80th Independence Day: 80వ స్వాతంత్ర్య వేడుకల్లో వందేమాతరం 150 ఏళ్ల పండగ.. ప్రత్యక్ష ప్రసారం ఎక్కడ చూడాలంటే?

80th Independence Day: భారతదేశం తన 80వ స్వాతంత్ర్య దినోత్సవాన్ని ఎంతో ఘనంగా జరుపుకుంటోంది. ఎర్రకోట వేదికగా ప్రధాని నరేంద్ర మోదీ త్రివర్ణ పతాకాన్ని ఎగురవేసి జాతిని ఉద్దేశించి ప్రసంగించనున్నారు. జాతీయ గీతం వందేమాతరం 150 ఏళ్ల సుదీర్ఘ ప్రయాణాన్ని పురస్కరించుకుని ఈసారి ఎర్రకోటపై ప్రత్యేకంగా ఆలాపన కార్యక్రమం నిర్వహించడం చారిత్రాత్మక విశేషంగా నిలవనుంది. 2047 నాటికి వికసిత్ భారత్ సాధనలో యువశక్తి పాత్రపై ఈ సందర్భంగా ప్రధానంగా చర్చ జరగనుంది.

ఎర్రకోటపై వందేమాతరం వేడుకల ప్రత్యేకత 
లాల్ కిలా వేదికగా స్వాతంత్ర్య దినోత్సవ వేడుకల చరిత్రలో మొదటిసారిగా 'వందేమాతరం' ప్రత్యేక ఆలాపన జరగడం గమనార్హం. ప్రెస్ ఇన్ఫర్మేషన్ బ్యూరో (PIB) సమాచారం ప్రకారం జాతీయ గేయం ఆవిర్భవించి 150 ఏళ్లు పూర్తయిన సందర్భాన్ని పురస్కరించుకుని ఈ నిర్ణయం తీసుకున్నారు. ప్రధానమంత్రి జాతీయ జెండాను ఆవిష్కరించిన వెంటనే 21 తుపాకుల సెల్యూట్ ఇస్తారు. ఆ సమయంలోనే భారత వైమానిక దళ హెలికాప్టర్ల నుంచి గులాబీ రేకుల వర్షం కురిపించనున్నారు.

యూత్ పవర్.. వికసిత్ భారత్ స్వప్నం 
జాతీయ జెండా ఆవిష్కరణ అనంతరం ప్రధాని నరేంద్ర మోదీ జాతిని ఉద్దేశించి ప్రసంగిస్తారు. దేశాభివృద్ధిలో యువత పాత్ర, 2047 నాటికి భారతదేశాన్ని అగ్రరాజ్యంగా తీర్చిదిద్దే ప్రణాళికలను తన ప్రసంగంలో వివరించనున్నారు. ప్రసంగం ముగిసిన తర్వాత ఎన్‌సిసి (NCC) కేడెట్లు, మై భారత్ వాలంటీర్లు కలిసి బృందంగా వందేమాతరం గీతాన్ని ఆలపిస్తారు. ఈ అరుదైన దృశ్యం దేశప్రజల్లో నూతన ఉత్సాహాన్ని నింపనుంది.

iQOO 16: ఐకూ లవర్స్‌కు మైండ్ బ్లాకింగ్ న్యూస్.. 8,500 mAh బ్యాటరీతో ఐకూ 16..కళ్లు చెదిరే ఫీచర్లు

వేడుకలను లైవ్‌లో ఎక్కడ, ఎలా చూడాలి?
ఢిల్లీ ఎర్రకోట వేదికగా జరిగే ఈ మువ్వన్నెల పండగను ఇంట్లోనే కూర్చుని టీవీలు, మొబైళ్లలో ప్రత్యక్ష ప్రసారం ద్వారా ఉచితంగా చూడవచ్చు. ఉదయం 6:30 గంటల నుంచి డిడి నేషనల్, డిడి న్యూస్ ఛానెళ్లలో ప్రత్యక్ష ప్రసారం ప్రారంభమవుతుంది. డిజిటల్ ప్లాట్‌ఫామ్‌లలో చూడాలనుకునే వారు దూర్‌దర్శన్ అధికారిక యూట్యూబ్ ఛానెల్‌లో ఉచితంగా లైవ్ స్ట్రీమింగ్ చూడవచ్చు. ప్రసార భారతికి చెందిన వేవ్స్ యాప్‌లో కూడా వేడుకలను ఉచితంగా తిలకించే వెసులుబాటు ఉంది.