iPhone 17: యాపిల్ లవర్స్‎కు ఊహించని షాక్.. ఆకాశాన్ని తాకనున్న ఐఫోన్ 17 ధరలు

iPhone 17: మీరు ఐఫోన్ 17 కొనుగోలు చేయాలని ప్లాన్ చేస్తున్నట్లయితే ఇది మీకు అత్యంత ముఖ్యమైన వార్త. యాపిల్ కంపెనీ తన ప్రస్తుత మోడల్ ఐఫోన్ 17 ధరలను త్వరలోనే పెంచే అవకాశం ఉన్నట్లు నివేదికలు సూచిస్తున్నాయి. సోషల్ మీడియాలో లీకైన సమాచారం ప్రకారం.. సోమవారం అంటే ఆగస్టు 10 నుంచే ఈ ధరల పెంపు అమలులోకి రావచ్చని ప్రచారం జరుగుతోంది. అయితే ఈ సమాచారం ఇంకా అధికారికంగా ధ్రువీకరించలేదు. ఈ లీక్ అందించిన సోర్స్ కూడా దీనిపై పూర్తి నమ్మకాన్ని వ్యక్తం చేయలేదు.

లీకర్ అందించిన సమాచారం 
వెయిబోలో ప్రముఖ లీకర్‌గా పేరుగాంచిన ఫిక్స్‌డ్ ఫోకస్ డిజిటల్ ఈ ధరల పెంపు వార్తను తెరపైకి తెచ్చింది. టిప్‌స్టర్ తెలిపిన వివరాల ప్రకారం ధరల పెంపు తక్షణమే వర్తించే అవకాశం ఉందని భావిస్తున్నప్పటికీ, యాపిల్ నుంచి ఎలాంటి అధికారిక ప్రకటనగానీ, లీకర్ ఆధారంగా చూపించిన కచ్చితమైన సోర్స్ వివరాలుగానీ బయటకు రాలేదు. కాబట్టి కంపెనీ వెంటనే ఈ నిర్ణయం అమలు చేస్తుందా లేదా అనేది వేచి చూడాలి.

వచ్చే నెలలో కొత్త సిరీస్ లాంచ్ 
ఈ లీక్ వచ్చిన సమయం చాలా ప్రాధాన్యతను సంతరించుకుంది. ఎందుకంటే యాపిల్ వచ్చే నెలలోనే తన కొత్త ఐఫోన్ లైన్అప్‌ను మార్కెట్‌కి పరిచయం చేయడానికి సిద్ధమవుతోంది. ఈసారి కొత్త సిరీస్ మోడల్స్ అన్నీ ఒకేసారి కాకుండా దశలవారీగా మార్కెట్లోకి వచ్చే అవకాశం ఉందని వార్తలు వస్తున్నాయి. ఇటువంటి పరిస్థితిలో ప్రస్తుత ఐఫోన్ 17 అమ్మకాలు సాధారణ సమయం కంటే మరికొంత కాలం ఎక్కువగానే కొనసాగే అవకాశం ఉంది.

Flipkart Freedom Sale 2026:  ఫ్రీడమ్ సేల్ ధమాకా.. ఎల్‌జీ, శాంసంగ్, సోనీ స్మార్ట్ టీవీలపై బంపర్ ఆఫర్లు

ఇతర హార్డ్‌వేర్ ప్రొడక్ట్స్ ధరలు ఇప్పటికే పెంపు 
యాపిల్ కంపెనీ ఈ ఏడాది ఇప్పటికే పలు ఉత్పత్తుల ధరలను పెంచిన సంగతి తెలిసిందే. గత జూన్ నెలలో మ్యాక్, ఐప్యాడ్ వంటి ప్రధాన హార్డ్‌వేర్ ఉత్పత్తుల రేట్లను కంపెనీ భారీగా సవరించింది. కొన్ని మోడళ్లపై ఈ పెంపు ఏకంగా రూ.లక్ష వరకు చేరింది. అయితే ఆ సమయంలో ఐఫోన్‌లు, యాపిల్ వాచ్‌లు, ఎయిర్‌పాడ్స్ ఉత్పత్తులను ఈ పెంపు నుంచి మినహాయించారు.

ధరలు పెరగడానికి కారణాలు ఏమిటి?
ప్రస్తుతం ఐఫోన్ 17 ధర పెరగడానికి ప్రధానంగా టెక్ పరిశ్రమలో పెరుగుతున్న మెమొరీ, స్టోరేజ్ కాంపోనెంట్స్ ధరలే కారణమని భావిస్తున్నారు. స్మార్ట్‌ఫోన్ తయారీకి ఉపయోగించే ముడి సరుకుల ఖర్చులు పెరగడంతో ప్రముఖ టెక్ కంపెనీలపై భారం పడుతోంది. అయితే ఐఫోన్ 17 ధరల సవరణపై యాపిల్ కంపెనీ నుంచి ఇంకా ఎటువంటి అధికారిక ముగింపు ప్రకటన రాలేదు.