Samsung Galaxy Glasses : కళ్లజోడు పెట్టుకుంటే చాలు.. ప్రపంచాన్నంతా చూసేయొచ్చు.. శామ్‌సంగ్ నుంచి కొత్త స్మార్ట్ గ్లాసెస్

Samsung Galaxy Glasses : సౌత్ కొరియన్ టెక్ దిగ్గజం శామ్‌సంగ్ వేరబుల్స్ టెక్నాలజీ విభాగంలో సరికొత్త అధ్యాయానికి శ్రీకారం చుట్టింది. లండన్‌లో నిర్వహించిన గ్రాండ్ గెలాక్సీ అన్‌ప్యాక్డ్ ఈవెంట్‌లో తన తొలి ఏఐ స్మార్ట్ గ్లాసెస్ శామ్‌సంగ్ గెలాక్సీ గ్లాసెస్‎ను అధికారికంగా ప్రదర్శించింది. ఇటీవల గూగుల్ ఐ/ఓ కాన్ఫరెన్స్‌లో ప్రదర్శించిన ఈ స్మార్ట్ కళ్లజోడును కంపెనీ ఇప్పుడు పూర్తిస్థాయిలో పరిచయం చేసింది. స్టైలిష్ లుక్ కోసం ప్రముఖ ఐవేర్ లైఫ్‌స్టైల్ బ్రాండ్లు వార్బీ పార్కర్, జెంటిల్ మోన్‌స్టర్   భాగస్వామ్యంతో వీటి ఫ్రేమ్‌లను డిజైన్ చేశారు. మార్కెట్లో ఇవి రాయ్-బాన్ మెటా స్మార్ట్ గ్లాసెస్‌కు గట్టి పోటీ ఇవ్వనున్నాయి.

డిజైన్, కెమెరా, ఏఐ ఫీచర్లు
శామ్‌సంగ్ గెలాక్సీ గ్లాసెస్ రెండు రకాల స్టైలిష్ ఫ్రేమ్ ఆప్షన్లలో అందుబాటులోకి రానున్నాయి. ఇందులో బిల్ట్-ఇన్ కెమెరా అమర్చారు. మనం చూసే పరిసరాలను ఈ కెమెరా విశ్లేషించి, దానికి తగినట్లుగా సమాధానాలు ఇచ్చేందుకు గూగుల్ జెమిని ఏఐ అసిస్టెంట్ ఇందులో సహాయపడుతుంది. దీంతో పాటు పెద్ద పెద్ద మెసేజ్‌లను చిన్నగా సమ్మరైజ్ చేసి యూజర్లకు చదివి వినిపిస్తుంది. ఈ గ్లాసెస్ పూర్తిగా హ్యాండ్స్-ఫ్రీ అనుభూతిని అందిస్తాయి. యూజర్లు కేవలం వాయిస్ కమాండ్లు లేదా గ్లాసెస్ టచ్ జెస్టర్ల ద్వారా ఫోన్ కాల్స్ మాట్లాడవచ్చు, పాటలు వినవచ్చు, అలాగే ఫోటోలు కూడా తీయవచ్చు.

Samsung Galaxy Z Fold 8 Launch : 50MP డ్యూయల్ కెమెరా, లైట్ వెయిట్ టైటానియం బాడీ.. శామ్‌సంగ్ నయా ఫోల్డబుల్ ఫోన్ లాంచ్

ప్రాసెసర్, థర్మల్ మేనేజ్‌మెంట్, బ్యాటరీ
ఈ స్మార్ట్ గ్లాసెస్‌లో క్వాల్కమ్ తయారు చేసిన అత్యాధునిక స్నాప్‌డ్రాగన్ AR1 జెన్ 1 చిప్‌సెట్ అందించారు. కళ్లజోడు చిన్నగా ఉన్నప్పటికీ, నిరంతరం పనిచేసేటప్పుడు వేడెక్కకుండా ఉండేలా ప్రత్యేకమైన థర్మల్ మేనేజ్‌మెంట్ సిస్టమ్‌ను ఇందులో అమర్చారు. బ్యాటరీ విషయానికి వస్తే.. ఒక్కసారి ఛార్జ్ చేస్తే ఏకంగా 9 గంటల పాటు నిరంతరాయంగా పనిచేస్తుందని శామ్‌సంగ్ ప్రకటించింది.

 లభ్యత, ఇతర ఉత్పత్తులు
శామ్‌సంగ్ ఈ స్మార్ట్ గ్లాసెస్ ద్వారా హెడ్‌మౌంటెడ్ వేరబుల్స్ రంగంలో అధికారికంగా బిజినెస్ ప్రారంభించింది. ప్రారంభంలో వీటిని ఎంపిక చేసిన అంతర్జాతీయ మార్కెట్లలో విక్రయానికి తీసుకురానున్నారు. అయితే ఈ గ్లాసెస్ ధర, సేల్ డేట్‌కు సంబంధించిన వివరాలను కంపెనీ త్వరలోనే ప్రకటించనుంది. కాగా ఇదే గెలాక్సీ అన్‌ప్యాక్డ్ ఈవెంట్‌లో శామ్‌సంగ్ కంపెనీ గెలాక్సీ Z ఫోల్డ్ 8 సిరీస్ ఫోల్డబుల్ ఫోన్లు, గెలాక్సీ వాచ్ 9, గెలాక్సీ వాచ్ అల్ట్రా 2 స్మార్ట్‌వాచ్‌లను కూడా గ్రాండ్‌గా లాంచ్ చేసింది.