రియల్‌మీ సంచలనం.. రూ.13,499కే 144Hz డిస్‌ప్లే.. భారీ బ్యాటరీ.. ఫీచర్లు చూస్తే ఫిదా..!

రియల్‌మీ తన సీ-సిరీస్‌లో భాగంగా సరికొత్త 'రియల్‌మీ C83 5G' స్మార్ట్‌ఫోన్‌ను భారత మార్కెట్లోకి గ్రాండ్‌గా లాంచ్ చేసింది. బడ్జెట్ ధరలో ప్రీమియం ఫీచర్లను కోరుకునే యువతను టార్గెట్ చేస్తూ వచ్చిన ఈ ఫోన్, త్వరలోనే ప్రముఖ ఇ-కామర్స్ సైట్ ఫ్లిప్‌కార్ట్‌తో పాటు కంపెనీ అధికారిక వెబ్‌సైట్‌లో అందుబాటులోకి రానుంది. స్టైలిష్ లుక్‌తో ఆకట్టుకుంటున్న ఈ ఫోన్ బ్లూమింగ్ పర్పుల్,  స్ప్రౌటింగ్ గ్రీన్ అనే రెండు అదిరిపోయే కలర్ ఆప్షన్లలో దొరుకుతుంది. ముఖ్యంగా ఈ ఫోన్‌లో ఉన్న భారీ బ్యాటరీ, డిస్‌ప్లే ఫీచర్లు ఈ సెగ్మెంట్‌లో కొత్త ట్రెండ్ సెట్ చేస్తాయని కంపెనీ భావిస్తోంది.

ధరల విషయానికి వస్తే, రియల్‌మీ C83 5G బేస్ వేరియంట్ (4GB+64GB) ధర రూ. 13,499గా ఉంది. అలాగే 4GB+128GB మోడల్ రూ. 14,499కి, హై-ఎండ్ వేరియంట్ అయిన 6GB+128GB మోడల్ రూ. 17,499కి లభిస్తాయి. కస్టమర్ల సౌకర్యార్థం ఆరు నెలల వరకు వడ్డీ లేని నో-కాస్ట్ ఈఎంఐ ఆప్షన్లను కూడా రియల్‌మీ అందిస్తోంది. ఈ స్మార్ట్‌ఫోన్ సేల్ మార్చి 7వ తేదీ మధ్యాహ్నం 12 గంటల నుండి ప్రారంభం కానుంది. బడ్జెట్ ఫ్రెండ్లీ ధరలో 5G కనెక్టివిటీ కోరుకునే వారికి ఇది ఒక మంచి ఆప్షన్ అని చెప్పవచ్చు.

ఈ ఫోన్ ఆండ్రాయిడ్ 16 ఆధారిత రియల్‌మీ UI 7.0 సాఫ్ట్‌వేర్‌పై నడుస్తుంది. ఇందులో 6.8 అంగుళాల HD+ LCD స్క్రీన్‌ను అందించారు. ఈ డిస్‌ప్లే ప్రత్యేకత ఏంటంటే, ఇందులో 144Hz రిఫ్రెష్ రేట్ ఉంటుంది, ఇది గేమింగ్, వీడియోలు చూసేటప్పుడు చాలా స్మూత్ ఎక్స్‌పీరియన్స్ ఇస్తుంది. అలాగే 900 నిట్స్ పీక్ బ్రైట్‌నెస్ వల్ల ఎండలో కూడా స్క్రీన్ స్పష్టంగా కనిపిస్తుంది. 180Hz టచ్ శాంప్లింగ్ రేట్ ఉండటం వల్ల ఫోన్ టచ్ రెస్పాన్స్ కూడా చాలా వేగంగా ఉంటుంది.

పెర్ఫార్మెన్స్ పరంగా చూస్తే, ఇందులో శక్తివంతమైన మీడియాటెక్ డైమెన్సిటీ 6300 ఆక్టా-కోర్ చిప్‌సెట్‌ను ఉపయోగించారు. ఇది 6nm ప్రాసెస్‌పై తయారవ్వడం వల్ల ఫోన్ వేగంగా పనిచేయడమే కాకుండా తక్కువ బ్యాటరీని వినియోగిస్తుంది. గ్రాఫిక్స్ కోసం ARM Mali-G57 MC2 GPUని జోడించారు. ఇందులో 6GB వరకు LPDDR4x ర్యామ్, 128GB వరకు ఇంటర్నల్ స్టోరేజ్ ఉంటుంది. మల్టీ టాస్కింగ్ చేసే వారికి, సోషల్ మీడియా యాప్స్ ఎక్కువగా వాడే వారికి ఈ ప్రాసెసర్ మంచి పవర్ ఇస్తుంది.

కెమెరాల విషయానికి వస్తే, రియల్‌మీ ఈ ఫోన్‌లో సింపుల్‌గా ఒకే వెనుక కెమెరాను ఇచ్చింది. ఇది 13 మెగాపిక్సెల్ షూటర్, దీని ద్వారా పగటిపూట మంచి క్వాలిటీ ఫోటోలు తీసుకోవచ్చు. సెల్ఫీల కోసం ముందు భాగంలో 5 మెగాపిక్సెల్ కెమెరా ఉంది. రెండు కెమెరాల ద్వారా కూడా 1080p క్వాలిటీతో వీడియోలు రికార్డ్ చేసుకునే సౌకర్యం ఉంది. నేటి జనరేషన్ రీల్స్ మరియు షార్ట్ వీడియోల కోసం ఈ కెమెరా సెటప్ ప్రాథమిక అవసరాలను తీరుస్తుంది.

ఈ ఫోన్ యొక్క హైలైట్ ఫీచర్ దాని 7,000mAh భారీ టైటాన్ బ్యాటరీ. ఒక్కసారి ఛార్జ్ చేస్తే రెండు రోజుల పాటు నిరంతరాయంగా వాడుకోవచ్చు. దీనికి సపోర్ట్‌గా 15W వైర్డ్ ఛార్జింగ్ సదుపాయం ఉంది. కనెక్టివిటీ కోసం 5G, 4G LTE, USB టైప్-సి పోర్ట్,  3.5mm ఆడియో జాక్ వంటి అన్ని ఫీచర్లు ఉన్నాయి. ఈ ఫోన్ బరువు సుమారు 212 గ్రాములు ఉండి, పట్టుకోవడానికి సౌకర్యవంతంగా ఉంటుంది. మొత్తం మీద తక్కువ ధరలో భారీ బ్యాటరీ, వేగవంతమైన డిస్‌ప్లే కావాలనుకునే వారికి రియల్‌మీ C83 5G బెస్ట్ ఛాయిస్.