Smartphone Price : స్మార్ట్‌ఫోన్ ప్రియులకు బ్యాడ్ న్యూస్.. రియల్‌మీ, వన్‌ప్లస్, పోకో ఫోన్ల ధరలు భారీగా పెంపు

Smartphone Price : కొత్త మొబైల్ కొందామని బడ్జెట్ ప్లాన్ చేసుకుంటున్న కస్టమర్లకు మొబైల్ కంపెనీలు గట్టి షాక్ ఇచ్చాయి. భారతదేశంలో మోస్ట్ పాపులర్ స్మార్ట్‌ఫోన్ల ధరలు ఒక్కసారిగా పెరిగిపోయాయి. ఈ ఏడాది ప్రారంభంలో మార్కెట్లోకి ఎంట్రీ ఇచ్చి రికార్డు అమ్మకాలతో దూసుకుపోతున్న రియల్‌మీ 16 సిరీస్‌తో పాటు వన్‌ప్లస్, పోకో, లావా వంటి టాప్ బ్రాండ్ల మొబైల్స్ ధరలను కంపెనీలు భారీగా సవరించాయి. గ్లోబల్ మార్కెట్లో స్మార్ట్‌ఫోన్ విడిభాగాల ఖర్చులు విపరీతంగా పెరగడం, అలాగే మెమరీ చిప్‌ల కొరత ఏర్పడటంతో కంపెనీలపై ఆర్థిక భారం పడింది. దీంతో ఆ భారాన్ని కస్టమర్ల నెత్తినే వేస్తూ మిడ్-రేంజ్, ప్రీమియం ఫోన్ల ధరలను పెంచుతున్నట్లు కంపెనీలు ప్రకటించాయి.

రియల్‌మీ 16 సిరీస్ ధరల పెంపు.. 
రియల్‌మీ ఈ ఏడాది రిలీజ్ చేసిన పాపులర్ 16 సిరీస్ ఫోన్ల ధరలు ఇప్పుడు మునుపటి కంటే చాలా కాస్ట్లీగా మారాయి. బేస్ మోడల్ అయిన రియల్‌మీ 16 (8GB + 128GB) వేరియంట్ లాంచ్ ధర రూ.31,999 ఉండగా, ఇప్పుడు దానిని రూ.33,999 కి పెంచారు. అలాగే దీని 8GB + 256GB మోడల్ రూ.36,999కి, 12GB + 256GB టాప్ మోడల్ రూ.39,999కి చేరాయి. మరోవైపు రియల్‌మీ 16 ప్రో మోడల్ బేస్ వేరియంట్ ఏకంగా ఐదు వేలు పెరిగి ఇప్పుడు రూ.36,999కి విక్రయించబడుతోంది. దీని హయ్యర్ వేరియంట్లు అయిన 8GB + 256GB, 12GB + 256GB మోడల్స్ వరుసగా రూ.39,999, రూ.42,999 ధరకు చేరుకున్నాయి. ఇక అత్యంత ప్రీమియం మోడల్ అయిన రియల్‌మీ 16 ప్రో ప్లస్ 5G వేరియంట్ల ధరలు కూడా భారీగా పెరిగాయి. దీని 8GB + 256GB మోడల్ రూ.48,999కి (లాంచ్ ధర రూ. 41,999), 12GB + 256GB మోడల్ రూ.52,999కి (లాంచ్ ధర రూ.44,999) సవరించబడ్డాయి.

వన్‌ప్లస్ 15R పై మళ్లీ పెరిగిన భారం..  
ప్రీమియం లుక్ , పవర్‌ఫుల్ పర్ఫార్మెన్స్‌తో లభించే వన్‌ప్లస్ 15R మొబైల్ ధరను కంపెనీ మరోసారి పెంచేసింది. ప్రముఖ ఈ-కామర్స్ సైట్ అమెజాన్‌లో ఈ ఫోన్ సరికొత్త ధరలతో లిస్ట్ అయింది. లాంచ్ సమయంలో రూ.47,999కి అందుబాటులో ఉన్న వన్‌ప్లస్ 15R (12GB + 256GB) బేస్ మోడల్ ధర ఇప్పుడు ఏకంగా రూ.54,999కి చేరుకుంది. అంటే కస్టమర్లపై ఏకంగా ఏడు వేల రూపాయల అదనపు భారం పడింది. ఇదే వేరియంట్‌లో వచ్చే 512GB ఇంటర్నల్ స్టోరేజ్ మోడల్ ధర మునుపటి లాంచ్ ప్రైస్ రూ.52,999 నుంచి ఇప్పుడు ఏకంగా రూ.59,999 కి పెరిగిపోయింది. వన్‌ప్లస్ బ్రాండ్ వాల్యూని నమ్మి కొనేవారి జేబులకు ఇది గట్టి దెబ్బేనని చెప్పాలి.

పోకో, లావా స్మార్ట్‌ఫోన్లు కూడా ప్రియం..  
ధరల పెంపు రేసులో పోకో, స్వదేశీ బ్రాండ్ లావా ఇంటర్నేషనల్ కూడా చేరిపోయాయి. పోకోకు చెందిన పవర్‌ఫుల్ మోడల్ పోకో X8 ప్రో మాక్స్ (12GB + 256GB) ధర రూ.42,999 నుంచి రూ.44,999కి పెరిగింది. కాగా దీని 512GB స్టోరేజ్ మోడల్ మాత్రం పాత ధర రూ.48,999 వద్దే కొనసాగుతోంది. ఇక బడ్జెట్ రేంజ్ 5G ఫోన్ అయిన పోకో M8 5G బేస్ మోడల్ (6GB + 128GB) ధర రూ.18,999 నుంచి రూ.20,999కి పెరిగింది. దీని 8GB + 128GB వేరియంట్ రూ.22,999కి, 8GB + 256GB వేరియంట్ రూ.24,999కి చేరాయి. ఇదే దారిలో లావా అగ్ని 4 ఏకైక 8GB + 256GB వేరియంట్ ధర అమెజాన్‌లో రూ.24,999 నుంచి ఏకంగా రూ.29,999కి పెరిగిపోయింది.

ఎందుకీ హఠాత్ నిర్ణయం?
ప్రముఖ టెక్నాలజీ వెబ్‌సైట్లు మరియు మార్కెట్ నిపుణుల సమాచారం ప్రకారం.. స్మార్ట్‌ఫోన్ల తయారీకి అవసరమయ్యే ప్రాసెసర్లు, కెమెరా సెన్సార్ల ధరలు గ్లోబల్ మార్కెట్లో భారీగా పెరిగాయి. వీటన్నింటికీ మించి స్మార్ట్‌ఫోన్లలో వాడే DRAM, NAND లాంటి మెమరీ చిప్‌లకు ప్రపంచవ్యాప్తంగా విపరీతమైన కొరత ఏర్పడింది. డిమాండ్ ఎక్కువగా ఉండటం, సప్లై తక్కువగా ఉండటం వల్ల చిప్‌ల ధరలు ఆకాశాన్ని తాకాయి. ఈ కారణంగానే మొబైల్ కంపెనీలు తమ లాభాల శాతాన్ని కాపాడుకోవడానికి తప్పనిసరి పరిస్థితుల్లో ఈ ధరల పెంపు నిర్ణయాన్ని తీసుకున్నాయి. రాబోయే రోజుల్లో మరికొన్ని బ్రాండ్లు కూడా ఇదే బాటలో నడిచే అవకాశం ఉందని ఇండస్ట్రీ వర్గాలు అంచనా వేస్తున్నాయి.