iQOO Z11 : భారత్‌లోకి ఐకూ Z11 గ్రాండ్ ఎంట్రీ.. ఆగస్టు 20న లాంచ్ కాబోతున్న పవర్‌ఫుల్ 5G ఫోన్

iQOO Z11 : ప్రసిద్ధ స్మార్ట్‌ఫోన్ తయారీ సంస్థ వీవో సబ్-బ్రాండ్ అయిన  iQOO భారత మార్కెట్లోకి సరికొత్త స్మార్ట్‌ఫోన్‌ను తీసుకొచ్చేందుకు సిద్ధమైంది ఐకూ Z11 పేరుతో వస్తున్న ఈ ఫోన్‌కు సంబంధించిన కీలక వివరాలను కంపెనీ అధికారికంగా వెల్లడించింది. సోషల్ మీడియా వేదికగా విడుదల చేసిన టీజర్‌లో ఈ స్మార్ట్‌ఫోన్ ఆగస్టు 20న భారతదేశంలో అధికారికంగా లాంచ్ కానున్నట్లు తెలిపింది. ప్రముఖ ఈ-కామర్స్ దిగ్గజం అమెజాన్ ద్వారా ఈ ఫోన్ విక్రయానికి రానుంది. ఈ సిరీస్‌లోనే గత నెలలో ఐకూ Z11 లైట్ మోడల్‌ను కంపెనీ విడుదల చేసిన సంగతి తెలిసిందే.

ఇండియాలోనే ఫస్ట్ మీడియాటెక్ డైమెన్సిటీ 7500 టర్బో ప్రాసెసర్ 
భారత మార్కెట్లో విడుదలయ్యే ఐకూ Z11  మోడల్ కొన్ని ప్రత్యేక మార్పులతో రానుంది. ఈ స్మార్ట్‌ఫోన్‌లో మీడియాటెక్ డైమెన్సిటీ 7500 టర్బో ప్రాసెసర్‌ను ఉపయోగించనున్నారు. ఈ పవర్‌ఫుల్ చిప్‌సెట్‌తో భారతదేశంలో లాంచ్ కాబోతున్న మొదటి స్మార్ట్‌ఫోన్ ఇదే కావడం విశేషం. చైనా వేరియంట్‌లో డైమెన్సిటీ 8500 చిప్‌సెట్ ఇవ్వగా, ఇండియన్ వేరియంట్‌లో మాత్రం మీడియాటెక్ 7500 టర్బో అందించనున్నారు. భారతీయ వినియోగదారుల కోసం ఈ ఫోన్‌ను ఆరోరా గ్రీన్, సెలెస్టియల్ బ్లూ అనే రెండు ఆకర్షణీయమైన రంగుల్లో అందుబాటులోకి తేనున్నారు.

సరికొత్త పిల్-షేప్ కెమెరా డిజైన్, లుక్స్ 
ఐకూ Z11  ఇండియన్ వేరియంట్ డిజైన్ పరంగా చాలా కొత్తగా కనిపించనుంది. దీని వెనుక భాగంలో హారిజాంటల్ పిల్-షేప్ డ్యూయల్ రియర్ కెమెరా మోడ్యూల్‌ను అందించారు. చైనీస్ వేరియంట్‌లో స్క్వేర్-షేప్ కెమెరా ఐలాండ్ ఉండగా, ఇండియన్ వెర్షన్‌లో ఈ మార్పు చేశారు. ఈ ఫోన్ 3D కర్వ్‌డ్ డిస్‌ప్లే, కర్వ్‌డ్ రియర్ ప్యానెల్‌తో అత్యంత ప్రీమియం లుక్‌ను ఇస్తుంది. ఫోన్ పైన స్పీకర్ గ్రిల్, మైక్రోఫోన్ ఉండగా, కుడి వైపున పవర్ బటన్, వాల్యూమ్ బటన్స్ ఉన్నాయి. ఈ హ్యాండ్‌సెట్ కేవలం 7.99 mm మందం, సుమారు 199 గ్రాముల బరువుతో స్లిమ్‌గా ఉంటుంది.

Flipkart Freedom Sale: ఫ్లిప్‌కార్ట్ ఫ్రీడమ్ సేల్‌లో ఊహించని ధమాకా.. ఐఫోన్ 17 పై భారీ డిస్కౌంట్

చైనా వేరియంట్ స్పెసిఫికేషన్లు, బ్యాటరీ వివరాలు 
చైనాలో ఇటీవల విడుదలైన ఐకూ Z11 మోడల్‌లో 6.83-ఇంచుల AMOLED డిస్‌ప్లేను అందించారు. ఇది 165Hz రిఫ్రెష్ రేట్, 1260x2800 పిక్సెల్స్ రెసల్యూషన్, HDR సపోర్ట్‌ను కలిగి ఉంది. ఇందులో 16GB వరకు రేమ్, 512GB వరకు ఇన్-బిల్ట్ స్టోరేజ్ అందించారు. కెమెరా విభాగంలో OIS సపోర్ట్‌తో కూడిన 50 మెగాపిక్సెల్ ప్రైమరీ కెమెరా, 2 మెగాపిక్సెల్ డెప్త్ సెన్సార్ ఉన్నాయి. సెల్ఫీల కోసం ముందు భాగంలో 16 మెగాపిక్సెల్ కెమెరా కలదు. అంతేకాకుండా దీనిలోని భారీ 9,020 mAh బ్యాటరీ 90W ఫాస్ట్ ఛార్జింగ్‌కు సపోర్ట్ చేస్తుంది. అయితే ఇండియన్ మోడల్ పూర్తి స్పెసిఫికేషన్లు లాంచ్ రోజున అధికారికంగా వెల్లడికానున్నాయి.