Samsung Galaxy F70 Pro : పాత ఫోన్ మార్చేద్దామనుకుంటున్నారా? శాంసంగ్ కొత్త ఫోన్ చూశాకే నిర్ణయం తీసుకోండి

Samsung Galaxy F70 Pro : దక్షిణ కొరియాకు చెందిన ప్రముఖ హ్యాండ్‌సెట్ తయారీ సంస్థ శాంసంగ్ తన మిడ్-రేంజ్ పోర్ట్‌ఫోలియోను విస్తరిస్తూ  శాంసంగ్ గెలాక్సీ F70 ప్రో స్మార్ట్‌ఫోన్‌ను మార్కెట్‌లోకి తీసుకురావడానికి సన్నాహాలు చేస్తోంది. లాంచ్‌కు ముందే ఈ స్మార్ట్‌ఫోన్ ప్రముఖ బెంచ్‌మార్కింగ్, సర్టిఫికేషన్ వేదికలపై దర్శనమిచ్చింది. మోడల్ నంబర్ SM-E476Bతో గీక్‌బెంచ్ ప్లాట్‌ఫారమ్‌లో ఈ ఫోన్ లిస్ట్ చేశారు. దీని ఆధారంగా ఫోన్‌లో ఉపయోగించే చిప్‌సెట్, సాఫ్ట్‌వేర్, పనితీరుకు సంబంధించిన కీలక వివరాలు వెల్లడయ్యాయి.

ప్రాసెసర్, బెంచ్‌మార్క్ స్కోర్‌లు
గీక్‌బెంచ్ లిస్టింగ్ ప్రకారం.. శాంసంగ్ గెలాక్సీ F70 ప్రో స్మార్ట్‌ఫోన్ క్వాల్కమ్ స్నాప్‌డ్రాగన్ 6 Gen 3 ప్రాసెసర్‌తో పనిచేసే అవకాశం ఉంది. గ్రాఫిక్స్ నిర్వహణ కోసం ఇందులో Adreno 710 GPU ఉండవచ్చు. బెంచ్‌మార్కింగ్ పరీక్షల్లో ఈ ఫోన్ గణనీయమైన స్కోర్‌లను సాధించింది. సింగిల్-కోర్ టెస్ట్‌లో 998 పాయింట్లు, మల్టీ-కోర్ టెస్ట్‌లో 3,090 పాయింట్ల స్కోర్‌ను నమోదు చేసింది. సాఫ్ట్‌వేర్ విషయానికి వస్తే.. ఈ ఫోన్ ఆండ్రాయిడ్ 16  ఆధారిత నూతన One UI 8.5 ఆపరేటింగ్ సిస్టమ్‌పై పనిచేయనుంది.

సర్టిఫికేషన్లు, డిజైన్ లీక్స్
గీక్‌బెంచ్‌ కంటే ముందే ఈ స్మార్ట్‌ఫోన్ భారతదేశంలో శాంసంగ్ అధికారిక వెబ్‌సైట్‌తో పాటు బ్యూరో ఆఫ్ ఇండియన్ స్టాండర్డ్స్ (BIS) పోర్టల్‌లో దర్శనమిచ్చింది. దీనివల్ల భారతదేశంలో ఈ ఫోన్ త్వరలోనే విడుదల కానుందని స్పష్టమవుతోంది. దీంతో పాటు మోడల్ నంబర్ SM-E476B/DSతో బ్లూటూత్ SIG డేటాబేస్‌లో కూడా ఇది నమోదైంది. ఇది ఈ ఫోన్ అంతర్జాతీయ వేరియంట్ కావచ్చు. డిజైన్ పరంగా ఈసారి శాంసంగ్ కొత్త రంగుల ఎంపికలను ప్రవేశపెట్టడమే కాకుండా వెనుక వైపు లేదర్ తరహా ప్రీమియం బ్యాక్ ప్యానెల్‌ను అందించే అవకాశం ఉందని లీక్స్ చెబుతున్నాయి.

OnePlus N6x : అఫోర్డబుల్ ప్రైస్‌లో వన్‌ప్లస్ ధమాకా.. 7,000mAh బ్యాటరీ, ఆకట్టుకునే డిజైన్‌తో కొత్త ఫోన్

డిస్‌ప్లే, కెమెరా, బ్యాటరీ సామర్థ్యం
ఈ నూతన స్మార్ట్‌ఫోన్ హార్డ్‌వేర్ స్పెసిఫికేషన్లు ఇటీవల విడుదలైన శాంసంగ్ గెలాక్సీ M47 5Gకి చాలా వరకు సమానంగా ఉండే అవకాశం ఉంది.
* డిస్‌ప్లే: ఇందులో 120Hz రిఫ్రెష్ రేట్, 1,400 నిట్స్ పీక్ బ్రైట్‌నెస్‌తో కూడిన 6.7 అంగుళాల సూపర్‌ అమోలెడ్ డిస్‌ప్లేను అందించవచ్చు.
* కెమెరా: ఫోన్ వెనుక భాగంలో ట్రిపుల్ రియర్ కెమెరా సెటప్ ఉండే అవకాశం ఉంది, ఇందులో ప్రధాన కెమెరా 50 మెగాపిక్సెల్ సెన్సార్‌తో రానుంది.
* బ్యాటరీ, ఛార్జింగ్: రోజంతా నిరంతరాయంగా పనిచేసేందుకు వీలుగా 6,000mAh భారీ బ్యాటరీని అందించనున్నారు. ఇది 45W వేగవంతమైన ఫాస్ట్ ఛార్జింగ్‌ను సపోర్ట్ చేస్తుంది.

అంచనా ధర ఎంత ఉండవచ్చు?
శాంసంగ్ ఇప్పటివరకు ఈ స్మార్ట్‌ఫోన్ లాంచ్ తేదీ లేదా అధికారిక స్పెసిఫికేషన్లను ప్రకటించనప్పటికీ దీనిని ఒక సరసమైన మిడ్-రేంజ్ విభాగంలో విడుదల చేసే అవకాశం ఉంది. నిపుణుల అంచనాల ప్రకారం.. భారత మార్కెట్‌లో శాంసంగ్ గెలాక్సీ F70 ప్రో ధర సుమారు రూ.25,000 వరకు ఉండే అవకాశం ఉంది.