ఇవన్నీ ఉన్నప్పటికీ Xiaomi 17 Ultra ఒక శక్తివంతమైన ఫోన్ అన్నది నిజం.

షియోమీ నుంచి రాబోతున్న కొత్త ఫ్లాగ్‌షిప్ ఫోన్ Xiaomi 17 Ultraపై టెక్ వర్గాల్లో భారీ అంచనాలే ఉన్నాయి. అయితే గ్లోబల్ మార్కెట్ కోసం విడుదలయ్యే ఈ మోడల్, చైనాలో విక్రయించే వెర్షన్‌తో పోలిస్తే కొన్ని కీలక విషయాల్లో రాజీపడినట్టే కనిపిస్తోంది. ఇటీవల X వేదికగా వెలువడిన ఒక లీక్ ఈ విషయాన్ని మరింత స్పష్టంగా చూపిస్తోంది.

ప్రముఖ లీకర్ ఆర్సేన్ లుపిన్ వెల్లడించిన వివరాల ప్రకారం, యూరప్ మార్కెట్లో Xiaomi 17 Ultra ధర సుమారు €1,499గా ఉండే అవకాశం ఉంది. ఈ ధరకు 16GB ర్యామ్, 512GB స్టోరేజ్ వేరియంట్ అందించనున్నారు. ఈ ధరను చూస్తే ఇది నేరుగా సామ్‌సంగ్ గెలాక్సీ అల్ట్రా, ఆపిల్ ఐఫోన్ ప్రో మాక్స్ లాంటి అల్ట్రా-ప్రీమియం ఫోన్లకు పోటీగా నిలుస్తుంది.

అయితే అసలు చర్చ బ్యాటరీ విషయంలోనే మొదలవుతోంది. గ్లోబల్ Xiaomi 17 Ultraలో 6,000mAh బ్యాటరీ ఉంటుందని లీక్ చెబుతోంది. కాగితంపై ఇది పెద్ద బ్యాటరీగానే కనిపించినా, చైనా మార్కెట్ కోసం విడుదలయ్యే వెర్షన్‌లో మాత్రం 6,800mAh బ్యాటరీ ఉండనున్నట్టు సమాచారం. అంటే రెండింటి మధ్య 800mAh తేడా ఉంటుంది. ఇది రోజువారీ వినియోగంలో చాలా పెద్ద తేడానే. ఒక ఫుల్ డే ఆరామంగా ఉపయోగించగలమా, లేక సాయంత్రం చార్జర్ వెతకాల్సి వస్తుందా అన్నది ఈ తేడాపైనే ఆధారపడి ఉంటుంది.

ఇలాంటి పరిస్థితి ఇదే మొదటిసారి కాదు. గతంలో విడుదలైన Xiaomi 15 Ultra కూడా చైనాలో 6,000mAh బ్యాటరీతో వచ్చి, గ్లోబల్ వెర్షన్‌లో 5,410mAhకే పరిమితమైంది. దీనికి కారణం కేవలం ఖర్చు తగ్గించడం కాదు. టెక్ యూట్యూబర్ బ్రాండన్ లీ చెప్పినట్టు, చైనా వెలుపల ముఖ్యంగా యూరప్, అమెరికా వంటి ప్రాంతాల్లో లిథియం బ్యాటరీలకు సంబంధించి కఠినమైన భద్రతా నిబంధనలు, షిప్పింగ్ రెగ్యులేషన్స్ ఉంటాయి. అధిక సామర్థ్య బ్యాటరీలు అంటే ఎక్కువ సర్టిఫికేషన్లు, అధిక ఖర్చులు, క్లిష్టమైన లాజిస్టిక్స్ అన్న మాట.

అందుకే షియోమీ కావాలనే బ్యాటరీ తగ్గిస్తోందని అనుకోవడం కంటే, అంతర్జాతీయ నియమాల కారణంగా ఇలా చేయాల్సి వస్తోందని చెప్పుకోవాలి. ఇదే కాదు, డిజైన్ విషయంలో కూడా గ్లోబల్ వినియోగదారులకు పరిమిత ఎంపికలే ఉంటాయని లీక్ సూచిస్తోంది. గ్లోబల్ మార్కెట్‌లో తెలుపు, నలుపు, ఆకుపచ్చ రంగులు మాత్రమే అందుబాటులో ఉండగా, చైనాలో అదనంగా లైట్ పర్పుల్ కలర్ కూడా వచ్చే అవకాశముంది. ఇవన్నీ ఉన్నప్పటికీ Xiaomi 17 Ultra ఒక శక్తివంతమైన ఫోన్ అన్నది నిజం. భారీ ర్యామ్, పెద్ద స్టోరేజ్, షియోమీకి పేరున్న కెమెరా టెక్నాలజీతో ఇది ఫోటోగ్రఫీ ప్రేమికులు, పవర్ యూజర్లను లక్ష్యంగా చేసుకుంది. కానీ ఈ స్థాయి ధరకు వచ్చినప్పుడు, వినియోగదారులు పూర్తి విలువ ఆశిస్తారు. అదే ధరకు ఇతర బ్రాండ్లు ఎలాంటి ప్రాంతీయ తగ్గింపులు లేకుండా ఫోన్లు ఇస్తున్నప్పుడు, ఒక్కో మిల్లీఅ్యాంప్ కూడా చాలా ముఖ్యం అవుతుంది.