Google Play Store : గూగుల్ ప్లే స్టోర్‌ రూల్స్ మారాయి.. ఇకపై ఏ యాప్ వాడాలన్నా ఏజ్ వెరిఫికేషన్ తప్పనిసరి

Google Play Store  : టెక్ దిగ్గజం గూగుల్ తన ఆండ్రాయిడ్ యూజర్ల కోసం ఒక కీలక నిర్ణయం తీసుకుంది. గూగుల్ ప్లే స్టోర్‌లోని యాప్‌లలో ఏజ్ వెరిఫికేషన్ సిస్టమ్‌ను అంతర్జాతీయ స్థాయిలో అమలు చేయనున్నట్లు ప్రకటించింది. వివిధ దేశాల ప్రభుత్వాల నుంచి, రెగ్యులేటరీ సంస్థల నుంచి వస్తున్న తీవ్ర ఒత్తిడి, నిబంధనల నేపథ్యంలోని గూగుల్ ఈ నిర్ణయం తీసుకుంది. గతంలో ఆపిల్ సంస్థ తన యాప్ స్టోర్‌లో ఈ రకమైన ఫీచర్‌ను ప్రవేశపెట్టగా, ఇప్పుడు గూగుల్ కూడా ప్రపంచవ్యాప్తంగా దీనిని ప్లే స్టోర్‌లో రోల్‌అవుట్ చేయడానికి సిద్ధమైంది. దీనివల్ల ప్రపంచంలో ఏ మూలన ఉన్న యూజర్ అయినా సరే యాప్‌లను యాక్సెస్ చేసే ముందు ఏజ్ వెరిఫికేషన్ ప్రక్రియను పూర్తి చేయాల్సి ఉంటుంది.

ఏమిటీ ప్లే ఏజ్ సిగ్నల్ API ?
యూజర్ల వయస్సును నిర్ధారించడానికి గూగుల్ ప్లే ఏజ్ సిగ్నల్ API అనే ప్రత్యేక వ్యవస్థను అందుబాటులోకి తెస్తోంది. గూగుల్ అధికారిక బ్లాగ్ పోస్ట్ ప్రకారం, ఈ సిస్టమ్ యూజర్ల వ్యక్తిగత వివరాలను లేదా నిబంధనలను అతిక్రమించకుండా, ప్రైవసీకి పూర్తి భద్రతనిస్తూ వారి వయస్సు పరిమితిని డెవలపర్లు తెలుసుకునేలా చేస్తుంది. 2026 చివరి నాటికి అమెరికా మార్కెట్‌తో సహా ప్రపంచంలోని అన్ని దేశాలలో ఈ సిస్టమ్ పూర్తి స్థాయిలో అందుబాటులోకి రానుంది.

 Photo Credit: Google

ఐడీ, సెల్ఫీ వెరిఫికేషన్ అవసరం లేదు 
సాధారణంగా ఏజ్ వెరిఫికేషన్ అనగానే ప్రభుత్వం జారీ చేసిన ఐడీ కార్డులు లేదా సెల్ఫీలు అప్‌లోడ్ చేయాల్సి వస్తుందని భయపడుతుంటారు. అయితే, గూగుల్ గతేడాది బీటా వర్షన్‌లో లాంచ్ చేసిన ఈ ప్లే ఏజ్ సిగ్నల్ APIలో ఎలాంటి ఐడీ లేదా సెల్ఫీ వెరిఫికేషన్ అవసరం ఉండదు. ఇది గూగుల్‌కు చెందిన ఫ్యామిలీ లింక్ యాప్‌తో అనుసంధానమై పనిచేస్తుంది. దీని ద్వారా తల్లిదండ్రులు తమ పిల్లలకు సంబంధించిన వయస్సు పరిమితిని ముందే సెట్ చేసుకోవచ్చు. ఈ ఏడాది ఆగస్టు మధ్యనాటికి ఆస్ట్రేలియా, కెనడాల్లో ఈ ఫీచర్ అందుబాటులోకి రాగా ఏడాది ఆఖరు నాటికి ఇతర అన్ని దేశాలకు విస్తరిస్తుంది.

పిల్లల భద్రతే ప్రధాన లక్ష్యం 
ప్రపంచవ్యాప్తంగా ఉన్న రెగ్యులేటరీ సంస్థలు స్మార్ట్‌ఫోన్ యాప్‌లలో మైనర్లు, చిన్నారుల భద్రతపై తీవ్ర ఆందోళన వ్యక్తం చేస్తున్నాయి. చిన్నారులకు సరిపడని కంటెంట్ లేదా యాప్‌లు అందుబాటులో లేకుండా ఉండేందుకు కఠినమైన నిబంధనలు తీసుకొస్తున్నాయి. ఫిబ్రవరిలో ఆపిల్ తన ఏజ్ వెరిఫికేషన్ టూల్స్ లాంచ్ చేయగా, గూగుల్ కూడా అదే బాటలో నడిచింది. యూజర్ల ఖచ్చితమైన పుట్టిన తేదీ లేదా ప్రైవేట్ సమాచారాన్ని సేకరించకుండానే, తల్లిదండ్రులు నేరుగా యాప్‌లతో తమ పిల్లల ఏజ్ రేంజ్‌ను షేర్ చేసుకునే వెసులుబాటును ఈ టెక్నాలజీ కల్పిస్తుంది.