గేమర్స్ కోసం అదిరిపోయే ట్యాబ్లెట్.. లెనోవో లెజియన్ Y700 జెన్ 5 లాంచ్.. ఫీచర్లు మామూలుగా లేవు..!

గేమింగ్ ప్రపంచంలో తనకంటూ ఒక ప్రత్యేక ముద్ర వేసుకున్న లెనోవో, తాజాగా చైనా మార్కెట్లోకి లెనోవో లీజియన్ Y700 జెన్ 5 టాబ్లెట్‌ను లాంచ్ చేసి టెక్ లవర్స్‌ని ఖుషీ చేసింది. ఒక పక్క స్మార్ట్‌ఫోన్ల కంటే పెద్ద స్క్రీన్, మరోపక్క భారీ ల్యాప్‌టాప్‌ల కంటే ఈజీగా క్యారీ చేసే వీలుండటంతో ఈ సరికొత్త గేమింగ్ టాబ్లెట్ ప్రస్తుత జనరేషన్ యూజర్లను ఇన్‌స్టాంట్‌గా ఆకట్టుకుంటోంది. ముఖ్యంగా కాంపాక్ట్ సైజులో ఉంటూనే డెస్క్‌టాప్ లెవల్ పర్ఫార్మెన్స్‌ను ఆశించే గేమర్స్ కోసం దీనిని డిజైన్ చేశారు. కార్బన్ క్రిస్టల్ బ్లాక్, ఐస్ సోల్ వైట్ వంటి స్టైలిష్ కలర్ ఆప్షన్లలో లభిస్తున్న ఈ డివైజ్, కేవలం గేమింగ్‌కే కాకుండా మల్టీ టాస్కింగ్‌కు కూడా కేరాఫ్ అడ్రస్‌గా నిలుస్తోంది.

ఈ టాబ్లెట్ మెయిన్ హైలైట్ దీని డిస్‌ప్లే అని చెప్పాలి. 8.8 అంగుళాల స్క్రీన్ సైజుతో వచ్చే ఈ డివైజ్ 165Hz రిఫ్రెష్ రేట్‌ను సపోర్ట్ చేస్తుంది, దీనివల్ల హై-ఎండ్ గేమ్స్ ఆడుతున్నప్పుడు ఎక్కడా లాగ్ లేకుండా చాలా స్మూత్ ఎక్స్‌పీరియన్స్ లభిస్తుంది. 3040 x 1904 రిజల్యూషన్, 800 నిట్స్ పీక్ బ్రైట్‌నెస్ ఉండటం వల్ల విజువల్స్ చాలా షార్ప్‌గా, కలర్ ఫుల్‌గా కనిపిస్తాయి. అంతేకాకుండా కళ్లపై ఒత్తిడి పడకుండా ఉండేందుకు ట్యూవీ రైన్‌ల్యాండ్ సర్టిఫికేషన్ కూడా ఉంది. అంటే గంటల తరబడి గేమ్స్ ఆడినా లేదా సినిమాలు చూసినా కళ్లకు పెద్దగా ఇబ్బంది కలగదు. దీని టచ్ శాంప్లింగ్ రేట్ కూడా చాలా ఎక్కువగా ఉండటం వల్ల గేమింగ్‌లో రియాక్షన్ టైమ్ చాలా స్పీడ్‌గా ఉంటుంది.

పర్ఫార్మెన్స్ విషయానికి వస్తే, ఇందులో క్వాల్కమ్ స్నాప్‌డ్రాగన్ 8 ఎలైట్ జెన్ 5 చిప్‌సెట్‌ను వాడారు. ఇది ప్రస్తుతానికి మార్కెట్లో ఉన్న అత్యంత పవర్‌ఫుల్ ప్రాసెసర్లలో ఒకటి. దీనికి తోడు 24GB వరకు ర్యామ్,  1TB ఇంటర్నల్ స్టోరేజ్ ఆప్షన్లు ఉండటం విశేషం. ఒకవేళ స్టోరేజ్ సరిపోదు అనుకుంటే మైక్రో ఎస్డీ కార్డ్ ద్వారా ఏకంగా 2TB వరకు పెంచుకోవచ్చు. ఆండ్రాయిడ్ 16 ఆధారిత యూజర్ ఇంటర్‌ఫేస్‌తో వస్తున్న ఈ టాబ్లెట్, లేటెస్ట్ సాఫ్ట్‌వేర్ ఫీచర్లను అందిస్తుంది. హెవీ గ్రాఫిక్స్ ఉన్న గేమ్స్ ఆడేటప్పుడు టాబ్లెట్ వేడెక్కకుండా ఉండేందుకు ఇందులో 17,353 చదరపు మిల్లీమీటర్ల త్రీ-ఛానల్ లిక్విడ్ కూలింగ్ సిస్టమ్‌ను ఏర్పాటు చేశారు.

ఆర్టిఫిషియల్ ఇంటెలిజెన్స్  వాడకం ఈ రోజుల్లో అనివార్యం అయిపోయింది, అందుకే లెనోవో కూడా ఇందులో పవర్‌ఫుల్ AI టూల్స్‌ను జోడించింది. ఏఐ వాయిస్‌ప్రింట్ హంటర్, ఏఐ పిక్సెల్ స్నిపర్ వంటి గేమింగ్ ఫీచర్లతో పాటు నోట్స్ రాసుకోవడానికి, వాయిస్ ట్రాన్స్‌క్రిప్షన్ చేయడానికి ఏఐ రైటింగ్ అసిస్టెన్స్ వంటి ప్రొడక్టివిటీ ఫీచర్లు కూడా ఉన్నాయి. స్టైలస్ పెన్ సపోర్ట్ కూడా ఉండటంతో క్రియేటివ్ వర్క్ చేసే వారికి ఇది బాగా యూజ్ అవుతుంది. మ్యూజిక్, సౌండ్ లవర్స్ కోసం డాల్బీ అట్మోస్ సపోర్ట్ చేసే డ్యూయల్ స్పీకర్లను అందించారు, ఇవి సినిమా చూస్తున్నప్పుడు లేదా గేమ్ ఆడుతున్నప్పుడు ఒక సరౌండ్ సౌండ్ ఎఫెక్ట్‌ను క్రియేట్ చేస్తాయి.

బ్యాటరీ లైఫ్ గురించి మాట్లాడితే, ఇందులో 9,000mAh భారీ బ్యాటరీని అమర్చారు. ఇది ఒక్కసారి ఛార్జ్ చేస్తే దాదాపు 18 గంటల పాటు వీడియో ప్లేబ్యాక్ ఇచ్చే సామర్థ్యం కలిగి ఉంది. 68W ఫాస్ట్ ఛార్జింగ్ సపోర్ట్ ఉండటం వల్ల చాలా తక్కువ టైమ్‌లోనే ఫుల్ ఛార్జ్ అవుతుంది. గేమర్స్ కోసం ప్రత్యేకంగా 'బైపాస్ ఛార్జింగ్' ఫీచర్‌ను కూడా ఇచ్చారు, దీనివల్ల ఛార్జింగ్ పెట్టి గేమ్ ఆడుతున్నప్పుడు బ్యాటరీ వేడెక్కకుండా డైరెక్ట్ పవర్ సప్లై జరుగుతుంది. కనెక్టివిటీ కోసం డ్యూయల్ యూఎస్‌బీ టైప్-సి పోర్టులు ఇవ్వడం మరొక ప్లస్ పాయింట్, దీనివల్ల ఒకేసారి ఛార్జింగ్,  ఇతర యాక్సెసరీలను కనెక్ట్ చేసుకోవచ్చు.

ధర విషయానికి వస్తే, చైనాలో దీని బేస్ వేరియంట్ (12GB + 256GB) ధర సుమారు 54,100 రూపాయల నుండి ప్రారంభమవుతుంది. హై-ఎండ్ వేరియంట్ (24GB + 1TB) ధర దాదాపు 81,100 రూపాయల వరకు ఉంది. ప్రస్తుతం ఇది చైనాలోని లెనోవో స్టోర్లలో అందుబాటులో ఉంది. స్టూడెంట్స్ కోసం ప్రత్యేక సబ్సిడీలు,  తగ్గింపులు కూడా అందిస్తున్నారు. గ్లోబల్ మార్కెట్లోకి,  ఇండియాలోకి ఇది ఎప్పుడు వస్తుందనే దానిపై ఇంకా అధికారిక ప్రకటన రాలేదు. ఒకవేళ మీరు ఒక పక్కా గేమింగ్ బీస్ట్‌ను కొనుగోలు చేయాలనుకుంటే, లెనోవో లీజియన్ Y700 జెన్ 5 కచ్చితంగా మీ విష్ లిస్టులో ఉండాల్సిన డివైజ్.