Smartphone : స్మార్ట్‌ఫోన్ లవర్స్‌కు పండగే.. ఈ ఒక్క నెలలోనే మార్కెట్లోకి వచ్చిన టాప్ మొబైల్స్ ఇవే

Smartphone : ఈ ఏడాది టెక్ మార్కెట్‌లో స్మార్ట్‌ఫోన్ ప్రియులకు, మొబైల్ బ్రాండ్లకు అస్సలు ఖాళీ దొరకడం లేదు. పరిశ్రమను మెమొరీ చిప్‌ల కొరత వేధిస్తున్నప్పటికీ, ప్రముఖ కంపెనీలైన మోటోరోలా, షావోమి, శాంసంగ్, లావా తమ సరికొత్త స్మార్ట్‌ఫోన్లను ఇండియన్ మార్కెట్లో పోటీపడి మరీ లాంచ్ చేశాయి. జూన్ నెలలో బడ్జెట్ శ్రేణి నుంచి మునుపెన్నడూ లేని అల్ట్రా ప్రీమియం ఫీచర్లతో కూడిన సరికొత్త ఫ్లాగ్‌షిప్ మొబైల్స్ దేశీయ మార్కెట్లోకి అడుగుపెట్టాయి. వీటిలో 7540mAh భారీ బ్యాటరీ, లైకా బ్రాండెడ్ కెమెరాలు, అత్యున్నత వాటర్ ప్రొటెక్షన్ రేటింగ్స్ వంటి ఎన్నో మైండ్ బ్లోయింగ్ ఫీచర్లు ఉన్నాయి.

మోటోరోలా ఎడ్జ్ 70 ప్రో+.. అల్ట్రా ప్రీమియం ఫీచర్లు
జూన్ మొదటి వారంలో మోటోరోలా తన సరికొత్త ఫ్లాగ్‌షిప్ ఫోన్ మోటోరోలా ఎడ్జ్ 70 ప్రో+ను భారత మార్కెట్లో విడుదల చేసింది. ఇందులో మీడియాటెక్ డైమెన్సిటీ 8500 ప్రాసెసర్‌ను ఉపయోగించారు. ఈ ఫోన్ 6.8 ఇంచుల 1.5K ఎక్స్‌ట్రీమ్ అమోలెడ్ డిస్‌ప్లేతో వస్తుంది, ఇది ఏకంగా 5200 నిట్స్ పీక్ బ్రైట్‌నెస్‌ను కలిగి ఉండటం విశేషం. 12GB రామ్, 256GB స్టోరేజ్ గల ఈ ఫోన్ ధర రూ. 47,999 గా ఉంది. ఇందులో వెనుక వైపు మూడు 50 మెగాపిక్సెల్ కెమెరాలు, ముందు వైపు కూడా 50 మెగాపిక్సెల్ సెల్ఫీ కెమెరా ఇచ్చారు. దీనికి తోడు 6500mAh బ్యాటరీ, 90W ఫాస్ట్ చార్జింగ్, మిలిటరీ గ్రేడ్ బాడీ, IP69 వాటర్ ప్రొటెక్షన్ రేటింగ్స్ ఉన్నాయి.
 

షావోమి 17T.. ఫోటోగ్రఫీ లవర్లకు కేరాఫ్ అడ్రస్
షావోమి సంస్థ జూన్ 4వ తేదీన తన సరికొత్త ప్రీమియం మొబైల్ షావోమి 17Tని పరిచయం చేసింది. ఇందులో ప్రసిద్ధ లైకా ట్యూన్డ్ ట్రిపుల్ కెమెరా సెటప్ ఉంది, ఇందులో 50MP మెయిన్ కెమెరా, 50MP పెరిస్కోప్ టెలిఫోటో కెమెరా, 12MP అల్ట్రావైడ్ కెమెరా ఉన్నాయి. ఈ ఫోన్ మీడియాటెక్ డైమెన్సిటీ 8500-ఆల్ట్రా ప్రాసెసర్‌తో రన్ అవుతుంది. 6.59 ఇంచుల అమోలెడ్ డిస్‌ప్లే, 6500mAh సిలికాన్-కార్బన్ బ్యాటరీ, 67W ఫాస్ట్ చార్జింగ్ ఫీచర్లు ఇందులో ఉన్నాయి. దీని 12GB + 256GB బేస్ వేరియంట్ ధర రూ. 59,999 కాగా, 512GB స్టోరేజ్ వేరియంట్ ధర రూ. 64,999 గా నిర్ణయించారు.

శాంసంగ్ గెలాక్సీ A27 5G.. ఆరేళ్ల అప్‌డేట్స్ హామీ
శాంసంగ్ కంపెనీ జూన్ చివరి వారంలో మధ్యస్థ బడ్జెట్ వినియోగదారుల కోసం గెలాక్సీ A27 5Gని లాంచ్ చేసింది. ఈ ఫోన్ సరికొత్త ఆండ్రాయిడ్ 16 ఆధారిత వన్ యూఐ 8.5 తో వస్తుంది. దీనికి ఏకంగా 6 సంవత్సరాల పాటు ఓఎస్, సెక్యూరిటీ అప్‌డేట్స్ ఇస్తామని శాంసంగ్ ప్రకటించడం విశేషం. స్నాప్‌డ్రాగన్ 6 జెన్ 3 ప్రాసెసర్ కలిగిన ఈ ఫోన్‌లో 6.7 ఇంచుల సూపర్ అమోలెడ్ స్క్రీన్, 50MP ప్రధాన కెమెరా, 5000mAh బ్యాటరీ, 25W చార్జింగ్ సపోర్ట్ ఉన్నాయి. అమెరికా మార్కెట్లో దీని ధర సుమారు రూ.30,000గా ఉంది. జూలై 3 నుంచి భారత మార్కెట్లో దీని విక్రయాలు ప్రారంభం కానున్నాయి.

రెడ్‌మి టర్బో 5.. భారీ బ్యాటరీల బాద్‌షా
షావోమి సబ్ బ్రాండ్ రెడ్‌మి జూన్ 16న రెడ్‌మి టర్బో 5 మొబైల్‌ను దేశీయ మార్కెట్లో విడుదల చేసింది. ఈ ఫోన్ లోని అతిపెద్ద హైలైట్ ఏంటంటే ఇందులో ఏకంగా 7540mAh భారీ బ్యాటరీని అమర్చారు. దీనికి తోడు 100W అత్యంత వేగవంతమైన వైర్డ్ ఫాస్ట్ చార్జింగ్ సపోర్ట్ కూడా ఉంది. మీడియాటెక్ డైమెన్సిటీ 8500 ఆల్ట్రా ప్రాసెసర్, ఆండ్రాయిడ్ 16 ఆధారిత హైపర్ ఓఎస్ 3 సాఫ్ట్‌వేర్ ఇందులో ఉన్నాయి. కంటిన్యూస్ వాటర్ ప్రొటెక్షన్ కోసం దీనికి IP69K రేటింగ్ ఇచ్చారు. దీని ప్రారంభ ధర 8GB రామ్, 256GB స్టోరేజ్ వేరియంట్‌కు రూ. 37,999 గా ఉండగా, 12GB వేరియంట్ ధర రూ. 40,999 గా ఉంది.

లావా బోల్డ్ N2 5G.. తక్కువ ధరలో బెస్ట్ బడ్జెట్ ఆప్షన్
భారతీయ మొబైల్ బ్రాండ్ లావా జూన్ మొదటి వారంలో రూ.12,999 ధరతో ఒక పర్ఫెక్ట్ బడ్జెట్ ఫోన్  లావా బోల్డ్ N2 5Gని మార్కెట్లోకి తెచ్చింది. తక్కువ ధరలో ఉన్నప్పటికీ ఇందులో 6.75 ఇంచుల హెచ్‌డీ ప్లస్ 120Hz రీఫ్రెష్ రేట్ డిస్‌ప్లేను ఇచ్చారు. ఈ ఫోన్ ఆండ్రాయిడ్ 16 ఓఎస్‌తో రన్ అవుతుంది. ఇందులో 6nm యూనిసోక్ T8200 ఆక్టా-కోర్ ప్రాసెసర్‌ను ఉపయోగించారు. ఇందులో 4GB రామ్, 64GB స్టోరేజ్, 13MP వెనుక కెమెరా, రోజంతా హ్యాపీగా నడిచేలా 18W ఫాస్ట్ చార్జింగ్ సపోర్ట్ గల 6000mAh పెద్ద బ్యాటరీని అమర్చారు.