భార‌త్‌లో Redmi A4 5G ధరతోపాటు కీల‌క‌మైన స్పెసిఫికేష‌న్స్ బ‌య‌ట‌కొచ్చాయి

మ‌న దేశంలో ఈ అక్టోబర్ 16న ఇండియా మొబైల్ కాంగ్రెస్ (IMC) 2024లో Redmi A4 5G స్మార్ట్ ఫోన్‌ను ఆవిష్కరించిన విష‌యం తెలిసిందే. ఇది స్నాప్‌డ్రాగన్ 4s Gen 2 ప్రాసెస‌ర్‌తో కూడిన మొదటి ఎంట్రీ-లెవల్ స్మార్ట్‌ఫోన్‌గా పరిచయం చేయబడింది. ఈ హ్యాండ్‌సెట్ డిజైన్, ప్రాసెస‌ర్‌ వివరాలను పక్కన పెడితే, కంపెనీ ఇంకెలాంటి విష‌యాల‌ను వెల్లడించలేదు. ఫోన్ ధరకూ రూ.10 వేల‌ లోపు ఉంటుందని తెలిపింది. తాజా నివేదిక ఆధారంగా.. మ‌న‌ దేశంలో రాబోయే ఈ స్మార్ట్‌ఫోన్ ప్రారంభ ధరతోపాటు దాని ముఖ్య‌మైన స్పెసిఫికేష‌న్స్ బ‌య‌ట‌కు వ‌చ్చాయి. మ‌రెందుకు ఆల‌స్యం.. ఈ ఎంట్రీ-లెవల్ స్మార్ట్ ఫోన్‌కు సంబంధించిన ప‌లు ఆస‌క్తిక‌ర‌మైన విష‌యాల‌ను చూసేద్దామా?!

భార‌త్‌లో Redmi A4 5G ధ‌ర అంచ‌నా..

తాజా Smartprix నివేదిక ప్ర‌కారం.. మ‌న భార‌త్‌లో Redmi A4 5G హ్యాండ్‌సెట్‌ 4GB + 128GB వేరియంట్ ధ‌ర రూ8,499గా ఉంది. ఈ ధర బ్యాంక్, లాంచ్ ఆఫర్‌లతో పాటు ఇతర డిస్కౌంట్‌లతో ఉంటుంది. అంటే, దీని అర్థం మొబైల్‌ అసలు ధ‌ర‌ దీనికంటే కొంచెం ఎక్కువ‌గా ఉండ‌వ‌చ్చు. అలాగే, IMC ఈవెంట్‌లో కంపెనీ ఈ ఫోన్‌ను రూ.10 వేలు కంటే తక్కువ ధర వద్ద విడుదల చేయనున్నట్లు ప్రకటించిన విష‌యం తెలిసిందే. ఈ ప్ర‌కట‌న‌తోనే మార్కెట్‌లో Redmi A4 5G హ్యాండ‌సెట్ ఫీచ‌ర్స్‌తోపాటు ధ‌ర‌పై ప‌లు అంచ‌నాలు వ్య‌క్త‌మ‌వుతూ వ‌చ్చాయి.

HD+ IPS LCD స్క్రీన్‌తో..

ఈ స‌రికొత్త Redmi A4 5G స్మార్ట్ ఫోన్‌ 4nm స్నాప్‌డ్రాగన్ 4s Gen 2 ప్రాసెస‌ర్‌తో వ‌స్తున్న‌ట్లు స్ప‌ష్టమైంది. అలాగే, పైన వెల్ల‌డించిన‌ నివేదిక ప్ర‌కారం.. ఫోన్ 90Hz రిఫ్రెష్ రేట్‌తో 6.7-అంగుళాల HD+ IPS LCD స్క్రీన్‌ను కలిగి ఉండవచ్చని అంచ‌నా వేస్తున్నారు. దీనిని 18W వైర్డ్ ఛార్జింగ్ సపోర్ట్ చేస్తూ 5,000mAh బ్యాటరీతో రూపొందించార‌ని భావిస్తున్నారు. ఈ బ‌డ్జెట్‌లో కంపెనీ ఇస్తోన్న ఫీచ‌ర్స్ కొనుగోలుదారుల‌ను ఆక‌ర్షిస్తుంద‌ని మార్కెట్ వ‌ర్గాలు గ‌ట్టి న‌మ్మ‌కంతో ఉన్నాయి.

50-మెగాపిక్సెల్ ప్రైమరీ రియర్ సెన్సార్‌..

ఇక కెమెరా విష‌యానికి వ‌స్తే.. Redmi A4 5G 50-మెగాపిక్సెల్ ప్రైమరీ రియర్ సెన్సార్‌తో f/1.8 ఎపర్చరు, 8-మెగాపిక్సెల్ సెల్ఫీ షూటర్‌తో వస్తుంది. ఇది హైపర్‌ఓఎస్ 1.0 స్కిన్‌తో ఆండ్రాయిడ్ 14లో రన్ అవుతుందని భావిస్తున్నారు. భద్రత కోసం ఫోన్‌లో సైడ్-మౌంటెడ్ ఫింగర్‌ప్రింట్ సెన్సార్ ఉండే అవకాశం ఉంద‌ని మార్కెట్ వ‌ర్గాలు అంచ‌నా వేస్తున్నాయి. అలాగే, ఈ హ్యాండ్‌సెట్ USB టైప్-సి పోర్ట్‌తో రావ‌చ్చు.

Redmi A3 4G భార‌త్‌లో..

ప్ర‌ధానంగా, Redmi A3 4G భారతదేశంలో బేస్ 3GB + 64GB వేరియంట్ ధ‌ర‌ 7,299గా ఉంది. అలాగే, ఇది MediaTek Helio G36 ప్రాసెస‌ర్‌, 10W ఛార్జింగ్ సపోర్ట్‌తో 5,000mAh బ్యాటరీతో రూపొందించారు. 90Hz రిఫ్రెష్ రేట్‌తో 6.71-అంగుళాల HD+ స్క్రీన్‌తో వస్తుంది. ఈ ఫోన్ 8-మెగాపిక్సెల్ ప్రధాన కెమెరా,5-మెగాపిక్సెల్ ఫ్రంట్ కెమెరాను కలిగి ఉంది.