5G Network : ఫోన్‌లో సిగ్నల్ సరిగ్గా లేదా? మీ ఏరియాలో 5G నెట్‌వర్క్ కవరేజ్ ఎలా ఉందో ఈజీగా చెక్ చేసుకోండి

5G Network : మొబైల్ ఫోన్ వాడుతున్నప్పుడు నెట్‌వర్క్ సిగ్నల్స్ సరిగ్గా లేకపోతే ఎన్నో ఇబ్బందులు ఎదురవుతాయి. పదే పదే కాల్స్ కట్ అవ్వడం, ఇంటర్నెట్ స్పీడ్ చాలా దారుణంగా పడిపోవడం వంటి సమస్యలు మనల్ని విసిగిస్తాయి. ముఖ్యంగా ఏదైనా అత్యవసర సమయంలో ఒకరికి కాల్ చేయాలన్నా లేదా గూగుల్‌లో ఏదైనా అర్జెంటుగా సెర్చ్ చేయాలన్నా స్థిరమైన నెట్‌వర్క్ కనెక్టివిటీ చాలా అవసరం. ఇలాంటి పరిస్థితుల్లో మీరు ఉంటున్న నగరంలో లేదా మీరు కొత్తగా ఏదైనా ఊరికి ప్రయాణమై వెళ్తున్నప్పుడు, అక్కడ ఏ ఏరియాలో సిగ్నల్ బాగుంది, ఎక్కడ నెట్‌వర్క్ తక్కువగా ఉందనే విషయం ముందే తెలుసుకోవడం చాలా మంచిది. దీనికోసం భారతదేశంలోని ప్రముఖ టెలికాం కంపెనీలైన రిలయన్స్ జియో, ఎయిర్‌టెల్, వొడాఫోన్ ఐడియా తమ వెబ్ పోర్టల్స్ ద్వారా ఆన్‌లైన్‌లోనే 5G నెట్‌వర్క్ కవరేజ్ చెక్ చేసుకునే సదుపాయాన్ని వినియోగదారులకు కల్పిస్తున్నాయి.

నెట్‌వర్క్ బార్స్ ఇచ్చేది అరకొర సమాచారమే 
సాధారణంగా ఏదైనా ఒక నిర్దిష్ట ప్రాంతంలో 5G నెట్‌వర్క్ ఎలా ఉందో తెలుసుకోవాలంటే మనం నేరుగా ఆ ప్లేస్‌కి వెళ్లడం కుదరని పని. అందుకే కంపెనీలు అందిస్తున్న ఈ డిజిటల్ పోర్టల్స్ కస్టమర్లకు ఎంతో సహాయపడతాయి. ఈ ఆన్‌లైన్ పోర్టల్స్ సబ్‌స్క్రైబర్ల కోసం ప్రత్యేకమైన  కలర్-కోడెడ్ ఇంటరాక్టివ్ మ్యాప్స్‌ను ప్రదర్శిస్తాయి. సాధారణంగా మన మొబైల్ స్క్రీన్ పైన కనిపించే నెట్‌వర్క్ పాయింట్లు లేదా బార్స్ అనేవి సిగ్నల్ ఎంత బలంగా ఉందో పూర్తి సమాచారాన్ని చూపించలేవు. కానీ ఈ ఆన్‌లైన్ మ్యాప్స్ ద్వారా మీ వీధిలో లేదా మీ ఇంటి చుట్టుపక్కల సిగ్నల్ కవరేజ్ ఎలా ఉందో క్లియర్ గ్రిడ్‌తో సహా స్పష్టంగా తెలుసుకోవచ్చు. మీ నగరంలో లేదా మీరు వెళ్లే టూర్ ప్లేస్‌లో జియో, ఎయిర్‌టెల్, Vi నెట్‌వర్క్‌లను ఎలా చెక్ చేయాలో ఇప్పుడు స్టెప్ బై స్టెప్ ప్రాసెస్ చూద్దాం.

జియో 5G ఆన్‌లైన్ కవరేజ్ మ్యాప్స్ ఇలా చెక్ చేయండి 
* మొదటిగా మీరు జియో (Jio) అధికారిక నెట్‌వర్క్ కవరేజ్ పోర్టల్ వెబ్‌సైట్‌ను ఓపెన్ చేయాలి.
* వెబ్‌సైట్ ఓపెన్ అయ్యాక స్క్రీన్ పైన ఎడమ చేతి వైపు పైభాగంలో (టాప్-లెఫ్ట్ కార్నర్) మీకు 4G + 5G, 5G లేదా 4G అనే ఆప్షన్లు కనిపిస్తాయి. మీకు ఏ సమాచారం కావాలో దానిని ఎంచుకోవాలి.
* ఒకవేళ మీరు కేవలం జియో 5G నెట్‌వర్క్ కవరేజ్ మాత్రమే చూడాలనుకుంటే, అక్కడ ఉన్న '5G' బటన్ పైన క్లిక్ చేయాలి.
* ఇప్పుడు అక్కడ కనిపించే సెర్చ్ బాక్స్‌లో మీ ఏరియా పేరు లేదా మీ ప్రాంతానికి సంబంధించిన పిన్ కోడ్ ఎంటర్ చేసి నెట్‌వర్క్ స్టేటస్ చూడవచ్చు.
* ఇది కాకుండా మీ ఫోన్ లేదా లాప్‌టాప్‌లో జీపీఎస్ లొకేషన్ పర్మిషన్ ఆన్ చేసి, యూజ్ యువర్ కరెంట్ లొకేషన్ బటన్ నొక్కడం ద్వారా మీరు ఉన్న చోటే లైవ్ సిగ్నల్ వివరాలు పొందవచ్చు.

ఎయిర్‌టెల్ 5G నెట్‌వర్క్ మీ ఇంట్లో వస్తుందా?  
* దీనికోసం ముందుగా మీరు ఎయిర్‌టెల్ నెట్‌వర్క్ కవరేజ్ అఫీషియల్ పోర్టల్‌ను విజిట్ చేయాలి.
* ఈ పోర్టల్‌లో ఎయిర్‌టెల్ సంస్థ తన 2G, 4G మరియు 5G నెట్‌వర్క్‌లకు సంబంధించిన వేర్వేరు సమాచారాన్ని అందిస్తుంది. మీరు చెక్ చేయాలనుకుంటున్న నెట్‌వర్క్‌ను సెలెక్ట్ చేసుకోవాలి.
* ఇందులో ఎయిర్‌టెల్ 5G కవరేజ్ వివరాల కోసం ఆకుపచ్చ రంగులో (గ్రీన్ కలర్) హైలైట్ అయి కనిపించే '5G' బటన్ పైన క్లిక్ చేయాల్సి ఉంటుంది.
* ఆ తర్వాత అక్కడ ఉన్న టెక్స్ట్ బాక్స్‌లో మీ అడ్రస్ గానీ లేదా ఆ ఏరియా పిన్ కోడ్ గానీ టైప్ చేసి సిగ్నల్ స్ట్రెంగ్త్ తెలుసుకోవచ్చు.
* మీ కరెంట్ లొకేషన్ ఆధారంగా మ్యాప్ చూడాలనుకుంటే జీపీఎస్ పర్మిషన్ ఇచ్చి 'యూజ్ యువర్ కరెంట్ లొకేషన్' ఆప్షన్ ఉపయోగించుకోవచ్చు.

వోడాఫోన్ ఐడియా (Vi) యూజర్లకు గుడ్ న్యూస్ 
వోడాఫోన్ ఐడియా (Vi) సిగ్నల్స్, 5G నెట్‌వర్క్ పరిధిని ఆన్‌లైన్ మ్యాప్‌లో చెక్ చేయడానికి ఈ సింపుల్ స్టెప్స్ ఫాలో అవ్వండి:
* మొదటగా వోడాఫోన్ ఐడియా అధికారిక వి (Vi) కవరేజ్ పోర్టల్ పేజీకి వెళ్లాలి.
* వెబ్‌సైట్ లోపలికి వెళ్ళిన తర్వాత స్క్రీన్ కింద భాగంలో ఎడమ వైపు (బాటమ్-లెఫ్ట్ కార్నర్) ఒక డ్రాప్-డౌన్ మెనూ కనిపిస్తుంది, దానిపై క్లిక్ చేయాలి.
* ఆ మెనూలో మీకు కావాల్సిన నెట్‌వర్క్ రకాన్ని ఎంచుకోవాల్సి ఉంటుంది. మీరు కేవలం 5G కవరేజ్ వివరాలు మాత్రమే చూడాలనుకుంటే అక్కడ ఉన్న '5G' బటన్ పైన టాప్ చేయాలి.
* ఇప్పుడు అక్కడ ఇచ్చిన సెర్చ్ బాక్స్‌లో మీ పూర్తి చిరునామా (అడ్రస్) లేదా మీ ఏరియా యొక్క పిన్ కోడ్ నమోదు చేయాలి.
* మీ మొబైల్ లో లొకేషన్ సర్వీసెస్ ఆన్ చేసి ఉంటే, 'యూజ్ యువర్ కరెంట్ లొకేషన్' బటన్ ప్రెస్ చేయడం ద్వారా మీ ప్రస్తుత ప్రాంతంలో వోడాఫోన్ ఐడియా 5G కనెక్టివిటీ ఎలా ఉందో మ్యాప్ రూపంలో సులభంగా చూసుకోవచ్చు.