ఆసక్తికరమైన విషయం ఏంటంటే, 200MP HP2 సెన్సార్ ఇదే ఇప్పటికే Galaxy S25 Ultraలో కూడా ఉపయోగించారు.

Samsung తన రాబోయే ఫ్లాగ్‌షిప్ స్మార్ట్‌ఫోన్ Galaxy S26 Ultra కెమెరా సిస్టమ్‌పై ఇప్పటికే అనేక రూమర్లు టెక్ ప్రపంచంలో చక్కర్లు కొడుతున్నాయి. తాజాగా చైనా నుంచి వెలువడిన సమాచారం ప్రకారం, ఈసారి Samsung కెమెరా అనుభవాన్ని మరింత మెరుగుపరచేందుకు ప్రత్యేకంగా దృష్టి పెట్టినట్లు తెలుస్తోంది. గత మోడళ్లలో వినియోగదారులు ప్రస్తావించిన కొన్ని కీలక లోపాలను పరిష్కరించడమే లక్ష్యంగా కంపెనీ కొత్త మార్పులు తీసుకురానున్నట్టు ఈ లీకులు సూచిస్తున్నాయి. ఈ వివరాలను ప్రముఖ టిప్‌స్టర్ Ice Universe చైనీస్ సోషల్ మీడియా ప్లాట్‌ఫామ్ Weiboలో షేర్ చేశారు. ఆ పోస్ట్‌ను ఇంగ్లీష్‌లోకి అనువదించగా, Galaxy S26 Ultra కెమెరాలో లెన్స్ ఫ్లేర్ సమస్య గణనీయంగా తగ్గనుందని స్పష్టమైన సంకేతాలు కనిపిస్తున్నాయి. ఇప్పటివరకు విడుదలైన కొన్ని Galaxy Ultra సిరీస్ ఫోన్లలో, ముఖ్యంగా రాత్రి సమయంలో లేదా బలమైన లైట్స్ ఉన్న సందర్భాల్లో ఫోటోలు తీస్తే లెన్స్ ఫ్లేర్ ఎక్కువగా కనిపించేది.

ఈ విషయాన్ని చాలామంది వినియోగదారులు కూడా తమ అనుభవాల ద్వారా తెలియజేశారు.ఈ సమస్యకు శాశ్వత పరిష్కారంగా, Samsung ఈసారి మెరుగైన లెన్స్ డిజైన్‌తో పాటు కొత్త కోటింగ్ టెక్నాలజీని ఉపయోగించనుందని సమాచారం. అంతేకాదు, ఫోటోలలో స్కిన్ టోన్స్ సహజంగా కనిపించకుండా పసుపు రంగు వైపు మారే సమస్య కూడా ఇకపై ఉండదని టిప్‌స్టర్ పేర్కొన్నారు. ఇది నిజమైతే, పోర్ట్రైట్ ఫోటోగ్రఫీ మరియు రోజువారీ ఫోటోల నాణ్యతలో స్పష్టమైన మెరుగుదల కనిపించే అవకాశం ఉంది.

ఇప్పటివరకు వచ్చిన ఇతర రూమర్ల ప్రకారం, Galaxy S26 Ultra ముందు భాగంలో 12MP సెల్ఫీ కెమెరా ఇవ్వవచ్చు. దీనిలో Sony IMX874 సెన్సార్ ఉపయోగించే అవకాశముందని తెలుస్తోంది. వెనుకవైపు మాత్రం Samsung తన సంప్రదాయ క్వాడ్ కెమెరా సెటప్ను కొనసాగించనుంది. ఇందులో ప్రధానంగా 200MP ప్రైమరీ కెమెరా (ISOCELL HP2), 50MP అల్ట్రావైడ్ కెమెరా (Samsung JN3), 50MP పెరిస్కోప్ టెలిఫోటో కెమెరా (Sony IMX854), అలాగే 12MP టెలిఫోటో కెమెరా (Samsung S5K3LD) ఉండవచ్చని సమాచారం.

ఇక్కడ ఆసక్తికరమైన విషయం ఏమిటంటే, 200MP HP2 సెన్సార్ ఇప్పటికే Galaxy S25 Ultraలో కూడా ఉపయోగించారు. అయితే ఆ మోడల్‌లో ప్రైమరీ కెమెరా f/1.7 అపర్చర్తో వచ్చింది. ఇప్పుడు Galaxy S26 Ultraలో అదే సెన్సార్‌ను కొనసాగించినప్పటికీ, అపర్చర్‌ను మరింత పెంచి f/1.4గా మార్చే అవకాశముందని రూమర్లు చెబుతున్నాయి. అపర్చర్ పెద్దదిగా ఉండటం వల్ల తక్కువ వెలుతురులో కూడా ఎక్కువ లైట్ కెమెరాలోకి ప్రవేశించి, బ్రైటర్ ఫోటోలు, మెరుగైన డెప్త్, సహజమైన లైటింగ్ అందే అవకాశం ఉంటుంది.

మొత్తంగా చూస్తే, Galaxy S26 Ultraలో Samsung కెమెరాపై ఈసారి మరింత గట్టిగా ఫోకస్ పెట్టినట్లు ఈ లీకులు సూచిస్తున్నాయి. లెన్స్ ఫ్లేర్ తగ్గించడం, స్కిన్ టోన్ ఖచ్చితత్వాన్ని మెరుగుపరచడం, అలాగే హార్డ్‌వేర్ స్థాయిలో కీలక మార్పులు తీసుకురావడం అన్నీ నిజమైతే, ఫోటోగ్రఫీపై ఆసక్తి ఉన్న వినియోగదారులకు Galaxy S26 Ultra ఒక పెద్ద అప్‌గ్రేడ్‌గా నిలిచే అవకాశముంది.