ఈ ఏడాది ఒప్పో ‘డ్యూయల్ ఫోల్డబుల్ స్ట్రాటజీ’ని అనుసరించనుందని సమాచారం

ఆపిల్ తొలి ఫోల్డబుల్ ఐఫోన్‌పై పుకార్లు ఇప్పటికే టెక్ ప్రపంచంలో జోరుగా వినిపిస్తున్నాయి. ‘ఐఫోన్ ఫోల్డ్' అనే పేరుతో ఇది మార్కెట్‌లోకి వచ్చే అవకాశముందని లీకులు చెబుతున్నాయి. ఈ నేపథ్యంలో ఆపిల్‌కు పోటీగా సామ్‌సంగ్ మాత్రమే కాదు, ఒప్పో కూడా తన ఫోల్డబుల్ వ్యూహాన్ని మరింత దూకుడుగా అమలు చేయడానికి సిద్ధమవుతున్నట్టు తాజా సమాచారం సూచిస్తోంది. స్మార్ట్‌ప్రిక్స్ నివేదిక ప్రకారం, ఈ ఏడాదిలో ఒప్పో రెండు కొత్త ఫోల్డబుల్ స్మార్ట్‌ఫోన్లను విడుదల చేయాలని ప్లాన్ చేస్తోంది. వీటిలో ఒక మోడల్ ప్రత్యేకంగా ఆపిల్ రాబోయే ఫోల్డబుల్ ఐఫోన్‌కు ప్రత్యక్ష పోటీగా ఉండనుందని తెలుస్తోంది.ఈ ఏడాది ఒప్పో ‘డ్యూయల్ ఫోల్డబుల్ స్ట్రాటజీ'ని అనుసరించనుందని సమాచారం. ఇందులో భాగంగా ముందుగా ఒప్పో ఫైండ్ N6ను విడుదల చేయనుంది. ఈ డివైస్ ఫిబ్రవరిలో చైనా మార్కెట్‌లో అడుగుపెట్టే అవకాశం ఉండగా, మార్చిలో గ్లోబల్ మార్కెట్‌లోకి రానుందని లీకులు చెబుతున్నాయి. పనితీరుకు ప్రాధాన్యం ఇచ్చే యూజర్లను లక్ష్యంగా చేసుకున్న ఈ ఫోల్డబుల్, క్వాల్కమ్ నుంచి రాబోయే నెక్స్ట్-జెన్ Snapdragon 8 Elite Gen 5 చిప్‌సెట్‌తో పనిచేసే అవకాశం ఉంది. దీనితో పాటు గరిష్టంగా 16GB ర్యామ్ కూడా అందించవచ్చని అంచనా.

డిజైన్, డిస్‌ప్లే విషయానికి వస్తే, ఒప్పో ఫైండ్ N6లో 8.12 అంగుళాల 2K LTPO OLED ఇన్నర్ డిస్‌ప్లే ఉండొచ్చని తెలుస్తోంది. ఇది 120Hz రిఫ్రెష్ రేట్‌ను సపోర్ట్ చేయనుంది. బయట వైపు 6.62 అంగుళాల AMOLED స్క్రీన్ ఇవ్వవచ్చని సమాచారం. మొత్తం డిజైన్ ప్రస్తుతం ఉన్న ఫైండ్ N5కు దగ్గరగా ఉండే అవకాశం ఉంది. కెమెరా సెక్షన్‌లో కూడా ఒప్పో పెద్ద అప్‌గ్రేడ్ ఇవ్వనుందనే టాక్ ఉంది. 200MP ప్రధాన కెమెరాతో పాటు 50MP టెలిఫోటో, 50MP అల్ట్రా వైడ్ కెమెరాలు ఇందులో ఉండవచ్చని చెబుతున్నారు. బ్యాటరీ పరంగా చూస్తే, ఈ ఫోల్డబుల్‌లో 6,000mAh డ్యూయల్ సెల్ బ్యాటరీ ఇవ్వనుండగా, 80W వైర్డ్ ఫాస్ట్ ఛార్జింగ్, 50W వైర్‌లెస్ ఛార్జింగ్ సపోర్ట్ ఉండే అవకాశం ఉంది. ఇవన్నీ ఉన్నప్పటికీ ఫోన్ బరువు సుమారు 225 గ్రాములకే పరిమితం చేస్తారని లీకులు సూచిస్తున్నాయి.

ఇక రెండో ఫోల్డబుల్‌గా ఒప్పో ఫైండ్ N7 అభివృద్ధిలో ఉన్నట్టు సమాచారం. ఇది నేరుగా ఆపిల్ తొలి ఫోల్డబుల్ ఐఫోన్‌కు పోటీగా నిలవనుందని నివేదికలు చెబుతున్నాయి. ఈ మోడల్ సెప్టెంబర్‌లో విడుదలయ్యే అవకాశం ఉందని, అదే సమయంలో ఆపిల్ కూడా తన ఫోల్డబుల్ ఐఫోన్‌ను పరిచయం చేయవచ్చని టెక్ వర్గాల్లో చర్చ నడుస్తోంది. ఫైండ్ N6తో పోలిస్తే, ఫైండ్ N7 డిజైన్‌లో స్పష్టమైన తేడా ఉండనుంది. ఇది వెడల్పైన, బుక్-స్టైల్ ఫోల్డబుల్ డిజైన్‌తో వస్తుందని, ఒరిజినల్ ఒప్పో ఫైండ్ Nని గుర్తు చేసే ‘పాస్‌పోర్ట్ లాంటి' ఆస్పెక్ట్ రేషియోను కలిగి ఉంటుందని అంచనా. ఇదే డిజైన్ ఆపిల్ తన ఫోల్డబుల్ ఐఫోన్‌లో ఉపయోగించాలనుకుంటున్న కొలతలకు చాలా దగ్గరగా ఉంటుందని అంటున్నారు. ఫైండ్ N7 యొక్క పూర్తి స్పెసిఫికేషన్లు ఇంకా బయటకు రాలేదు కానీ, కెమెరా, బ్యాటరీ హార్డ్‌వేర్ పరంగా ఫైండ్ N6కి సమానమైన సెటప్ ఉండే అవకాశముందని సమాచారం.

ధరల విషయానికి వస్తే, ప్రస్తుతం ఒప్పో నుంచి అధికారికంగా ఎలాంటి ప్రకటన లేదు. అయితే గతంలో విడుదలైన ఒప్పో ఫైండ్ N5 చైనాలో 8,999 యువాన్‌లకు (భారత కరెన్సీలో సుమారు రూ. 1,15,000) లాంచ్ అయ్యింది. మరోవైపు ఆపిల్ ఫోల్డబుల్ ఐఫోన్ ధర అమెరికాలో $2,400కు మించి ఉండొచ్చని అంచనా వేస్తున్నారు, అంటే భారత కరెన్సీలో దాదాపు రూ. 2,15,000 వరకు వెళ్లే అవకాశం ఉంది.