Huawei Mate 90 : కళ్లు చెదిరే కెమెరాలు, 100W ఫాస్ట్ ఛార్జింగ్.. హువావే సరికొత్త స్మార్ట్‌ఫోన్ సిరీస్ లాంచ్ డేట్ ఫిక్స్

Huawei Mate 90 : ప్రముఖ చైనీస్ స్మార్ట్‌ఫోన్ దిగ్గజం హువావే తన సరికొత్త ఫ్లాగ్‌షిప్ స్మార్ట్‌ఫోన్ సిరీస్‌ను మార్కెట్లోకి తీసుకురావడానికి ముమ్మరంగా ఏర్పాట్లు చేస్తోంది. ప్రముఖ మైక్రోబ్లాగింగ్ ప్లాట్‌ఫారమ్ వీబోలో వచ్చిన లీకుల ప్రకారం.. హువావే మేట్ 90 సిరీస్ రాబోయే సెప్టెంబర్ నెలలో అధికారికంగా లాంచ్ అయ్యే అవకాశం ఉంది. అయితే, హువావే ప్రియులు ఎంతో ఆసక్తిగా ఎదురుచూస్తున్న తదుపరి తరం ఫోల్డబుల్ స్మార్ట్‌ఫోన్ హువావే మేట్ ఎక్స్‌టీ 2 మాత్రం ఈ సిరీస్‌తో పాటు వచ్చే అవకాశాలు చాలా తక్కువగా ఉన్నాయని టిప్‌స్టర్ రూరీరెన్ వెల్లడించారు.

గత ఏడాది నవంబర్ నెలలో కంపెనీ చైనా మార్కెట్లో మేట్ 80 సిరీస్‌ను గ్రాండ్‌గా లాంచ్ చేసింది. ఆ సిరీస్‌లో స్టాండర్డ్ మోడల్‌తో పాటు మేట్ 80 ప్రో, మేట్ 80 ప్రో మాక్స్ మరియు మేట్ 80 ఆర్‌ఎస్ మాస్టర్ ఎడిషన్ వంటి పవర్‌ఫుల్ ఫోన్లు ఉన్నాయి. గత సారి మేట్ 80 సిరీస్‌తో పాటే ఫోల్డబుల్ స్మార్ట్‌ఫోన్‌ను కూడా హువావే ప్రదర్శించింది. కానీ ఈసారి మాత్రం మేట్ 90 సిరీస్‌తో పాటు కొత్త ఫోల్డబుల్ ఫోన్‌ను లాంచ్ చేసే ప్లాన్ ఏదీ కంపెనీకి లేదని తెలుస్తోంది. మరోవైపు, హువావే తన  పురా 90ఎస్ ప్రో, పురా 90ఎస్ ప్రో+ మోడల్స్ లాంచ్ ప్లాన్స్‌ను పూర్తిగా రద్దు చేసుకున్నట్లు సమాచారం.

Lava Agni 4 : అమెజాన్‌లో డిస్కౌంట్ల జాతర.. లావా ఫోన్ కొనడానికి ఇంతకంటే మంచి టైమ్ రాదు

సెప్టెంబర్ నెలలోనే హువావే మేట్ 90 సిరీస్‌ను తీసుకురావడం వెనుక పెద్ద మార్కెట్ వ్యూహమే ఉంది. ఎందుకంటే అదే సమయంలో ప్రముఖ అమెరికన్ బ్రాండ్ ఆపిల్  తన ఐఫోన్ 18 సిరీస్‌ను లాంచ్ చేసే అవకాశం ఉంది. వీటికి నేరుగా పోటీ ఇవ్వడంతో పాటు మార్కెట్లో ఇప్పటికే ఉన్న షియోమీ 18 సిరీస్, ఐకూ 16 ఫోన్లకు గట్టి పోటీ ఇవ్వడానికి హువావే ఈ నిర్ణయం తీసుకుంది. 

ఈ ఏడాది ఫిబ్రవరిలో అంతర్జాతీయ మార్కెట్లోకి వచ్చిన హువావే మేట్ 80 ప్రో ఫీచర్లను ఒకసారి గమనిస్తే.. ఇందులో 6.75 ఇంచుల OLED డిస్‌ప్లే, 120Hz రిఫ్రెష్ రేట్ ఉన్నాయి. కెమెరా పరంగా 50MP ప్రైమరీ కెమెరా (OIS సపోర్ట్‌తో), 40MP అల్ట్రా-వైడ్ కెమెరా, 48MP మ్యాక్రో టెలిఫోటో కెమెరాలతో కూడిన ట్రిపుల్ రియర్ కెమెరా సెటప్ ఉంది. సెల్ఫీల కోసం 13MP వైడ్ యాంగిల్ కెమెరా ఇచ్చారు. అలాగే ఇందులో 5,750mAh బ్యాటరీతో పాటు 100W వైర్డ్ మరియు 80W వైర్‌లెస్ ఫాస్ట్ ఛార్జింగ్ సపోర్ట్ ఉంది. ఇప్పుడు రాబోయే మేట్ 90 సిరీస్ అంతకంటే మెరుగైన, అప్‌గ్రేడెడ్ ఫీచర్లతో మార్కెట్లోకి అడుగుపెట్టనుంది.