Apple : నిద్రపోతే కనిపెట్టే ఆపిల్ వాచ్.. రాత్రి పూట ఎవరైనా గురక పెడితే సాక్ష్యాలతో దొరికిపోవడం ఖాయం

Apple : ప్రముఖ అంతర్జాతీయ టెక్ దిగ్గజం ఆపిల్ తన యూజర్ల కోసం ఒక అద్భుతమైన పండగ లాంటి వార్తను ప్రకటించింది. ఆపిల్ కంపెనీకి చెందిన అత్యంత ప్రతిష్టాత్మకమైన రెండు పెద్ద హెల్త్ ఫీచర్లు ఇప్పుడు అధికారికంగా భారతదేశంలో అందుబాటులోకి వచ్చాయి. ఆపిల్ వాచ్‌లలో ఉండే స్లీప్ అప్నియా నోటిఫికేషన్స్, ఆపిల్ ఎయిర్‌పాడ్స్ ప్రో లో ఉండే హియరింగ్ టెస్ట్ ఫీచర్లను భారత్‌లో రోల్ అవుట్ చేయడానికి భారత ప్రభుత్వ నియంత్రణ సంస్థల నుంచి గ్రీన్ సిగ్నల్ (రెగ్యులేటరీ అప్రూవల్) లభించిందని కంపెనీ గురువారం వెల్లడించింది. చాలామందిలో గుర్తించబడకుండా ఉండిపోయే నిద్రలేమి, వినికిడి లోపం వంటి తీవ్రమైన ఆరోగ్య సమస్యలను ముందే గుర్తించి హెచ్చరించడానికి ఈ ఫీచర్లు ఎంతో అద్భుతంగా సహాయపడతాయి.

నిద్రలోనే ప్రాణం తీసే స్లీప్ అప్నియా 
ప్రపంచవ్యాప్తంగా దాదాపు 100 కోటికి పైగా ప్రజలు స్లీప్ అప్నియా అనే ప్రమాదకరమైన వ్యాధితో బాధపడుతున్నారు. అయితే ఇందులో 80 శాతం మందికి అసలు తమకు ఈ జబ్బు ఉందనే విషయమే తెలియదు. దీనికి సకాలంలో చికిత్స తీసుకోకపోతే భవిష్యత్తులో హైబీపీ, టైప్ 2 డయాబెటిస్, గుండెపోటు వంటి ప్రాణాంతక వ్యాధులు వచ్చే ముప్పు ఉంది. ఇప్పుడు ఈ సమస్యకు ఆపిల్ వాచ్ చెక్ పెట్టనుంది. 18 ఏళ్లు పైబడిన వారు, ఇంతవరకు స్లీప్ అప్నియా ఉన్నట్లు నిర్ధారణ కాని వారు ఈ ఫీచర్‌ను ఉపయోగించుకోవచ్చు.

శ్వాసలో మార్పులను కనిపెట్టే యాక్సిలరోమీటర్ 
ఆపిల్ వాచ్‌లలో ఉండే అత్యంత సున్నితమైన యాక్సిలరోమీటర్ సెన్సార్ ద్వారా మనం నిద్రపోతున్నప్పుడు శ్వాసలో వచ్చే చిన్న చిన్న మార్పులను, అడ్డంకులను ఈ వాచ్ నిరంతరం గమనిస్తూ ఉంటుంది. ఇలా వరుసగా 30 రోజుల పాటు మీ నిద్ర అలవాట్లను, ట్రెండ్స్‌ను విశ్లేషించి.. మీకు ఒకవేళ తీవ్రమైన స్లీప్ అప్నియా లక్షణాలు ఉంటే వెంటనే నోటిఫికేషన్ ద్వారా హెచ్చరిస్తుంది. ఈ అల్గారిథమ్ ప్రతి 30 రోజులకు ఒకసారి ఆటోమేటిక్‌గా రీకాలిబ్రేట్ అవుతుంది. ఈ టెక్నాలజీని రూపొందించడానికి ఆపిల్ సంస్థ వివిధ వయస్సులు, శారీరక నిర్మాణాలు ఉన్న 4,700 మందిపై దాదాపు 11,000 రాత్రుల నిద్ర డేటాను సేకరించి పరిశోధనలు చేసింది.

డాక్టర్లతో పీడీఎఫ్ రిపోర్ట్ షేరింగ్ 
ఆపిల్ వాచ్ మీ నిద్రలో అసాధారణ మార్పులను గుర్తించిన వెంటనే, అది మీ ఐఫోన్‌లోని హెల్త్ యాప్లో ఒక పూర్తి స్థాయి పీడీఎఫ్ హెల్త్ రిపోర్ట్‌ను జనరేట్ చేస్తుంది. ఈ నివేదికలో మీ శ్వాసలో వచ్చిన ఇబ్బందుల వివరాలు గ్రాఫ్‌ల రూపంలో చాలా స్పష్టంగా ఉంటాయి. దీనిని యూజర్లు నేరుగా తమ ఫ్యామిలీ డాక్టర్లకు ఈమెయిల్, వాట్సాప్ లేదా ఇతర మెసేజింగ్ యాప్స్ ద్వారా క్షణాల్లో షేర్ చేయవచ్చు. తద్వారా ఆసుపత్రికి వెళ్లే ముందే ప్రాథమిక అంచనాకు రావడానికి ఇది ఎంతో దోహదపడుతుంది. ఈ ఫీచర్ ఆపిల్ వాచ్ ఎస్ఈ (3వ జెనరేషన్), ఆపిల్ వాచ్ సిరీస్ 9, ఆపై మోడళ్లతో పాటు ఆపిల్ వాచ్ అల్ట్రా 2 మోడళ్లలో పనిచేస్తుంది.

చెవుల వినికిడి శక్తిని పరీక్షించే ఎయిర్‌పాడ్స్ ప్రో 
ఆపిల్ వాచ్ ఫీచర్‌తో పాటు ఆపిల్ తన ఎయిర్‌పాడ్స్ ప్రో (2వ, 3వ జెనరేషన్) యూజర్ల కోసం క్లినికల్-గ్రేడ్ హియరింగ్ టెస్ట్ ఫీచర్‌ను కూడా ఇండియాలో ప్రవేశపెట్టింది. ఐఫోన్ లేదా ఐప్యాడ్‌లోని హియరింగ్ హెల్ప్ సెక్షన్ ద్వారా కేవలం ఐదు నిమిషాల్లోనే యూజర్లు తమ వినికిడి సామర్థ్యాన్ని స్వయంగా పరీక్షించుకోవచ్చు. ఈ టెస్ట్ 250Hz నుంచి 8,000Hz పరిధిలోని ఎనిమిది విభిన్న ఫ్రీక్వెన్సీల శబ్దాల ఆధారంగా పనిచేస్తుంది. ఎయిర్‌పాడ్స్‌లో సౌండ్ వినబడిన ప్రతిసారీ యూజర్లు స్క్రీన్‌పై ట్యాప్ చేయాల్సి ఉంటుంది. ఖచ్చితమైన ఫలితాల కోసం ప్రతి శబ్దాన్ని మూడుసార్లు ప్లే చేస్తారు. అయితే ఈ వినికిడి పరీక్షను మరింత ఖచ్చితత్వంతో చేయడానికి వీలుగా ఎయిర్‌పాడ్స్ మొదట మీ చుట్టుపక్కల ఉన్న శబ్ద కాలుష్యాన్ని అంచనా వేస్తుంది. అలాగే ఇయర్ టిప్ ఫిట్ టెస్ట్ ద్వారా మీ చెవుల్లో ఎయిర్‌పాడ్స్ కరెక్ట్‌గా సెట్ అయ్యాయో లేదో కూడా చెక్ చేస్తుంది.

హాస్పిటల్ లాంటి ఆడియోగ్రామ్ రిపోర్ట్ 
టెస్ట్ పూర్తయిన వెంటనే వినికిడి స్థాయిని డెసిబెల్స్ రూపంలో లెక్కిస్తూ.. హాస్పిటల్స్ ఇచ్చే విధంగా ఒక పూర్తి స్థాయి ఆడియోగ్రామ్ రిపోర్ట్‌ను హెల్త్ యాప్‌లో భద్రపరుస్తుంది. ఈ రిపోర్ట్‌ను కూడా డాక్టర్లతో షేర్ చేసుకోవచ్చు. సంప్రదాయ ఆసుపత్రి పరీక్షలతో పోల్చి చూసినప్పుడు ఈ ఫీచర్ దాదాపు 2dBHL ఖచ్చితత్వంతో ఫలితాలను ఇస్తుందని క్లినికల్ స్టడీస్‌లో రుజువైంది. ప్రస్తుతానికి కేవలం వినికిడి పరీక్ష ఫీచర్ మాత్రమే అందుబాటులోకి వచ్చింది, దీనికి సంబంధించిన  హియరింగ్ ఎయిడ్ ఫీచర్ త్వరలోనే ఇండియాలో విడుదల కానుంది. ఇక ఈ హెల్త్ డేటా భద్రత విషయానికి వస్తే.. ఆపిల్ మీ వ్యక్తిగత డేటాకు అత్యంత ప్రాధాన్యత ఇస్తుంది. ఐఫోన్, ఆపిల్ వాచ్, ఎయిర్‌పాడ్స్ ద్వారా సేకరించే మొత్తం 18 రకాల హెల్త్ కేటగిరీల డేటా పూర్తిగా ఆన్-డివైస్ ప్రాసెసింగ్ ద్వారా ఎన్‌క్రిప్ట్ చేయబడి ఐక్లౌడ్ లో దాచబడుతుంది. ఆఖరికి ఆపిల్ కంపెనీ కూడా మీ హెల్త్ డేటాను ఓపెన్ చేసి చూడలేదు.