స్టేటస్ ప్రశ్నలకు వచ్చే సమాధానాలు ఎండ్-టు-ఎండ్ ఎన్క్రిప్షన్‌తో ప్రొటెక్ట్ చేయబడతాయి.

ప్రపంచవ్యాప్తంగా అత్యధికంగా ఉపయోగించే ఇన్‌స్టంట్ మెసేజింగ్ యాప్ వాట్సాప్, తాజాగా “స్టేటస్ ప్రశ్న (Status Question)” అనే కొత్త ఫీచర్‌ను ఆండ్రాయిడ్ యూజర్ల కోసం పరీక్షిస్తోంది. ఫీచర్ ట్రాకర్ నివేదిక ప్రకారం, ఈ కొత్త ఆప్షన్ ప్రస్తుతం కొంతమంది బీటా టెస్టర్లకు గూగుల్ ప్లే స్టోర్ ద్వారా అందుబాటులోకి వచ్చింది. త్వరలో మరింత మంది యూజర్లకు ఈ ఫీచర్‌ను విడుదల చేసే అవకాశం ఉందని సమాచారం. ఇది ఇన్‌స్టాగ్రామ్‌లో ఉన్న “Question Sticker” లా పనిచేస్తుంది, అంటే యూజర్లు తమ స్టేటస్‌లో ప్రశ్న అడగగలరు, వీక్షకులు దానికి సమాధానం ఇవ్వగలరు. ముఖ్యంగా, ఈ సమాధానాలు పూర్తిగా ప్రైవేట్‌గా ఉంటాయి. ప్రశ్న వేసిన వ్యక్తి మరియు సమాధానం ఇచ్చిన వ్యక్తి మాత్రమే వాటిని చూడగలరు.

ఫీచర్ ఎలా పనిచేస్తుంది:

తాజా వాట్సాప్ బీటా వెర్షన్ (2.25.29.12) లో ఈ కొత్త స్టేటస్ ప్రశ్న ఫీచర్‌ను కొంతమంది టెస్టర్లకు అందించారు. అయితే ఇది నెమ్మదిగా రోలౌట్ అవుతోంది, కాబట్టి ప్రతి బీటా యూజర్‌కి వెంటనే కనిపించకపోవచ్చు. రాబోయే వారాల్లో ఈ ఫీచర్‌ను మరింత విస్తృతంగా అందుబాటులోకి తీసుకురావాలని కంపెనీ యోచిస్తోంది. ఈ దశలో వాట్సాప్ బగ్‌లు సరిదిద్దడమే కాకుండా, యూజర్ల నుంచి అభిప్రాయాలను కూడా సేకరించనుంది.

ఇన్‌స్టాగ్రామ్ స్టోరీస్ లాగే ఫీచర్:

ఇన్‌స్టాగ్రామ్‌లో ఉన్న ప్రశ్న స్టికర్‌లా, ఈ కొత్త ఆప్షన్ ద్వారా కూడా యూజర్లు తమ స్టేటస్‌లో ఫోటోలు లేదా వీడియోలతో పాటు ఒక ప్రశ్న బాక్స్ జోడించవచ్చు. వీక్షకులు ఆ బాక్స్‌పై ట్యాప్ చేసి తమ సమాధానాన్ని టైప్ చేసి పంపగలరు. ఒక్క ప్రశ్నకు పలువురు సమాధానాలు ఇవ్వగలరు, వీటిని “Viewers List” లో చూడొచ్చు.

ప్రైవసీ, నోటిఫికేషన్లు, సెక్యూరిటీ:

ఫీచర్ ట్రాకర్ వివరాల ప్రకారం, స్టేటస్ ప్రశ్నలకు వచ్చే సమాధానాలు ఎండ్-టు-ఎండ్ ఎన్క్రిప్షన్‌తో ప్రొటెక్ట్ చేయబడతాయి. అంటే, సమాధానం పంపిన వ్యక్తి మరియు స్టేటస్ పెట్టిన వ్యక్తి మాత్రమే వాటిని చూడగలరు. కొత్త సమాధానం వచ్చిన ప్రతిసారి యూజర్‌కి నోటిఫికేషన్ వస్తుంది. అదనంగా, వాట్సాప్ భవిష్యత్తులో ఈ సమాధానాలను కొత్త స్టేటస్‌గా షేర్ చేసుకునే ఆప్షన్ ఇవ్వవచ్చని కూడా సమాచారం.

ఒక ముఖ్యమైన అంశం ఏమిటంటే, సమాధానం ఇచ్చిన వ్యక్తి యొక్క గుర్తింపును యాప్ హైడ్ చేస్తుంది. అంటే, ప్రైవసీకి పూర్తి రక్షణ ఉంటుంది. అలాగే, అనుచిత సమాధానాలపై యూజర్లు రిపోర్ట్ చేసే అవకాశాన్ని కూడా వాట్సాప్ కల్పించనుంది.

ఈ కొత్త “Status Question” ఫీచర్ ద్వారా వాట్సాప్ యూజర్లు తమ స్టేటస్‌లను మరింత ఇంటరాక్టివ్‌గా మార్చుకోవచ్చు. సమాధానాలు పూర్తిగా ప్రైవేట్‌గా ఉండటం వల్ల వ్యక్తిగత భద్రత, గోప్యత పరిరక్షణ కూడా కొనసాగుతుంది.

ఈ కొత్త ఫీచర్ అందుబాటులోకి వస్తే వాట్సాప్ యూసర్లకు మరింత కొత్త ఎక్స్పీరియన్స్ అందించే అవకాశం ఉంటుంది.