్రీమియం ఫీల్ కోసం ఫ్లాట్ మెటల్ ఫ్రేమ్‌ను ఉపయోగించారు, ఇది ఫోన్‌కి బోల్డ్ లుక్‌ను ఇస్తుంది.

డిస్ప్లే పరంగా వన్ ప్లస్ నార్డ్ 6 ఒక విజువల్ ఫీస్ట్ అని చెప్పవచ్చు. ఇందులో 6.78 అంగుళాల ఫ్లాట్ అమోలెడ్ సన్‌బర్స్ట్ హెచ్‌డిఆర్ డిస్ప్లేను వాడుతున్నారు. దీని 1.5K రిజల్యూషన్, 165Hz రిఫ్రెష్ రేట్ వల్ల వీడియోలు చూడటం లేదా గేమింగ్ ఆడటం చాలా స్మూత్‌గా ఉంటుంది. ముఖ్యంగా 3,600 నిట్స్ పీక్ బ్రైట్‌నెస్ వల్ల ఎండలో కూడా స్క్రీన్ క్లియర్ గా కనిపిస్తుంది. అలాగే ఇందులో ఉన్న ఆక్వా టచ్ 2.0 టెక్నాలజీ వల్ల మీ చేతులు తడి ఉన్నా కూడా ఫోన్ స్క్రీన్‌ను చాలా ఈజీగా ఆపరేట్ చేయవచ్చు, ఇది వర్షాకాలంలో భలే ఉపయోగపడుతుంది.

పర్ఫార్మెన్స్ విషయంలో ఈ ఫోన్ ఒక బీస్ట్ అని చెప్పాలి. ఇందులో క్వాల్కమ్ స్నాప్‌డ్రాగన్ 8s జెన్ 4 చిప్‌సెట్ వాడుతున్నారు, ఇది మల్టీటాస్కింగ్‌ను చాలా వేగంగా చేస్తుంది. దాదాపు 25 లక్షలకు పైగా యాంటుటూ స్కోర్‌తో వస్తున్న ఈ ఫోన్, ఏఐ ఫీచర్లలో కూడా అదరగొట్టనుంది. ఆండ్రాయిడ్ 16 ఆధారిత ఆక్సిజన్ ఓఎస్ 16తో వస్తున్న ఈ హ్యాండ్‌సెట్‌లో 12GB వరకు ర్యామ్ మరియు 256GB ఇంటర్నల్ స్టోరేజ్ అందుబాటులో ఉండనుంది. అలాగే వైఫై కనెక్టివిటీ కోసం ఇందులో వన్ ప్లస్ 15 ఫ్లాగ్‌షిప్ ఫోన్‌లో వాడే జి2 చిప్‌ను కూడా ఇస్తున్నారు.

కెమెరా సెటప్ చూస్తే వెనుక వైపు 50 మెగాపిక్సెల్ ప్రైమరీ కెమెరా ఉండబోతోంది, ఇది అదిరిపోయే ఫోటోలను క్యాప్చర్ చేస్తుంది. దీనికి తోడు 20x డిజిటల్ జూమ్ సదుపాయం ఉన్న మోనోక్రోమ్ కెమెరా కూడా తోడవుతుంది. సెల్ఫీల కోసం 16 మెగాపిక్సెల్ ఫ్రంట్ కెమెరాను పంచ్ హోల్ డిజైన్‌లో అమర్చారు. ఇక బ్యాటరీ విషయానికి వస్తే అందరినీ ఆశ్చర్యపరిచేలా 9,000mAh భారీ సిలికాన్-కార్బన్ బ్యాటరీని ఇస్తున్నారు. ఇది ఒక్కసారి ఛార్జ్ చేస్తే దాదాపు రెండున్నర రోజుల పాటు నిరంతరాయంగా పనిచేస్తుందని కంపెనీ చెబుతోంది. దీనికి 80W ఫాస్ట్ ఛార్జింగ్ సపోర్ట్ కూడా ఉంది.

చివరగా ధర విషయానికి వస్తే వన్ ప్లస్ నార్డ్ 6 ఇండియాలో సుమారు 35,000 నుండి 40,000 రూపాయల మధ్య ఉండే అవకాశం ఉంది. పాత మోడల్ నార్డ్ 5 కంటే ఇది కొంచెం ఖరీదైనది అయినప్పటికీ, ఇందులో ఇస్తున్న అడ్వాన్స్‌డ్ ఫీచర్లు, భారీ బ్యాటరీ ఆ రేటుకు న్యాయం చేస్తాయని టెక్ నిపుణులు భావిస్తున్నారు. అమెజాన్, వన్ ప్లస్ ఆన్‌లైన్ స్టోర్లలో ఈ ఫోన్ త్వరలోనే అమ్మకానికి రానుంది. కొత్త ఫోన్ కొనాలని ప్లాన్ చేసే వారికి, ముఖ్యంగా బ్యాటరీ బ్యాకప్, పర్ఫార్మెన్స్ కోరుకునే వారికి ఇది బెస్ట్ ఆప్షన్ కానుంది.