WWDC 2026 : యాపిల్ ఇంటెలిజెన్స్ సరికొత్త ఆర్కిటెక్చర్.. ఇక మాటలతో కూడా ఇమేజ్ ఎడిటింగ్ చేయవచ్చు

WWDC 2026 : ప్రముఖ గ్లోబల్ టెక్ దిగ్గజం యాపిల్ తన వార్షిక డెవలపర్స్ కాన్ఫరెన్స్ డబ్ల్యూడబ్ల్యూడీసీ 2026ను సోమవారం ఘనంగా ప్రారంభించింది. క్యూపర్టినో ప్రధాన కార్యాలయం వేదికగా జరిగిన కీనోట్ ప్రెజెంటేషన్‌లో యాపిల్ తన సరికొత్త ఆపరేటింగ్ సిస్టమ్స్ ఐఓఎస్ 27, ఐప్యాడ్ ఓఎస్ 27, మ్యాక్ ఓఎస్ 27, విజన్ ఓఎస్ 27, వాచ్ ఓఎస్ 27లను అధికారికంగా ప్రపంచానికి పరిచయం చేసింది. అయితే ఈ ఈవెంట్‌లో అందరి దృష్టిని ఆకర్షించింది మాత్రం యాపిల్ రీలాంచ్ చేసిన సరికొత్త ఏఐ వాయిస్ అసిస్టెంట్ సిరి ఏఐ. దీనిని మొదటగా 2024 లో ప్రదర్శించినప్పటికీ, ఇప్పుడు పూర్తి స్థాయి మార్పులతో తీసుకువచ్చారు.

గూగుల్, యాపిల్ హిస్టారిక్ పార్ట్‌నర్‌షిప్
ఈ ఏడాది ప్రారంభంలోనే టిమ్ కుక్ నేతృత్వంలోని యాపిల్ సంస్థ సెర్చ్ ఇంజిన్ దిగ్గజం గూగుల్‌తో ఒక కీలకమైన ఒప్పందాన్ని కుదుర్చుకుంది. ఇందులో భాగంగా గూగుల్‌కు చెందిన అత్యంత శక్తివంతమైన జెమిని ఏఐ టెక్నాలజీతో యాపిల్ తన సిరిని, బేసిక్ ఏఐ మోడళ్లను రీడిజైన్ చేసింది. ఈ కాన్ఫరెన్స్ వేదికగా గూగుల్ జెమిని సాయంతో పనిచేసే సరికొత్త యాపిల్ ఇంటెలిజెన్స్ ఆర్కిటెక్చర్‌ను యాపిల్ కంపెనీ లాంచ్ చేసింది. ఇది ఐఫోన్, ఐప్యాడ్, మ్యాక్ బుక్ ప్రయాణాన్ని పూర్తిగా మార్చేయబోతోంది.

మల్టీమోడాలిటీ సపోర్ట్‌తో సరికొత్త ఏఐ మోడల్స్
యాపిల్ ప్రదర్శించిన ఈ కొత్త ఏఐ ఆర్కిటెక్చర్ పూర్తిగా మల్టీమోడాలిటీకి సపోర్ట్ చేస్తుంది. అంటే ఈ ఏఐ టూల్స్ కేవలం టెక్ట్స్ మాత్రమే కాకుండా మనుషుల వాయిస్, ఇమేజ్ ఆధారిత కమాండ్స్‌ను కూడా సులభంగా అర్థం చేసుకోగలవు. కస్టమర్లు తమ సాధారణ భాషను ఉపయోగించి కేవలం మాటల ద్వారానే కొత్త ఫోటోలను క్రియేట్ చేయవచ్చు లేదా ఉన్న ఫోటోలను అద్భుతంగా ఎడిట్ చేయవచ్చు. దీనితో పాటు ఈ ఏఐ మోడల్స్ వరల్డ్ నాలెడ్జ్ పై ట్రైన్ చేయబడటం వల్ల ప్రపంచానికి సంబంధించిన ఏ విషయాన్నైనా క్షణాల్లో యూజర్లకు అందిస్తాయి.
 

Apple's AI architecture is centred around its foundational AI models
Photo Credit: YouTube/ Apple

OnePlus Ace 7 : ఏకంగా 10,000 mAh బ్యాటరీ.. వన్‌ప్లస్ కొత్త ఫోన్ పవర్ చూస్తే షాక్ అవ్వాల్సిందే

స్క్రీన్ కాంటెక్స్ట్‌ను పసిగట్టే టెక్నాలజీ
ఈ సరికొత్త యాపిల్ ఇంటెలిజెన్స్ మోడల్స్ కస్టమర్ల వ్యక్తిగత అలవాట్లను, గతంలో జరిగిన సంభాషణలను గుర్తుంచుకొని, వారికి నచ్చిన రీతిలో సమాధానాలను అందిస్తాయి. అంతేకాదు, మీ ఫోన్ స్క్రీన్‌పై ప్రస్తుతం ఏముందో కూడా ఇది గ్రహించగలదు. ఉదాహరణకు, మీరు స్క్రీన్‌పై ఏదైనా ఫోటో లేదా వ్యాసం చూస్తూ దాని గురించి సిరిని అడిగితే, అది స్క్రీన్‌ను స్కాన్ చేసి దానికి తగినట్లుగా రియాక్ట్ అవుతుంది. ఆండ్రాయిడ్‌లో గూగుల్ జెమిని చేసే మల్టీ-స్టెప్ టాస్క్ ఆటోమేషన్ లాగే, ఇకపై ఐఫోన్లలో కూడా సిరి మీ తరఫున పనులు చేసిపెడుతుంది. మీరు సిరిని రాబోయే ఫిఫా వరల్డ్ కప్ గురించి అడిగి, ఆ వెంటనే ఏదైనా మ్యాచ్ టికెట్ల కోసం వెతకమని చెబితే అది ఆటోమేటిక్‌గా సెర్చ్ చేసి పెడుతుంది. అలాగే అవసరమైన రిమైండర్లను కూడా సెట్ చేస్తుంది.

సిస్టమ్ ఎక్స్‌పీరియన్స్, పటిష్టమైన భద్రత
ఈ సరికొత్త ఏఐ ఆర్కిటెక్చర్‌లో సిస్టమ్ ఆర్కెస్ట్రేటర్ అనే కీలకమైన కాంపోనెంట్‌ను యాపిల్ జోడించింది. ఇది ఐఫోన్ లోని ఇన్-బిల్ట్ యాప్స్, యాపిల్ సెక్యూరిటీ ఫీచర్లు అన్నీ ఒకదానితో ఒకటి కలిసి సింక్రనైజ్ అయ్యేలా చేస్తుంది. దీనివల్ల ఫోన్ బ్యాక్‌గ్రౌండ్‌లో రన్ అవుతున్న టాస్క్ లేదా యాప్‌ను బట్టి ఏఐ స్పందిస్తుంది. దీనికి యాపిల్ సిస్టమ్ ఎక్స్‌పీరియన్స్ అని పేరు పెట్టింది. దీని సహాయంతో భవిష్యత్తులో సిరి ఏఐ, మీ ఫోన్ లోని యాప్స్ రెండూ కలిసికట్టుగా పనిచేస్తూ కస్టమర్ల స్మార్ట్‌ఫోన్ అనుభవాన్ని సరికొత్త శిఖరాలకు తీసుకెళ్లనున్నాయి.