Nokia Asha : నోకియా లవర్స్‌కు గుడ్ న్యూస్.. సరికొత్త అవతారంలో మళ్లీ రాబోతున్న ఐకానిక్ ఆశా సిరీస్

Nokia Asha : నోకియా బ్రాండ్ మొబైళ్లను తయారు చేసే ప్రముఖ సంస్థ హెచ్ఎండీ గ్లోబల్ పాత జ్ఞాపకాలను మళ్లీ రిఫ్రెష్ చేయడానికి సిద్ధమైంది. ఒకప్పుడు మొబైల్ మార్కెట్‌ను ఒక ఊపు ఊపిన నోకియా ఐకానిక్ ఆశా సిరీస్‌ను సరికొత్తగా మార్కెట్లోకి తీసుకురావడానికి కంపెనీ ప్లాన్ చేస్తోంది. తాజా లీకుల ప్రకారం.. కంపెనీ త్వరలోనే  హెచ్ఎండీ ఆశా 505, హెచ్ఎండీ ఆశా 305 మోడళ్లను లాంచ్ చేయబోతున్నట్లు తెలుస్తోంది. ఇందులో ముఖ్యంగా ఆశా 505 స్మార్ట్‌ఫోన్.. పాత నోకియా లూమియా డిజైన్ తరహాలో ఉండబోతోందని సమాచారం. బడ్జెట్ ధరలో బేసిక్ ఫీచర్లు కోరుకునే సామాన్యులను టార్గెట్ చేస్తూ ఈ ఎంట్రీ-లెవెల్ ఫోన్లను డిజైన్ చేస్తున్నారు. అయితే ఈ ఫోన్ల లాంచ్ డేట్ లేదా ధరపై కంపెనీ ఇంకా ఎలాంటి అధికారిక ప్రకటన చేయలేదు.

ప్రముఖ లీకర్ smashx_60 సోషల్ మీడియా వేదికగా హెచ్ఎండీ ఆశా 505 ఫోన్‌కు సంబంధించిన మొదటి లుక్ ఫొటోలను, కొన్ని కీలకమైన స్పెసిఫికేషన్లను లీక్ చేశారు. ఈ లీక్ ప్రకారం.. ఫోన్ వెనుక వైపు ఉన్న కెమెరా మాడ్యూల్ చాలా వరకు పాత నోకియా లూమియా 830 మోడల్‌ను పోలి ఉంది. అయితే దీని ఫ్రంట్ డిజైన్ మాత్రం హెచ్ఎండీ ఇటీవల తీసుకొచ్చిన స్కైలైన్ డిజైన్‌కు భిన్నంగా ఉంది. దీన్ని బట్టి చూస్తే నోకియా బ్రాండ్‌తో ఉన్న పాత సెంటిమెంట్‌ను, వింటేజ్ డిజైన్ లాంగ్వేజ్‌ను హెచ్ఎండీ మళ్లీ ఉపయోగించుకోవాలని చూస్తోందని స్పష్టమవుతోంది. లూమియా సిరీస్ అంటేనే కలర్‌ఫుల్ బాడీతో కస్టమర్లను ఆకట్టుకునేది, ఇప్పుడు అదే మ్యాజిక్‌ను ఆశా సిరీస్‌లో చూపించబోతున్నారు.

Redmi K100 : మొబైల్ మార్కెట్లో రెడ్‌మి సంచలనం.. ఏకంగా 9,000 mAh మెగా బ్యాటరీతో సరికొత్త ఫోన్

లీకైన స్పెసిఫికేషన్ల ప్రకారం.. హెచ్ఎండీ ఆశా 505 ఫోన్ లో 5 ఇంచుల హెచ్‌డీ (720p) డిస్‌ప్లేను ఇవ్వనున్నారు. స్క్రీన్‌కు రక్షణగా ఇందులో బలమైన డ్రాగన్‌టైల్ గ్లాస్ ప్రొటెక్షన్ ఉంటుంది. ఈ ఫోన్ స్క్రీన్ 60Hz రిఫ్రెష్ రేట్‌కు సపోర్ట్ చేస్తుంది. పర్ఫార్మెన్స్ కోసం ఇందులో యూనిసోక్ సంస్థకు చెందిన ఆక్టా-కోర్ ప్రాసెసర్‌ను వాడే అవకాశం ఉంది. సాఫ్ట్‌వేర్ విషయానికి వస్తే.. ఈ స్మార్ట్‌ఫోన్ గూగుల్ తేలికపాటి ఆపరేటింగ్ సిస్టమ్ అయిన ఆండ్రాయిడ్ 14 గో ఎడిషన్ పై రన్ అవుతుంది. దీనివల్ల తక్కువ హార్డ్‌వేర్ ఉన్నప్పటికీ ఫోన్ హ్యాంగ్ అవ్వకుండా చాలా స్మూత్‌గా పనిచేస్తుంది.

కెమెరా, స్టోరేజ్ విషయానికి వస్తే.. ఇందులో ఫోటోల కోసం 8 మెగాపిక్సెల్ రియర్ కెమెరా, సెల్ఫీల కోసం 5 మెగాపిక్సెల్ ఫ్రంట్ కెమెరాను ఇవ్వనున్నారు. బేసిక్ ఫోటోగ్రఫీకి ఇది సరిపోతుంది. అలాగే ఈ మొబైల్ 4GB రామ్, 64GB ఇన్బిల్ట్ స్టోరేజ్‌తో రానుంది. ఫోన్ ఎక్కువ సేపు పనిచేయడానికి వీలుగా ఇందులో 3,000mAh బ్యాటరీని అమర్చారు. సాధారణ ఫీచర్ ఫోన్లలో వాట్సాప్, ఫేస్‌బుక్ లాంటి సోషల్ మీడియా యాప్స్ సరిగ్గా సపోర్ట్ చేయవు. కానీ ఈ కొత్త ఆశా స్మార్ట్‌ఫోన్‌లో అన్ని రకాల సోషల్ మీడియా యాప్స్‌ను చాలా ఈజీగా వాడుకోవచ్చని లీక్‌లో పేర్కొన్నారు.

కనెక్టివిటీ పరంగా ఈ ఫోన్ లో సరికొత్త యూఎస్‌బీ టైప్-సి పోర్ట్, బ్లూటూత్ 5.0, వై-ఫై, హాట్‌స్పాట్, జీపీఎస్, డ్యూయల్ సిమ్ సపోర్ట్ ఉంటాయి. అలాగే పాటలు వినేవారి కోసం 3.5mm ఆడియో జాక్, ఎఫ్‌ఎమ్ రేడియో ఫీచర్లు కూడా ఉన్నాయి. ఫోన్‌కు బేసిక్ ప్రొటెక్షన్ కోసం IP52 రేటింగ్ ఇవ్వనున్నారు. తక్కువ ధరలో స్మార్ట్‌ఫోన్ ఫీచర్లు కావాలనుకునే కస్టమర్లకు ఈ కొత్త హెచ్ఎండీ ఆశా సిరీస్ ఒక బెస్ట్ ఆప్షన్‌గా నిలవనుంది.