Lava Mobiles : లావా నుంచి రెండు కొత్త స్మార్ట్‌ఫోన్ల సేల్స్ షురూ.. రూ. 9 వేలకే అదిరిపోయే ఫీచర్లు

Lava Mobiles : భారతీయ స్వదేశీ స్మార్ట్‌ఫోన్ తయారీ సంస్థ లావా ఇటీవలే అధికారికంగా ప్రకటించిన తమ లేటెస్ట్ స్మార్ట్‌ఫోన్లు Lava Virat V1 5G, Lava Virat V1ల విక్రయాలను జూలై 31 నుంచి భారత మార్కెట్లో ప్రారంభించింది. సాధారణ కస్టమర్లను, ముఖ్యంగా తక్కువ బడ్జెట్‌లో నాణ్యమైన ఫోన్ కోరుకునే వారిని లక్ష్యంగా చేసుకుని ఈ రెండు ఫోన్లను రూపోందించారు. 6.75 అంగుళాల డిస్‌ప్లే, మెరుగైన ప్రాసెసర్లు, భారీ బ్యాటరీ కెపాసిటీతో వచ్చిన ఈ ఫోన్లను కస్టమర్లు ఈరోజే సొంతం చేసుకోవచ్చు.

ధరలు, రంగులు, లభ్యత వివరాలు 
ధరల వివరాల్లోకి వెళితే.. Lava Virat V1 5G మోడల్ 4GB ర్యామ్ + 128GB స్టోరేజ్ వేరియంట్ ధరను రూ. 11,999 గా నిర్ణయించారు. ఇక ఫోర్త్ జెనరేషన్ సపోర్ట్‌తో వచ్చే Lava Virat V1 మోడల్ ప్రారంభ ధరను కేవలం రూ. 8,999 గా నిర్ణయించారు. లాంచ్ సమయంలో ప్రకటించిన ధరల కంటే ఈ మొదటి సేల్ ఆఫర్‌లో కస్టమర్లకు ఇవి తక్కువ ధరకే అందుబాటులోకి వచ్చాయి. కొనుగోలుదారులు ఈ ఫోన్లను లావా అధికారిక వెబ్‌సైట్‌తో పాటు ఈ-కామర్స్ ప్లాట్‌ఫామ్ ఫ్లిప్‌కార్ట్ ద్వారా ఆర్డర్ చేయవచ్చు. లావా విరాట్ V1 5G మోడల్ ఆర్య బ్లూ, సోనార్ గోల్డ్ రంగుల్లో లభిస్తుండగా, విరాట్ V1 మోడల్ నీలగిరి బ్లూ, హిమాలయన్ సిల్వర్ రంగుల్లో కొనుగోలు చేయవచ్చు.

డిస్‌ప్లే క్వాలిటీ, ప్రాసెసర్ పెర్ఫార్మెన్స్ 
ఫీచర్ల విషయానికి వస్తే.. లావా విరాట్ V1 5G లో 6.75 అంగుళాల HD+ డిస్‌ప్లే ఇవ్వబడింది. ఇది 720x1600 పిక్సెల్స్ రిజల్యూషన్‌తో పాటు 120Hz రిఫ్రెష్ రేట్‌కు సపోర్ట్ చేస్తుంది. ఇక లావా విరాట్ V1 లో కూడా 6.75 అంగుళాల HD+ డిస్‌ప్లేనే ఉన్నప్పటికీ, ఇది 90Hz రిఫ్రెష్ రేట్‌తో పనిచేస్తుంది. పెర్ఫార్మెన్స్ పరంగా 5G వేరియంట్‌లో UNISOC T8200 ప్రాసెసర్‌ను, 4G వేరియంట్‌లో UNISOC SC9863A ప్రాసెసర్‌ను అమర్చారు. ఆపరేటింగ్ సిస్టమ్ గురించి చూస్తే.. 5G మోడల్ లేటెస్ట్ ఆండ్రాయిడ్ 16పై రన్ అవుతుండగా, 4G మోడల్ ఆండ్రాయిడ్ 15 గో ఎడిషన్‌తో పనిచేస్తుంది. రెండింటిలోనూ 4GB ఆన్-బోర్డ్ ర్యామ్‌తో పాటు మరొక 4GB వర్చువల్ ర్యామ్ వెసులుబాటును, 1TB వరకు పెంచుకునే మైక్రోఎస్డీ కార్డ్ సపోర్ట్‌ను ఇచ్చారు.

OnePlus N6x : వన్ ప్లస్ నుంచి అదిరిపోయే స్మార్ట్‌ఫోన్.. 7,000mAh బ్యాటరీతో వచ్చిన OnePlus N6x ధర ఎంతంటే?

కెమెరా సెటప్, బిగ్ బ్యాటరీ, ఐపి రేటింగ్ 
ఫోటోగ్రఫీ, వీడియో కాలింగ్ కోసం ఈ రెండు స్మార్ట్‌ఫోన్ల వెనుక భాగంలో 13 మెగాపిక్సెల్ ఏఐ ప్రైమరీ కెమెరాను, ముందు భాగంలో 5 మెగాపిక్సెల్ సెల్ఫీ కెమెరాను కేటాయించారు. బ్యాటరీ సదుపాయంలో విరాట్ V1 5G మోడల్ 6000mAh భారీ బ్యాటరీని కలిగి ఉండగా, విరాట్ V1 మోడల్ 5000mAh బ్యాటరీతో వస్తుంది. ఈ రెండు ఫోన్లు కూడా 10W ఛార్జింగ్‌ను సపోర్ట్ చేస్తాయి. అంతేకాకుండా ఇవి నీటి చినుకులు, ధూళి నుంచి రక్షణ పొందేలా IP64 రేటింగ్‌ను కలిగి ఉండటం విశేషం. 5G మోడల్ 8.75mm మందంతో 210 గ్రాముల బరువును కలిగి ఉంది.