వన్‌ప్లస్ సంచలనం.. ప్రపంచంలోనే మొదటి 165Hz రిఫ్రెష్ రేట్ ఫోన్.. స్పెసిఫికేషన్స్ చూస్తే మైండ్ బ్లాకే..!

వన్‌ప్లస్ అభిమానులకు అదిరిపోయే అప్‌డేట్ వచ్చేసింది. ఇప్పటికే వన్‌ప్లస్ 15, 15ఆర్ మోడళ్లతో మార్కెట్‌లో సెన్సేషన్ క్రియేట్ చేసిన ఈ కంపెనీ, ఇప్పుడు తన పోర్ట్‌ఫోలియోలోకి OnePlus 15Tని చేర్చడానికి సిద్ధమైంది. చైనాలో త్వరలోనే లాంచ్ కానున్న ఈ స్మార్ట్‌ఫోన్ గురించి తాజాగా కొన్ని కీలక వివరాలు లీక్ అయ్యాయి. ఇది కేవలం ఒక సాధారణ అప్‌డేట్ మాత్రమే కాదు, పర్ఫార్మెన్స్ విషయంలో సరికొత్త రికార్డులు సృష్టించేలా కనిపిస్తోంది. ముఖ్యంగా కాంపాక్ట్ సైజులో ఉంటూనే హై-ఎండ్ ఫీచర్లను కోరుకునే యూజర్ల కోసం దీన్ని ప్రత్యేకంగా డిజైన్ చేసినట్లు తెలుస్తోంది. వన్‌ప్లస్ చైనా ప్రెసిడెంట్ లూయిస్ లీ జీ కూడా ఈ ఫోన్ గురించి కొన్ని ఆసక్తికరమైన విషయాలను అధికారికంగా ధృవీకరించారు.

డిస్‌ప్లే విభాగంలో వన్‌ప్లస్ 15టీ సరికొత్త చరిత్ర సృష్టించబోతోంది. ప్రముఖ టిప్‌స్టర్ డిజిటల్ చాట్ స్టేషన్ ప్రకారం, ఈ ఫోన్ 1.5K రెజల్యూషన్ కలిగిన స్క్రీన్‌తో రానుంది. దీని ప్రత్యేకత ఏమిటంటే, ఇందులో 165Hz అల్ట్రా-హై రిఫ్రెష్ రేట్ సపోర్ట్ ఉంటుంది. సాధారణంగా పెద్ద స్క్రీన్ ఉన్న ఫ్లాగ్‌షిప్ ఫోన్లు కూడా 144Hz కే పరిమితమవుతుంటే, చిన్న స్క్రీన్ విభాగంలో ఇంతటి భారీ రిఫ్రెష్ రేట్‌ను ఆఫర్ చేస్తున్న ఏకైక ఫోన్ ఇదే కావడం విశేషం. దీనివల్ల ఫోన్ వాడేటప్పుడు చాలా స్మూత్ ఎక్స్‌పీరియన్స్ లభిస్తుంది. ముఖ్యంగా గేమర్లకు ఇదొక గొప్ప వరమని చెప్పాలి.

గేమింగ్ ప్రియులను టార్గెట్ చేస్తూ వన్‌ప్లస్ ఈసారి ప్రత్యేక శ్రద్ధ పెట్టింది. 165Hz రిఫ్రెష్ రేట్ కేవలం నంబర్లకు మాత్రమే పరిమితం కాకుండా, రియల్ టైమ్ గేమింగ్‌లో కూడా అద్భుతాలు చేయనుంది. పబ్జీ మొబైల్, కాల్ ఆఫ్ డ్యూటీ, లీగ్ ఆఫ్ లెజెండ్స్ వంటి పాపులర్ గేమ్‌లను ఈ ఫోన్‌లో 165fps  స్పీడ్‌తో ఆడుకోవచ్చు. మార్కెట్‌లోని ఇతర కాంపాక్ట్ ఫ్లాగ్‌షిప్ ఫోన్లు 120fps వద్దే ఆగిపోతుంటే, వన్‌ప్లస్ 15టీ మాత్రం అంతకుమించి పర్ఫార్మెన్స్ ఇచ్చేలా ఉంది. వాలరెంట్ మొబైల్ వంటి గేమ్‌లలో కూడా 144fps వరకు సపోర్ట్ ఉంటుందని సమాచారం.

చాలామంది యూజర్లు పెద్ద స్క్రీన్ల కంటే చేతిలో కంఫర్టబుల్‌గా ఉండే చిన్న స్క్రీన్ ఫోన్లనే ఇష్టపడతారు. వారి కోసమే వన్‌ప్లస్ 15టీలో 6.32-అంగుళాల ఫ్లాట్ డిస్‌ప్లేను అందిస్తున్నారు. ఇది చూడటానికి చాలా క్లాసీగా ఉండటమే కాకుండా, ఫోన్ చుట్టూ ఉండే బెజెల్స్ చాలా సన్నగా ఉంటాయని కంపెనీ వెల్లడించింది. దీనివల్ల ఫోన్ ఫ్రంట్ లుక్ చాలా బాగుంటుంది. పట్టుకోవడానికి వీలుగా ఉండే 'గోల్డ్ ఆర్ యాంగిల్' డిజైన్‌ను ఇందులో వాడుతున్నారు. చిన్న ఫోన్ కావాలనుకుంటూనే అత్యుత్తమ ఫీచర్లు ఆశించే వారికి ఇది పర్ఫెక్ట్ ఛాయిస్ కానుంది.

ఫోన్ సైజు చిన్నగా ఉన్నప్పటికీ, బ్యాటరీ విషయంలో వన్‌ప్లస్ అస్సలు తగ్గలేదు. ఇందులో ఏకంగా 7500mAh 'గ్లేసియర్ బ్యాటరీ'ని అమర్చబోతున్నారు. ప్రస్తుతం మార్కెట్‌లో ఉన్న పెద్ద సైజు ఫ్లాగ్‌షిప్ ఫోన్లలో కూడా ఇంత పెద్ద బ్యాటరీ ఉండటం అరుదు. దీనికి తోడు 100W సూపర్ ఫ్లాష్ ఛార్జింగ్ సపోర్ట్ ఉండటం వల్ల ఫోన్ చాలా వేగంగా ఛార్జ్ అవుతుంది. అలాగే బైపాస్ ఛార్జింగ్ సదుపాయం కూడా ఉంది, ఇది గేమింగ్ చేసేటప్పుడు ఫోన్ వేడెక్కకుండా బ్యాటరీకి నేరుగా పవర్ అందిస్తుంది. 50W వైర్‌లెస్ ఛార్జింగ్ ఫీచర్ కూడా ఇందులో ఉండబోతోంది.

ఫోటోగ్రఫీ విషయానికి వస్తే, ఇందులో అప్‌గ్రేడెడ్ లూమో పెరిస్కోప్ టెలిఫోటో కెమెరాను వాడుతున్నారు. కెమెరా మాడ్యూల్ పెద్దగా ఉబ్బి ఉండకుండా, స్లిమ్ డిజైన్‌లోనే అద్భుతమైన జూమింగ్ సామర్థ్యాన్ని ఇది అందిస్తుంది. భద్రత కోసం 3D అల్ట్రాసోనిక్ ఫింగర్ ప్రింట్ సెన్సార్‌ను ఇచ్చారు, ఇది తడి వేళ్లతో కూడా వేగంగా అన్‌లాక్ అవుతుంది. ఇక మ్యాగ్నెటిక్ యాక్సెసరీస్ కోసం ప్రత్యేక సపోర్ట్ ఉండటం వల్ల యాపిల్ ఫోన్ల లాగా మ్యాగ్నెటిక్ ఛార్జర్లు, కేస్‌లను వాడుకోవచ్చు. ఐపీ69 రేటింగ్ ఉండటం వల్ల ఈ ఫోన్‌కు నీరు, దుమ్ము నుంచి గట్టి రక్షణ లభిస్తుంది. సోమవారం రోజున ఈ ఫోన్ డిజైన్‌ను అధికారికంగా రివీల్ చేయనున్నారు.