బెజెల్స్ మాయం.. కెమెరా అమోఘం.. వన్ ప్లస్ 15T ఫీచర్స్ ఇవే..!

వన్‌ప్లస్ యూజర్లు ఎప్పుడెప్పుడా అని ఎదురుచూస్తున్న లేటెస్ట్ ఫ్లాగ్‌షిప్ కిల్లర్ వన్‌ప్లస్ 15T త్వరలోనే మార్కెట్‌లోకి గ్రాండ్‌గా ఎంట్రీ ఇవ్వబోతోంది. గత ఏడాది వచ్చిన వన్‌ప్లస్ 13Tకి సక్సెసర్‌గా వస్తున్న ఈ ఫోన్ గురించి వన్‌ప్లస్ చైనా ప్రెసిడెంట్ లి జీ లూయిస్ తాజాగా కొన్ని క్రేజీ అప్‌డేట్స్ ఇచ్చారు. ఈ కొత్త మోడల్ కేవలం పర్ఫార్మెన్స్ పరంగానే కాకుండా లుక్స్, డిజైన్ విషయంలో కూడా నెక్స్ట్ లెవల్ ఉండబోతోందని తెలుస్తోంది. ముఖ్యంగా ఈ ఫోన్‌లో వాడిన సరికొత్త కూలింగ్ టెక్నాలజీ,  భారీ బ్యాటరీ కెపాసిటీ టెక్ లవర్స్‌ని బాగా ఎట్రాక్ట్ చేస్తున్నాయి.

కెమెరా విషయానికి వస్తే ఈ ఫోన్‌లో సరికొత్త 'LUMO పెరిస్కోప్ టెలిఫోటో లెన్స్'ను పరిచయం చేస్తున్నారు. దూరంగా ఉన్న వస్తువులను కూడా అత్యంత క్లారిటీతో షూట్ చేయడానికి, అద్భుతమైన పోర్ట్రెయిట్ షాట్స్ తీయడానికి ఈ సెన్సార్ బాగా ఉపయోగపడుతుంది. రియర్ సైడ్ డ్యూయల్ కెమెరా సెటప్‌తో వస్తున్న ఈ ఫోన్‌లో 50 మెగాపిక్సెల్ సోనీ లైటియా 700 మెయిన్ సెన్సార్ ఉండబోతోంది. ఫోటోగ్రఫీ అంటే పిచ్చి ఉన్నవారికి ఓఐఎస్ సపోర్ట్‌తో వచ్చే ఈ కెమెరా సెటప్ ఒక విజువల్ ఫీస్ట్ లాగా అనిపిస్తుంది.

డిజైన్ పరంగా వన్‌ప్లస్ 15T ఒక సంచలనం అని చెప్పాలి. కేవలం 1.xx మిమీ మాత్రమే ఉండే అతి సన్నని బెజెల్స్‌తో ఇది వస్తోంది. ప్రపంచంలోనే అత్యంత తక్కువ బెజెల్స్ ఉన్న స్మాల్ స్క్రీన్ ఫోన్‌గా ఇది రికార్డు సృష్టించే అవకాశం ఉంది. 6.32 ఇంచుల కాంపాక్ట్ డిస్‌ప్లే ఉండటం వల్ల ఫోన్ పట్టుకోవడానికి చాలా స్లిమ్‌గా, లైట్ వెయిట్‌గా ఉంటుంది. చిన్న స్క్రీన్ ఇష్టపడే వారికి ఇది పర్ఫెక్ట్ ఛాయిస్ అవుతుంది. స్క్రీన్ క్వాలిటీ విషయంలో కూడా ఎక్కడా కాంప్రమైజ్ కాకుండా 1.5K రిజల్యూషన్, 120Hz నుంచి 165Hz రిఫ్రెష్ రేట్ ఉండే అవకాశం ఉంది.

ఈ ఫోన్ పర్ఫార్మెన్స్‌ను పీక్స్‌కి తీసుకెళ్లడానికి ఇందులో స్నాప్‌డ్రాగన్ 8 ఎలైట్ జెన్ 5 చిప్‌సెట్‌ను వాడుతున్నారు. 16GB వరకు ర్యామ్, 1TB వరకు ఇంటర్నల్ స్టోరేజ్ ఆప్షన్లు ఉండటం వల్ల గేమింగ్, మల్టీ టాస్కింగ్ చాలా స్మూత్‌గా సాగిపోతాయి. ఇంత పవర్ ఫుల్ ప్రాసెసర్‌ని హ్యాండిల్ చేయడానికి, ఫోన్ వేడెక్కకుండా ఉండటానికి అడ్వాన్స్‌డ్ హీట్ మేనేజ్‌మెంట్ సిస్టమ్ కూడా ఇందులో ఉంది. సాఫ్ట్‌వేర్ పరంగా లేటెస్ట్ ఆండ్రాయిడ్ వెర్షన్‌తో ఈ ఫోన్ బాక్స్‌లో వస్తుంది.

బ్యాటరీ విషయంలో వన్‌ప్లస్ ఈసారి పెద్ద సాహసమే చేస్తోంది. చిన్న ఫోన్ అయినప్పటికీ ఇందులో ఏకంగా 7,500mAh బ్యాటరీని అమర్చినట్లు సమాచారం. ఇతర స్మాల్ స్క్రీన్ ఫోన్లతో పోలిస్తే ఇది చాలా ఎక్కువ కాలం బ్యాకప్ ఇస్తుంది. దీనికి తోడు 100W ఫాస్ట్ వైర్డ్ ఛార్జింగ్,  వైర్‌లెస్ ఛార్జింగ్ సపోర్ట్ కూడా ఉండటంతో ఛార్జింగ్ టెన్షన్ అస్సలు ఉండదు. క్లౌడ్ ఇంక్ బ్లాక్, మార్నింగ్ మిస్ట్ గ్రే, పౌడర్ పింక్ వంటి అట్రాక్టివ్ కలర్స్‌లో ఈ ఫోన్ లాంచ్ కానుంది.

ధర విషయానికి వస్తే.. పాత మోడల్ వన్‌ప్లస్ 13T చైనాలో 3,399 యువాన్లకు (సుమారు రూ. 39,000) లాంచ్ అయింది. కానీ 15Tలో వాడిన హై-ఎండ్ ఫీచర్ల వల్ల దీని ధర కాస్త ఎక్కువగానే ఉండే అవకాశం ఉంది. భారత మార్కెట్లో ఈ ఫోన్ బేస్ వేరియంట్ ధర సుమారు రూ. 45,000 నుంచి రూ. 50,000 మధ్యలో ఉండవచ్చని అంచనా. ప్రీమియం ఫీచర్లు కోరుకునే వారికి, అది కూడా కాంపాక్ట్ సైజులో కావాలనుకునే వారికి ఈ వన్‌ప్లస్ 15T బెస్ట్ డీల్ అవుతుంది.