Moto Pad 70 Groove set to Launch: జూలై 31న భారత్‌లోకి మోటో ప్యాడ్ 70 గ్రూవ్ ఎంట్రీ.. ఫీచర్లు మామూలుగా లేవుగా..!

Moto Pad 70 Groove Set to Launch on July 31 in India: ప్రసిద్ధ స్మార్ట్‌ఫోన్, గాడ్జెట్స్ తయారీ సంస్థ మోటోరోలా భారతీయ మార్కెట్లోకి ఒక సరికొత్త టాబ్లెట్‌ను లాంచ్ చేసేందుకు సిద్ధమైంది. మోటో ప్యాడ్ 70 గ్రూవ్ పేరుతో రూపుదిద్దుకున్న ఈ టాబ్లెట్ జూలై 31న దేశీయ మార్కెట్లో అధికారికంగా విడుదల కానుంది. ప్రముఖ ఈ-కామర్స్ సంస్థ ఫ్లిప్‌కార్ట్‌లో దీని కోసం ప్రత్యేక మైక్రోసైట్ కూడా అందుబాటులోకి వచ్చింది. గత నెలలోనే లాంచ్ అయిన మోటో ప్యాడ్ 70 సిరీస్ విజయం తర్వాత, ఇప్పుడు మెరుగైన ఆడియో, డిస్ప్లే ఫీచర్లతో ఈ కొత్త మోడల్‌ను పరిచయం చేస్తున్నారు.

అద్భుతమైన డిస్ప్లే, డిజైన్..

మోటో ప్యాడ్ 70 గ్రూవ్ టాబ్లెట్ 12.1 ఇంచుల 2.5K డిస్ప్లేతో వస్తోంది. ఇది 120Hz రిఫ్రెష్ రేట్, డాల్బీ విజన్ సపోర్ట్, 800 నిట్స్ పీక్ బ్రైట్‌నెస్‌ను కలిగి ఉంటుంది. దీనివల్ల ప్రకాశవంతమైన వెలుతురులోనూ కంటెంట్ స్పష్టంగా కనిపిస్తుంది. ఇక డిజైన్ విషయానికి వస్తే.. టాబ్లెట్ వెనుక వైపు మధ్యలో JBL బ్రాండింగ్‌తో కూడిన వృత్తాకార మెష్ గ్రిల్ ఉంది. అంతేకాకుండా, ఇందులో ఇన్-బిల్ట్ ఫోల్డ్-అవుట్ స్టాండ్ ఉంది. దీని సహాయంతో పోర్ట్రెయిట్, ల్యాండ్‌స్కేప్, స్టాండ్, హ్యాంగింగ్, థియేటర్ మోడ్‌లలో టాబ్లెట్‌ను చాలా సులువుగా అమర్చుకోవచ్చు. బ్యాక్ ప్యానెల్‌పైనే వాల్యూమ్ బటన్‌లను అందించడం ఈ టాబ్లెట్ ప్రత్యేకత.

9 స్పీకర్లతో ధియేటర్ లాంటి సౌండ్..

మోటో ప్యాడ్ 70 గ్రూవ్ టాబ్లెట్ ప్రధాన ఆకర్షణ దీని ఆడియో సిస్టమ్. ఇందులో ఏకంగా తొమ్మిది స్పీకర్లు ఉన్న JBL ఆడియో సిస్టమ్‌ను మోటోరోలా అమర్చింది. వీటిలో నాలుగు ట్వీటర్లు, మూడు వూఫర్లు, రెండు ప్యాసివ్ రేడియేటర్లు ఉన్నాయి. 43 cc అకౌస్టిక్ ఛాంబర్, డాల్బీ అట్మోస్ ట్యూనింగ్, హై-రెస్ ఆడియో వైర్‌లెస్ సర్టిఫికేషన్‌తో వచ్చే ఈ ఆడియో సెటప్ గరిష్టంగా 48 W అవుట్‌పుట్‌ను ఇస్తుంది. అంటే సినిమా లేదా పాటలు వినేటప్పుడు హాలులోనే థియేటర్ అనుభూతి లభిస్తుంది.

iPhone 15 : ఫ్లిప్‌కార్ట్‌లో ఐఫోన్ 15 పై భారీ ఆఫర్.. ఏకంగా రూ.26,000 పైగా డిస్కౌంట్

భారీ బ్యాటరీ, ప్రో మోడల్ ఫీచర్లు..

పవర్ బ్యాకప్ కోసం ఇందులో 10,200 mAh భారీ బ్యాటరీని అందించారు. ఒక్కసారి పూర్తి ఛార్జ్ చేస్తే వరుసగా 15 గంటల పాటు వీడియోలు ప్లే చేసుకోవచ్చని కంపెనీ వెల్లడించింది. ఇకపోతే, గత నెలలో విడుదలైన 'మోటో ప్యాడ్ 70 ప్రో' మోడల్ చూస్తే.. అందులో 13 ఇంచుల 3.5K LCD స్క్రీన్ (144Hz రిఫ్రెష్ రేట్), ఆక్టాకోర్ స్నాప్‌డ్రాగన్ 8s Gen 4 ప్రాసెసర్, ఆండ్రాయిడ్ 16 ఆధారిత హలో UI వంటి అగ్రశ్రేణి ఫీచర్లు ఉన్నాయి. ప్రో మోడల్‌లో 13MP రియర్ కెమెరా, 8MP ఫ్రంట్ కెమెరాతో పాటు మైక్రో SD కార్డ్ ద్వారా స్టోరేజ్‌ను 2 TB వరకు పెంచుకునే సదుపాయం ఉంది. కొత్త మోటో ప్యాడ్ 70 గ్రూవ్  కెమెరా, ప్రాసెసర్ వివరాలు లాంచ్‌కు ముందే వెల్లడయ్యే అవకాశముంది.