Redmi Watch 6 Active : తక్కువ ధరలో అద్భుతమైన ఫీచర్లు.. షావోమి నుంచి రెండు కొత్త స్మార్ట్‌వాచ్‌లు

Redmi Watch 6 Active : ప్రముఖ చైనీస్ టెక్ దిగ్గజం షావోమి, తమ పాపులర్ స్మార్ట్‌వాచ్ పోర్ట్‌ఫోలియోను వేగంగా విస్తరిస్తోంది. ఇందులో భాగంగా రెడ్‌మి వాచ్ 6 సిరీస్ కింద రెండు నూతన మోడళ్లను మార్కెట్లోకి తీసుకురావడానికి సన్నాహాలు చేస్తోంది. అవే రెడ్‌మి వాచ్ 6 యాక్టివ్, రెడ్‌మి వాచ్ 6 లైట్. ఈ రెండు స్మార్ట్‌వాచ్‌లు అధికారికంగా ఆవిష్కృతం కావడానికి ముందే వాటి డిజైన్, కలర్ ఆప్షన్లు, ధర, కీలక స్పెసిఫికేషన్లకు సంబంధించిన వివరాలు లీక్ అయ్యాయి.  

లాంచ్, రంగుల వివరాలు
విశ్వసనీయ సమాచారం ప్రకారం.. ఈ రెండు మోడళ్లను షావోమి ముందుగా ఎంపిక చేసిన ఐరోపా దేశాల్లో విడుదల చేసేందుకు ప్రణాళిక రచిస్తోంది. అయితే వీటి కచ్చితమైన లాంచ్ తేదీని, ఇతర ప్రాంతాల పేర్లను కంపెనీ ఇంకా అధికారికంగా వెల్లడించలేదు. ఇక రంగుల విషయానికి వస్తే.. రెడ్‌మి వాచ్ 6 యాక్టివ్ బ్లాక్, పింక్ షేడ్స్‌లో అందుబాటులోకి రానుండగా, రెడ్‌మి వాచ్ 6 లైట్ మోడల్ బ్లాక్, సిల్వర్ మెటాలిక్ షేడ్స్‌లో దర్శనమిచ్చింది.  

ధర, డిజైన్ ఎలా ఉండబోతోంది?  
యూరోపియన్ మార్కెట్‌లో రెడ్‌మి వాచ్ 6 యాక్టివ్ ధర EUR 50 (భారత కరెన్సీలో సుమారు రూ.5,500)గా ఉండవచ్చని సమాచారం. మరోవైపు కాస్త అప్‌గ్రేడెడ్ ఫీచర్లతో వచ్చే రెడ్‌మి వాచ్ 6 లైట్ ధర EUR 60 (సుమారు రూ.6,600)గా ఉండే అవకాశం ఉంది. ఈ రెండింటిలోనూ ఒకే రకమైన మెటల్ ఛాసిస్, కుడివైపున సులభంగా నావిగేట్ చేయడానికి వీలుగా ఉండే బటన్, మార్చుకోవడానికి వీలుండే సిలికాన్ స్ట్రాప్‌లను అందించనున్నారు.

CP Plus CarKam 4G Dashcam : కార్ల భద్రత కోసం కొత్త డ్యాష్‌క్యామ్ సిరీస్.. సీపీ ప్లస్ నుంచి అద్భుతమైన గ్యాడ్జెట్ 

రెడ్‌మి వాచ్ 6 యాక్టివ్ ఫీచర్లు  
రెడ్‌మి వాచ్ 6 యాక్టివ్ మోడల్‌లో 390x390 పిక్సెల్స్ రిజల్యూషన్ కలిగిన 1.85-అంగుళాల అమోలెడ్ డిస్‌ప్లేను అమర్చారు. స్మార్ట్‌ఫోన్ రహితంగా నేరుగా మాట్లాడుకోవడానికి వీలుగా బ్లూటూత్ 5.3 కనెక్టివిటీ ఆధారిత బ్లూటూత్ కాలింగ్ సదుపాయం ఇందులో ఉంటుంది. ఆరోగ్యానికి సంబంధించి హార్ట్ రేట్ మానిటరింగ్, SpO2 (బ్లడ్ ఆక్సిజన్) ట్రాకింగ్, స్లీప్ ట్రాకింగ్, ప్రయాణించిన దూరం, క్యాలరీ బర్న్, రోజూ వేసే అడుగులను లెక్కించే పెడోమీటర్ వంటి మల్టీ ఫంక్షనల్ హెల్త్ సెన్సార్లు ఇందులో ఉన్నాయి. దీనిలో 470mAh సామర్థ్యం గల బ్యాటరీని అందించారు.  

రెడ్‌మి వాచ్ 6 లైట్ ఫీచర్లు  
మరొక మోడల్ అయిన రెడ్‌మి వాచ్ 6 లైట్‌లో కాస్త పెద్దదైన 1.96-అంగుళాల అమోలెడ్ డిస్‌ప్లేను అందించనున్నారు. యాక్టివ్ మోడల్‌లాగే దీనిలో కూడా సుదీర్ఘ బ్యాటరీ లైఫ్‌ను అందించే 470mAh బ్యాటరీయే ఉంటుంది. హెల్త్ ట్రాకింగ్ విషయంలో హార్ట్ రేట్, ఆక్సిజన్ లెవెల్స్, స్లీప్ సైకిల్స్, క్యాలరీల రికార్డింగ్ వంటి అన్ని కీలకమైన హెల్త్ ఫీచర్లను దీనిలో పొందుపరిచారు. త్వరలోనే కంపెనీ వీటి గ్లోబల్ లాంచ్ వివరాలను వెల్లడించే అవకాశముంది.