శాంసంగ్ నుంచి సరికొత్త 'వైడ్' ఫోల్డబుల్ ఫోన్.. జూలై 22న గ్రాండ్‌గా గెలాక్సీ అన్‌ప్యాక్డ్ ఈవెంట్!

సాంసంగ్ తన మొదటి గెలాక్సీ అన్‌ప్యాక్డ్ ఈవెంట్‌ను ఈ ఏడాది ఫిబ్రవరిలోనే ఎంతో గ్రాండ్‌గా నిర్వహించి గెలాక్సీ S26 సిరీస్‌ను ప్రపంచానికి పరిచయం చేసింది. ఇప్పుడు ఏడాది రెండో భాగం దగ్గరపడుతుండటంతో టెక్ వర్గాల్లో తదుపరి భారీ ఈవెంట్ గురించి ఆసక్తికరమైన చర్చ మొదలైంది. దక్షిణ కొరియా టెక్ దిగ్గజం నుండి అధికారికంగా ఎటువంటి ప్రకటన రాకపోయినప్పటికీ సోషల్ మీడియాలో లీకైన వార్తలు జూలై నెలలో అన్‌ప్యాక్డ్ వేదిక సిద్ధమవుతుందని స్పష్టం చేస్తున్నాయి. ఈసారి గెలాక్సీ Z ఫోల్డ్ 8 అలాగే గెలాక్సీ Z ఫ్లిప్ 8 మోడళ్లతో పాటు సరికొత్త గెలాక్సీ Z ఫోల్డ్ 8 వైడ్ అనే బుక్ స్టైల్ ఫోల్డబుల్ ఫోన్ రాబోతుండటం విశేషం. ఈ కొత్త మోడల్ కోసం ప్రత్యేకంగా S పెన్ స్టైలస్‌ను కూడా కంపెనీ లాంచ్ చేసే అవకాశం ఉన్నట్లు తెలుస్తోంది.

కొరియా ఎకనామిక్ టీవీ కథనం ప్రకారం శాంసంగ్ తన తదుపరి గెలాక్సీ అన్‌ప్యాక్డ్ ఈవెంట్‌ను 2026 జూలై 22వ తేదీన నిర్వహించబోతోంది. స్మార్ట్‌ఫోన్ ప్రియులు ఎంతగానో ఎదురుచూస్తున్న గెలాక్సీ Z ఫోల్డ్ 8, గెలాక్సీ Z ఫ్లిప్ 8 వర్షన్లను ఈ వేదికపైనే ఆవిష్కరించనున్నారు. ఈసారి అన్‌ప్యాక్డ్ ఈవెంట్ వేదికగా బ్రిటన్‌లోని లండన్ నగరం ఖరారైనట్లు సమాచారం. గతంలో శాంసంగ్ తన మేజర్ లాంచ్ ఈవెంట్లను అమెరికా లేదా దక్షిణ కొరియాలోనే నిర్వహించేది. గెలాక్సీ S26 సిరీస్‌ను కాలిఫోర్నియాలోని శాన్ ఫ్రాన్సిస్కోలో లాంచ్ చేయగా గతేడాది గెలాక్సీ Z ఫోల్డ్ 7 వేడుక బ్రూక్లిన్‌లో జరిగిన సంగతి మనందరికీ తెలిసిందే.

లండన్ నగరం శాంసంగ్ యూరోపియన్ కార్యకలాపాలకు ఒక ప్రధాన కేంద్రంగా ఉంది. అక్కడ కంపెనీకి చెందిన ప్రాంతీయ ప్రధాన కార్యాలయం సర్రేలో ఉండటం వల్ల ఈ నిర్ణయం తీసుకున్నట్లు నిపుణులు భావిస్తున్నారు. యూరప్ మార్కెట్‌లో తన పట్టును మరింత బలపరుచుకోవాలనే వ్యూహంతోనే శాంసంగ్ ఈసారి బ్రిటన్‌ను ఎంచుకుంది. ఆపిల్ వంటి ప్రత్యర్థి కంపెనీల కంటే ఒక అడుగు ముందుండాలని శాంసంగ్ భావిస్తోంది. లండన్ వేదికగా జరిగే ఈ ఈవెంట్ ద్వారా అంతర్జాతీయ మార్కెట్‌లో శాంసంగ్ తన బ్రాండ్ ఇమేజ్‌ను మరో స్థాయికి తీసుకెళ్లేందుకు పక్కా ప్లాన్‌తో ముందుకు వెళ్తోంది.

ఈ ఏడాది రాబోయే గెలాక్సీ Z ఫోల్డ్ 8 వైడ్ మోడల్‌లో భారీ స్క్రీన్ ఉండబోతోంది. ఆపిల్ తయారు చేస్తున్నట్లుగా చెబుతున్న ఫోల్డబుల్ ఫోన్‌కు పోటీగా దీనిని 4:3 యాస్పెక్ట్ రేషియోతో రూపొందించారు. ఆపిల్ ఫోల్డబుల్ ఫోన్ కంటే ఇది సుమారు 0.5 మిమీ పల్చగా ఉండటం వినియోగదారులను ఆకట్టుకునే అంశం. అదనంగా ఈ వైడ్ ఫోల్డ్ మోడల్‌లో S పెన్ సపోర్ట్ ఇవ్వడం ద్వారా శాంసంగ్ తన కస్టమర్లకు మరింత మెరుగైన ఎక్స్‌పీరియన్స్ అందించనుంది. మల్టీ టాస్కింగ్ చేసే వారికి ఈ కొత్త డిజైన్ చాలా ఉపయోగకరంగా ఉంటుందని టెక్ నిపుణులు అంచనా వేస్తున్నారు.

గతంలో వెల్లడైన లీకుల ఆధారంగా గెలాక్సీ Z ఫోల్డ్ 8 వైడ్ ఫోన్ 7.6 అంగుళాల ఫోల్డబుల్ OLED డిస్ ప్లేను కలిగి ఉంటుంది. దీని బయటి వైపు 5.4 అంగుళాల కవర్ స్క్రీన్ అందుబాటులో ఉండనుంది. అలాగే ఈ డివైజ్ 25W వైర్‌లెస్ ఛార్జింగ్ ఫీచర్‌తో రాబోతున్నట్లు సమాచారం. డిస్ ప్లే క్వాలిటీ విషయంలో శాంసంగ్ ఎప్పుడూ రాజీ పడదు కాబట్టి ఈసారి కూడా అద్భుతమైన విజువల్స్ ఆశించవచ్చు. ప్రాసెసర్ పనితీరు కూడా ఈసారి మునుపటి కంటే చాలా వేగంగా ఉంటుందని సమాచారం.

ప్రస్తుత జనరేషన్ యువత ఇష్టపడే అన్ని హంగులతో ఈ ఫోల్డబుల్ ఫోన్లు మార్కెట్లోకి రానున్నాయి. శాంసంగ్ తన సాఫ్ట్‌వేర్ అనుభవాన్ని మెరుగుపరచడం ద్వారా వినియోగదారులకు కొత్తదనాన్ని పంచనుంది. జూలై 22న జరిగే ఈవెంట్‌లో ధర వివరాలతో పాటు మరిన్ని ఆసక్తికరమైన ఫీచర్లు వెల్లడయ్యే అవకాశం ఉంది. ప్రపంచవ్యాప్తంగా టెక్ లవర్స్ అందరూ ఈ అన్‌ప్యాక్డ్ వేదికపై కళ్లు పెట్టారు. ఫోల్డబుల్ ఫోన్ల విభాగంలో శాంసంగ్ తన ఆధిపత్యాన్ని నిలబెట్టుకుంటుందో లేదో చూడాలి. ఈ సరికొత్త వైడ్ ఫోల్డ్ మోడల్ స్మార్ట్‌ఫోన్ మార్కెట్ గమనాన్ని మార్చేసేలా కనిపిస్తోంది.