కెమెరా, ప్రాసెసర్, బ్యాటరీ వంటి అంశాల్లో సామ్‌సంగ్ పెద్ద మార్పులు తీసుకురావొచ్చని లీక్‌లు చెబుతున్నాయి.

సామ్‌సంగ్ నుంచి రానున్న గెలాక్సీ S26 సిరీస్‌పై గత కొన్ని వారాలుగా టెక్ ప్రపంచంలో భారీ అంచనాలు నెలకొన్నాయి. Galaxy S26, Galaxy S26+, Galaxy S26 Ultra మోడళ్లను ఫిబ్రవరి 25న ఆవిష్కరించనుందని ఇప్పటికే పలు రిపోర్టులు, లీక్‌లు ప్రచారం చేశాయి. అయితే ఇప్పటివరకు కంపెనీ నుంచి అధికారికంగా ఎలాంటి ప్రకటన రాలేదు. ఈ పరిస్థితిలో తాజాగా బయటపడిన ఒక చిన్న సంకేతం, ఈ రూమర్లకు బలమైన ఆధారంగా మారుతోంది. సామ్‌సంగ్ గల్ఫ్ అధికారిక X అకౌంట్ ఇటీవల ఒక ఆన్‌లైన్ కాంటెస్ట్‌ను ప్రకటించింది. సాధారణంగా ఇలాంటి కాంటెస్ట్‌లను పెద్ద ఈవెంట్లకు అనుసంధానించి నిర్వహించడం సామ్‌సంగ్‌కు కొత్తేమీ కాదు. అయితే ఈసారి ఆ కాంటెస్ట్‌కు సంబంధించిన టర్మ్స్ అండ్ కండిషన్స్‌ను గమనిస్తే, అందులో చాలా కీలకమైన సమాచారం దాగి ఉందని టెక్ వర్గాలు చెబుతున్నాయి.

ఆ టర్మ్స్ అండ్ కండిషన్స్ ప్రకారం, కాంటెస్ట్‌ను రెండు భాగాలుగా విభజించారు. మొదటి భాగం “Galaxy Unpackedకి ముందు” నిర్వహించబడుతుందని, అది ఫిబ్రవరి 24 వరకు కొనసాగుతుందని స్పష్టంగా పేర్కొన్నారు. అదే విధంగా, రెండో భాగం “Galaxy Unpacked సమయంలో మరియు తర్వాత” నిర్వహించబడుతుందని, అది ఫిబ్రవరి 25 నుంచి ప్రారంభమవుతుందని అందులో ఉంది. అంటే, ఫిబ్రవరి 25న Galaxy Unpacked ఈవెంట్ జరగబోతోందన్న సంకేతం ఇక్కడ స్పష్టంగా కనిపిస్తోంది. ఇది నేరుగా సామ్‌సంగ్ పంపిన ఈవెంట్ ఇన్విటేషన్ కాదు, అలాగే అధికారిక ప్రెస్ రిలీజ్ కూడా కాదు.

అయినప్పటికీ, కంపెనీకి చెందిన అధికారిక సోషల్ మీడియా అకౌంట్ నుంచే వచ్చిన సమాచారం కావడం వల్ల దీనికి ప్రత్యేక ప్రాధాన్యం ఏర్పడింది. అందుకే ఇప్పటివరకు వినిపించిన Galaxy S26 సిరీస్ లాంచ్ డేట్ రూమర్లు నిజమయ్యే అవకాశాలు చాలా ఎక్కువగా ఉన్నాయని టెక్ విశ్లేషకులు భావిస్తున్నారు.

Galaxy Unpacked ఈవెంట్‌లో ఈసారి గెలాక్సీ S26 సిరీస్‌తో పాటు మరికొన్ని కొత్త ఫీచర్లు, అప్‌డేటెడ్ AI టెక్నాలజీలు కూడా పరిచయం చేసే అవకాశం ఉందని ఊహాగానాలు వినిపిస్తున్నాయి. ముఖ్యంగా Galaxy S26 Ultra మోడల్‌పై భారీ అంచనాలు ఉన్నాయి. కెమెరా, ప్రాసెసర్, బ్యాటరీ వంటి అంశాల్లో సామ్‌సంగ్ పెద్ద మార్పులు తీసుకురావొచ్చని లీక్‌లు చెబుతున్నాయి.

మొత్తానికి, ఫిబ్రవరి 25 తేదీ ఇప్పుడు దాదాపు ఖరారైనట్టే కనిపిస్తోంది. ఇక మిగిలింది ఒక్కటే . సామ్‌సంగ్ అధికారికంగా Galaxy Unpacked ఈవెంట్ తేదీని ప్రకటించడం. ఆ ప్రకటన వెలువడిన వెంటనే, గెలాక్సీ S26 సిరీస్‌పై ఉన్న అన్ని సందేహాలకు పూర్తి స్పష్టత లభించనుంది.