Motorola : భారత్‌లో మోటొరోలా మొదటి బుక్-స్టైల్ ఫోల్డబుల్ ఫోన్ సేల్స్ షురూ.. ఫీచర్లు చూస్తే మైండ్ బ్లాంక్

Motorola : ప్రముఖ మొబైల్ తయారీ సంస్థ మోటొరోలా భారత మార్కెట్లో సరికొత్త సంచలనానికి తెరలేపింది. గత వారం దేశీయంగా విడుదలైన మోటొరోలా సరికొత్త ఫ్లాగ్‌షిప్ స్మార్ట్‌ఫోన్ మోటొరోలా రేజర్ ఫోల్డ్ ఇప్పుడు అధికారికంగా కొనుగోలుకు అందుబాటులోకి వచ్చింది. మోటొరోలా బ్రాండ్ నుంచి వస్తున్న మొట్టమొదటి బుక్-స్టైల్ ఫోల్డబుల్ ఫోన్ ఇదే కావడం విశేషం. ఈ ఏడాది మార్చిలో జరిగిన మొబైల్ వరల్డ్ కాంగ్రెస్ వేదికపై మొదటిసారిగా ప్రదర్శించిన ఈ ఫోన్‌ను.. ఇప్పుడు అదిరిపోయే ఫీచర్లు, లాంచ్ ఆఫర్లతో ఇండియన్ మార్కెట్లోకి తీసుకొచ్చారు.

ఈ ప్రీమియం ఫోల్డబుల్ ఫోన్ డిజైన్ పరంగా యాపిల్, సామ్‌సంగ్ కంపెనీల ఫోన్లకు గట్టి పోటీ ఇవ్వనుంది. ఇందులో బయట వైపు 6.6 అంగుళాల కవర్ డిస్‌ప్లే ఉండగా.. ఫోన్ పూర్తిగా తెరిచినప్పుడు లోపల 8.1 అంగుళాల ప్రధాన స్క్రీన్ దర్శనమిస్తుంది. ల్యాప్‌టాప్ లాంటి స్క్రీన్ అనుభూతిని ఇచ్చే ఈ ఫోన్‌లో మల్టీటాస్కింగ్ చాలా స్మూత్‌గా సాగుతుంది. ప్రపంచంలోనే అత్యంత శక్తివంతమైన స్నాప్‌డ్రాగన్ 8 జెన్ 5 ప్రాసెసర్‌తో ఈ ఫోన్ పనిచేస్తుంది. దీనికి తోడు 16 జీబీ వరకు ర్యామ్, సరికొత్త ఆండ్రాయిడ్ 16 ఆపరేటింగ్ సిస్టమ్, రోజంతా ఛార్జింగ్ నిలిచేలా భారీ 6,000mAh బ్యాటరీని ఇందులో అమర్చారు.

భారత్‌లో మోటొరోలా రేజర్ ఫోల్డ్ ధరల వివరాలు
మోటొరోలా రేజర్ ఫోల్డ్ ఫోన్ విభిన్న స్టోరేజ్ ఆప్షన్లలో లభిస్తుంది.
* 12GB ర్యామ్ + 256GB స్టోరేజ్ (బేస్ వేరియంట్): దీని అసలు ధర రూ. 1,49,999.
* 16GB ర్యామ్ + 512GB స్టోరేజ్ (టాప్ వేరియంట్): దీని ధర రూ. 1,59,999.
* ఫిఫా వరల్డ్ కప్ 26 కలెక్షన్ (స్పెషల్ ఎడిషన్): ఈ ప్రత్యేకమైన మోడల్ ధర రూ. 1,69,999 గా నిర్ణయించారు.
ఈ ఫోన్ పాంటోన్ బ్లాకెన్డ్ బ్లూ, పాంటోన్ లిల్లీ వైట్ రంగులలో ప్రముఖ ఈ-కామర్స్ సైట్ ఫ్లిప్‌కార్ట్‌తో పాటు ఎంపిక చేసిన రిటైల్ స్టోర్లలో లభిస్తుంది.

భారీ ధర ఉన్న ఈ ఫోన్‌ను కస్టమర్లకు అందుబాటులోకి తెచ్చేందుకు మోటొరోలా అదిరిపోయే లాంచ్ ఆఫర్లను ప్రకటించింది. ఈ ఫోన్‌ను కొనుగోలు చేసేటప్పుడు బ్యాంక్ కార్డులను ఉపయోగిస్తే రూ.10,000 ఇన్‌స్టంట్ డిస్కౌంట్ లేదా పాత ఫోన్ ఎక్స్ఛేంజ్ చేసుకుంటే రూ.10,000 అదనపు బోనస్ లభిస్తుంది. ఈ ఆఫర్ వర్తింపజేసిన తర్వాత బేస్ వేరియంట్‌ను రూ.1,39,999 కే సొంతం చేసుకోవచ్చు. దీనితో పాటు ప్రముఖ బ్యాంకుల ద్వారా 18 నెలల వరకు ఎలాంటి వడ్డీ లేని నో-కాస్ట్ ఈఎంఐ వసతి కూడా ఉంది. అంతేకాకుండా, జూన్ 20 లోపు ఈ ఫోన్ కొనేవారికి ఒక ఏడాది పాటు చెల్లుబాటయ్యే వన్-టైమ్ ఫ్రీ స్క్రీన్ రీప్లేస్‌మెంట్ ఆఫర్‌ను కూడా కంపెనీ ఉచితంగా ఇస్తోంది.

ఈ ఫోల్డబుల్ ఫోన్ కొనే జియో కస్టమర్ల కోసం రూ. 449 ప్లాన్‌పై ప్రత్యేక ప్రయోజనాలను అందిస్తున్నారు. ఇందులో భాగంగా మూడు నెలల పాటు ఉచిత జియో-హాట్‌స్టార్ సబ్‌స్క్రిప్షన్ లభిస్తుంది. అలాగే క్లౌడ్ స్టోరేజ్ కోసం ఏకంగా 5,000GB స్పేస్ ఇచ్చే జెమిని ప్రో ప్లాన్ ఉచితంగా వస్తుంది. వీటితో పాటు అజియో, తీరా, ఈజ్‌మైట్రిప్ వంటి ప్రముఖ బ్రాండ్ల నుంచి షాపింగ్, ట్రావెల్ క్యాష్‌బ్యాక్ వోచర్లు అదనంగా లభిస్తాయి.