WF-1000XM6లో ANC సామర్థ్యం మధ్య నుండి హై ఫ్రీక్వెన్సీ రేంజ్‌లో గణనీయంగా మెరుగుపడింది.

ప్రపంచ మార్కెట్‌లో Sony WF-1000XM6 అధికారికంగా విడుదలయ్యాయి. జపాన్ టెక్ దిగ్గజం Sony నుంచి వచ్చిన ఈ ట్రూలీ వైర్‌లెస్ స్టీరియో (TWS) ఇయర్‌ఫోన్స్, గత మోడల్ అయిన Sony WF-1000XM5కు సక్సెసర్‌గా మార్కెట్‌లోకి అడుగుపెట్టాయి. పాత వెర్షన్‌తో పోలిస్తే అనేక మెరుగుదలలతో ఈ కొత్త మోడల్ రూపొందించబడింది. ముఖ్యంగా యాక్టివ్ నాయిస్ క్యాన్సిలేషన్ (ANC) విషయంలో సుమారు 25 శాతం మెరుగైన పనితీరును అందిస్తుందని కంపెనీ ప్రకటించింది. ఇందుకు నాలుగు మైక్రోఫోన్లు సహకరిస్తాయి. అమెరికా మార్కెట్‌లో Sony WF-1000XM6 ధర $329.99గా నిర్ణయించారు (సుమారు రూ.

35,500). ప్లాటినం సిల్వర్ మరియు బ్లాక్ రంగుల్లో ఇవి అందుబాటులో ఉన్నాయి. Sony అధికారిక వెబ్‌సైట్‌తో పాటు Amazon, Best Buy వంటి అధీకృత విక్రేతల ద్వారా కొనుగోలు చేయవచ్చు. అయితే భారత్‌లో ఇవి ఎప్పుడు విడుదలవుతాయనే విషయంపై ఇప్పటివరకు కంపెనీ ఎలాంటి ప్రకటన చేయలేదు.

ఈ కొత్త ఇయర్‌ఫోన్స్‌లో డ్యూయల్ ప్రాసెసర్లు ఉన్నాయి. అందులో HD Noise Canceling Processor QN3e మరియు Integrated Processor V2 ముఖ్యమైనవి. 24-bit ప్రాసెసింగ్ ఉన్న పాత మోడల్‌తో పోలిస్తే, ఇప్పుడు 32-bit ప్రాసెసింగ్ సపోర్ట్ అందించబడింది. కొత్తగా డెవలప్ చేసిన డ్రైవర్ యూనిట్‌లో రీడిజైన్ చేసిన డయాఫ్రాగం వలన లోతైన బాస్ మరియు స్పష్టమైన హై ఫ్రీక్వెన్సీలు వినిపిస్తాయి. Hi-Res Audio Wireless, DSEE Extreme, 360 Reality Audio వంటి ఆధునిక ఆడియో ఫీచర్లకు సపోర్ట్ ఉంది. Sony Sound Connect యాప్ ద్వారా 10-బ్యాండ్ ఈక్వలైజర్‌ను వినియోగదారులు తమకు అనుకూలంగా సెటప్ చేసుకోవచ్చు. హెడ్ ట్రాకింగ్ సపోర్ట్, బ్యాక్‌గ్రౌండ్ మ్యూజిక్ ఎఫెక్ట్ వంటి ఫీచర్లు కూడా అందుబాటులో ఉన్నాయి.

WF-1000XM6లో ANC సామర్థ్యం మధ్య నుండి హై ఫ్రీక్వెన్సీ రేంజ్‌లో గణనీయంగా మెరుగుపడింది. QN3e ప్రాసెసర్‌తో పాటు నాలుగు కొత్త మైక్రోఫోన్లు కలిసి శబ్దాన్ని సమర్థవంతంగా తగ్గిస్తాయి. కాల్స్ విషయంలో ప్రతి ఇయర్‌బడ్‌లో రెండు మైక్రోఫోన్లు, ఒక బోన్ కండక్షన్ సెన్సర్ ఇవ్వబడ్డాయి. AI ఆధారిత బీమ్‌ఫార్మింగ్ నాయిస్ రిడక్షన్ అల్గోరిథమ్ వలన శబ్దభరిత వాతావరణంలో కూడా వినియోగదారుడి స్వరాన్ని స్పష్టంగా అందిస్తాయి. ఇయర్‌బడ్ డిజైన్ కూడా మారింది. మన చెవిలో సహజంగా సరిపడేలా వీటిని మళ్లీ డిజైన్ చేసినట్లు Sony తెలిపింది. పాత మోడల్‌తో పోలిస్తే ఇవి సుమారు 11 శాతం సన్నగా ఉంటాయని పేర్కొంది.

WF-1000XM5లో ఉన్న Auto Play, Adaptive Sound Control, Quick Access వంటి అన్ని ఫీచర్లు ఈ కొత్త మోడల్‌లో కూడా కొనసాగుతున్నాయి. అదనంగా, Gemini వాయిస్ అసిస్టెంట్ సపోర్ట్ ఉంది. Gemini Live ద్వారా హ్యాండ్స్-ఫ్రీగా సహజ సంభాషణలు జరపవచ్చు. కనెక్టివిటీ పరంగా మెరుగైన స్థిరత్వం కోసం పాత మోడల్ కంటే ఒకటిన్నర రెట్లు పెద్ద యాంటెనాలను ఉపయోగించినట్లు కంపెనీ పేర్కొంది. Bluetooth LE Audio సపోర్ట్ వలన తక్కువ లేటెన్సీతో ఆడియో అవుట్‌పుట్ లభిస్తుంది.

బ్యాటరీ సామర్థ్యం విషయంలో పెద్ద మార్పు లేదు. సాధారణ వినియోగంలో గరిష్టంగా 12 గంటల వరకు బ్యాటరీ బ్యాకప్ లభిస్తుందని, ANC ఆన్ చేసినప్పుడు అది 8 గంటలకు తగ్గుతుందని Sony తెలిపింది.

USB Type-C ద్వారా లేదా వైర్‌లెస్ ఛార్జింగ్ ద్వారా వీటిని ఛార్జ్ చేయవచ్చు.

IPX4 రేటింగ్ వలన నీటి చినుకుల నుంచి రక్షణ లభిస్తుంది. ఛార్జింగ్ కేస్ పరిమాణం 61.6 x 41.1 x 26.5 మిల్లీమీటర్లు కాగా, బరువు సుమారు 47 గ్రాములు.