Ola : సర్వీస్ లోపాలను సరిదిద్దుకుని మరీ సూపర్‌హిట్.. కస్టమర్ల నమ్మకాన్ని గెలుచుకున్న ఓలా స్కూటర్స్

Ola : భారతదేశపు ప్రముఖ ఎలక్ట్రిక్ టూ-వీలర్ తయారీ సంస్థ ఓలా ఎలక్ట్రిక్ మార్కెట్లో తన పట్టును మరింత బలోపేతం చేసుకుంది. గత కొన్ని నెలలుగా అమ్మకాల పరంగా సరికొత్త రికార్డులను సృష్టిస్తూ దూసుకుపోతోంది. అధికారిక లెక్కల ప్రకారం.. జూన్ నెలలో ఓలా ఎలక్ట్రిక్ రికార్డు స్థాయిలో ఏకంగా 16,144 ఎలక్ట్రిక్ వాహనాలను విక్రయించింది. ఇటీవలి కాలంలో కంపెనీ నమోదు చేసిన అత్యుత్తమ నెలవారీ అమ్మకాలు ఇవే కావడం విశేషం. గతంలో తమ సర్వీస్, కస్టమర్ కేర్ విభాగంలో ఉన్న లోపాలను గుర్తించిన కంపెనీ, వాటిని వేగంగా అధిగమించి కస్టమర్లకు మెరుగైన సేవలు అందించడం వల్లే ఈ స్థాయిలో అమ్మకాలు పెరిగాయని మార్కెట్ నిపుణులు చెబుతున్నారు.

తొలి త్రైమాసికంలో డబుల్ గ్రోత్..  
ప్రభుత్వ అధికారిక వాహన్ పోర్టల్ రిజిస్ట్రేషన్ డేటా ప్రకారం.. ఈ ఆర్థిక సంవత్సరం మొదటి త్రైమాసికంలో (ఏప్రిల్-జూన్) ఓలా ఎలక్ట్రిక్ మొత్తం 43,719 యూనిట్లను విక్రయించింది. గత ఆర్థిక సంవత్సరం ఇదే కాలంలో కంపెనీ కేవలం 22,252 యూనిట్లను మాత్రమే విక్రయించగలిగింది. అంటే గత ఏడాదితో పోలిస్తే ఈసారి అమ్మకాలు దాదాపు రెట్టింపు అయ్యాయి. ఈ ఘనతపై ఓలా ఎలక్ట్రిక్ ప్రతినిధి మాట్లాడుతూ.. కంపెనీ ఎదుగుదల ప్రయాణంలో ఈ ఆర్థిక సంవత్సరం మొదటి త్రైమాసికం అత్యంత కీలకమైనదని కొనియాడారు. కేవలం అమ్మకాలే కాకుండా తమ ప్రొడక్ట్ పోర్ట్‌ఫోలియోను కూడా కస్టమర్ల అభిరుచులకు తగ్గట్టుగా అప్‌గ్రేడ్ చేశామని ఆయన తెలిపారు.

బ్యాటరీ టెక్నాలజీ కోసం రూ.2,000 కోట్ల భారీ పెట్టుబడి 
భవిష్యత్తులో ఈవీ మార్కెట్లో తిరుగులేని శక్తిగా ఎదగడానికి ఓలా ఎలక్ట్రిక్ ఒక భారీ ఇన్వెస్ట్‌మెంట్ ప్లాన్‌ను ప్రకటించింది. కొత్త ప్రొడక్టుల లాంచ్, సొంతంగా బ్యాటరీ టెక్నాలజీని డెవలప్ చేయడం, మాన్యుఫ్యాక్చరింగ్ పెంచడం కోసం ఏకంగా రూ.2,000 కోట్లను పెట్టుబడిగా పెట్టనున్నట్లు సంస్థ వెల్లడించింది. ఈ భారీ మొత్తాన్ని ఓలా ఎలక్ట్రిక్‌కు చెందిన రెండు అనుబంధ సంస్థలు - ఓలా సెల్ టెక్నాలజీస్, ఓలా ఎలక్ట్రిక్ టెక్నాలజీస్లలో ఇన్వెస్ట్ చేయనున్నారు. ఈ రెండు సబ్సిడరీ కంపెనీలలో ఓలా ఎలక్ట్రిక్‌కు 100 శాతం వాటా ఉండటం గమనార్హం.

Citizen Watches : స్పైడర్ మ్యాన్ థీమ్‌తో సిటిజన్ నయా వాచ్.. కామిక్ లవర్స్ కోసం స్పెషల్ డిజైన్!

మార్కెట్లోకి ఎక్కువ రేంజ్ ఇచ్చే S1 X+ స్కూటర్ 
ఓలా ఎలక్ట్రిక్ శ్రేణిలో అత్యంత ప్రజాదరణ పొందుతున్న S1 X+ (5.2 kWh) మోడల్ ఎలక్ట్రిక్ స్కూటర్ తాజాగా ఒక కీలకమైన మైలురాయిని అందుకుంది. ఈ స్కూటర్‌కు సెంట్రల్ మోటర్ వెహికల్ రూల్స్ కింద  ఇంటర్నేషనల్ సెంటర్ ఫర్ ఆటోమోటివ్ టెక్నాలజీ(ICAT) నుంచి అధికారిక అప్రూవల్ లభించింది. ఓలా టూ-వీలర్ పోర్ట్‌ఫోలియోలోనే అత్యధిక రేంజ్ ఇచ్చే మోడల్‌గా ఇది గుర్తింపు పొందింది. ఈ సరికొత్త స్కూటర్‌లో 11 kW పవర్‌ఫుల్ మిడ్-డ్రైవ్ మోటార్‌తో పాటు ఇంటిగ్రేటెడ్ మోటర్ కంట్రోల్ యూనిట్‌ను అమర్చారు. భద్రత కోసం ఇందులో అడ్వాన్స్‌డ్ బ్రేక్-బై-వైర్ టెక్నాలజీ, ఫ్రంట్ డిస్క్ బ్రేక్ సెటప్‌ను కూడా ఇచ్చారు.

ఓలా నుంచి రోడ్‌స్టర్ బైక్ కూడా రెడీ 
పవర్, స్పీడ్ పరంగా ఓలా ఎలక్ట్రిక్ ఎస్1 ఎక్స్ ప్లస్ (5.2 kWh) మోడల్ గరిష్టంగా గంటకు 125 కిలోమీటర్ల (125 kmph) టాప్ స్పీడ్‌తో దూసుకెళ్తుంది. ప్రస్తుతం ఓలా కంపెనీ కస్టమర్ల బడ్జెట్, అవసరాలకు అనుగుణంగా విభిన్న శ్రేణిలో ఎలక్ట్రిక్ స్కూటర్లను విక్రయిస్తోంది. ఇందులో ఎస్1 ప్రో ప్లస్ (S1 Pro+), ఎస్1 ప్రో (S1 Pro), విభిన్న బ్యాటరీ ఆప్షన్లతో లభించే ఎస్1 ఎక్స్ సిరీస్ మోడళ్లు ఉన్నాయి. స్కూటర్లతో పాటు బైక్ లవర్స్ కోసం ఓలా కంపెనీ తన సరికొత్త ఎలక్ట్రిక్ మోటార్ సైకిల్  రోడ్‌స్టర్ ను కూడా మార్కెట్లోకి తెచ్చి టూ-వీలర్ విభాగంలో సరికొత్త బెంచ్‌మార్క్ క్రియేట్ చేస్తోంది.