Government Apps : ప్రభుత్వ ఆఫీసుల చుట్టూ తిరిగే పని లేదు.. మీ ఫోన్లో కచ్చితంగా ఉండాల్సిన టాప్ 10 యాప్స్ ఇవే

Government Apps : ప్రస్తుత డిజిటల్ యుగంలో కేంద్ర, రాష్ట్ర ప్రభుత్వాలు దాదాపు అన్ని రకాల ప్రజా సేవలను మొబైల్ స్క్రీన్‌ పైకే తీసుకొచ్చాయి. ఒకప్పుడు చిన్న పని కావాలన్నా ప్రభుత్వ కార్యాలయాల చుట్టూ రోజులు, వారాల తరబడి తిరగాల్సి వచ్చేది. కానీ, ఇప్పుడు ఆధార్ కార్డు డౌన్‌లోడ్ చేసుకోవడం దగ్గరి నుండి.. డ్రైవింగ్ లైసెన్స్ చూపించడం, యూపీఐ పేమెంట్లు చేయడం, రైలు ప్రయాణాల్లో ఫిర్యాదులు ఇవ్వడం, సంక్షేమ పథకాల సమాచారం తెలుసుకోవడం వరకు అన్నీ ఇంట్లోనే కూర్చుని చేసుకోవచ్చు. అయితే ఇప్పటికీ చాలా మందికి ఈ అధికారిక యాప్‌ల గురించి తెలియదు. మీ ఫోన్లో ఈ యాప్స్ లేకపోతే చిన్న పనులకు కూడా సమయం, కాగితాల ఖర్చు పెరుగుతుంది. మన రోజువారీ జీవితాన్ని ఎంతో సులభతరం చేసే ఆ 10 అద్భుతమైన ప్రభుత్వ యాప్‌ల గురించి ఇప్పుడు వివరంగా తెలుసుకుందాం.

1. డిజీలాకర్  
మీరు బయటకు వెళ్లినప్పుడు ఆధార్ కార్డు, డ్రైవింగ్ లైసెన్స్, ఆర్సీ లేదా ఎడ్యుకేషన్ మార్క్‌షీట్లను వెంట పట్టుకెళ్లాల్సిన అవసరం లేకుండా చేసే అద్భుతమైన యాప్ ఇది. ఈ కేంద్ర ప్రభుత్వ యాప్‌లో మీ అన్ని రకాల అధికారిక పత్రాలను డిజిటల్ రూపంలో భద్రపరుచుకోవచ్చు. ట్రాఫిక్ పోలీసులు అడిగినప్పుడు లేదా ఎక్కడైనా ఐడీ ప్రూఫ్ చూపించాల్సి వచ్చినప్పుడు ఈ యాప్‌లోని డాక్యుమెంట్లను చూపిస్తే సరిపోతుంది. చట్టబద్ధంగా వీటికి ఒరిజినల్ పత్రాలతో సమానమైన గుర్తింపు ఉంటుంది.

2. ఉమాంగ్ 
కేంద్ర, వివిధ రాష్ట్ర ప్రభుత్వాలకు చెందిన వందలాది సేవలను ఒకే గొడుగు కిందకు తెచ్చిన సూపర్ యాప్ ఇది. ఈ యాప్ ద్వారా మీ పీఎఫ్ బ్యాలెన్స్ చెక్ చేసుకోవడం, కొత్త పాన్ కార్డు కోసం అప్లై చేయడం, గ్యాస్ సిలిండర్ బుక్ చేసుకోవడం, కరెంట్ బిల్లులు చెల్లించడం, ప్రభుత్వ హెల్త్ స్కీమ్‌ల వివరాలు తెలుసుకోవడం వంటి ఎన్నో పనులను ఒకే లాగిన్‌తో పూర్తి చేసుకోవచ్చు.

3. ఆధార్ యాప్ 
మీ ఆధార్ కార్డుకు సంబంధించిన అన్ని సేవలను మొబైల్ లోనే పొందడానికి ఇది భారత విశిష్ట గుర్తింపు ప్రాధికార సంస్థ అందించిన అధికారిక యాప్. దీని ద్వారా మీ ఆధార్ కార్డు డిజిటల్ కాపీని ఎల్లప్పుడూ ఫోన్లో ఉంచుకోవచ్చు, వర్చువల్ ఐడీని జనరేట్ చేయవచ్చు. మీ ఆధార్ బయోమెట్రిక్ డేటాను సురక్షితంగా లాక్ లేదా అన్‌లాక్ చేసుకునే సదుపాయం కూడా ఇందులో ఉంటుంది.

4. భీమ్ 
ప్రైవేట్ కంపెనీల యాప్‌ల గందరగోళం, ఎలాంటి అదనపు ప్రకటనలు లేకుండా కేవలం డబ్బులు పంపడానికి, రిసీవ్ చేసుకోవడానికి కేంద్ర ప్రభుత్వం రూపొందించిన అధికారిక యూపీఐ యాప్ ఇది. దీని ఇంటర్‌ఫేస్ చాలా సింపుల్‌గా ఉంటుంది. దీని ద్వారా నేరుగా బ్యాంక్ ఖాతాల నుంచి కస్టమర్లు సురక్షితంగా నగదు బదిలీలు చేసుకోవచ్చు.

5. ఎమ్-పరివాహన్ 
మీరు బైక్ లేదా కారు నడుపుతుంటే మీ ఫోన్లో ఖచ్చితంగా ఉండాల్సిన యాప్ ఇది. మీ డ్రైవింగ్ లైసెన్స్, కారు లేదా బైక్ ఆర్సీ‎ల డిజిటల్ కాపీలను ఇందులో డౌన్‌లోడ్ చేసి పెట్టుకోవచ్చు. రోడ్డుపై వెళ్లేటప్పుడు ఒరిజినల్ పత్రాలు మర్చిపోయినా, పోలీసులు ఆపినప్పుడు ఈ యాప్ లోని వివరాలు చూపిస్తే చెల్లుబాటు అవుతుంది. అంతేకాకుండా ఏదైనా వాహనం నంబర్ ఎంటర్ చేసి దాని యజమాని వివరాలు కూడా ఇందులో తెలుసుకోవచ్చు.

6. రైల్ మదద్  
భారతీయ రైల్వే ప్రయాణికుల కోసం ప్రత్యేకంగా తీసుకొచ్చిన యాప్ ఇది. రైలు ప్రయాణంలో మీకు కోచ్‌లో క్లీనింగ్ కావాలన్నా, భద్రతా సమస్యలు ఉన్నా, క్యాటరింగ్ బాగోలేకపోయినా లేదా రైల్వే సిబ్బందితో ఏదైనా ఇబ్బంది వచ్చినా నేరుగా ఈ యాప్ ద్వారా కంప్లైంట్ చేయవచ్చు. మీ ఫిర్యాదు ఏ స్టేజీలో ఉందో కూడా లైవ్‌లో ట్రాక్ చేసే సదుపాయం ఇందులో ఉంది.

7. ఐఆర్‌సీటీసీ రైల్ కనెక్ట్ 
రైలు ప్రయాణాల కోసం ఆన్‌లైన్ లో కన్ఫర్మ్డ్ టికెట్లు బుక్ చేసుకోవడానికి ఇది భారతీయ రైల్వే వారి అధికారిక యాప్. దీని ద్వారా చాలా సులభంగా రైలు సీట్ల లభ్యతను తనిఖీ చేయవచ్చు, టికెట్ బుకింగ్, క్యాన్సిలేషన్ చేసుకోవచ్చు. అంతేకాకుండా మీ పీఎన్ఆర్ స్టేటస్, మీరు ప్రయాణించాల్సిన రైలు ప్రస్తుతం ఎక్కడ ఉందో లైవ్ రన్నింగ్ స్టేటస్ కూడా ఇందులో చూడవచ్చు.

8. అభా యాప్  
ఆయుష్మాన్ భారత్ డిజిటల్ మిషన్ కింద ప్రతి పౌరుడికి డిజిటల్ హెల్త్ ఐడీని క్రియేట్ చేయడానికి ప్రభుత్వం ఈ యాప్‌ను తీసుకొచ్చింది. ఈ యాప్ ద్వారా మీ మెడికల్ రిపోర్టులు, డాక్టర్ ప్రిస్క్రిప్షన్లు, ల్యాబ్ రిపోర్టులను ఒకే చోట డిజిటల్ ఫార్మాట్‌లో భద్రపరుచుకోవచ్చు. దీనివల్ల హాస్పిటల్‌కు వెళ్ళినప్పుడు పాత కాగితాల కట్టలను మోసుకెళ్లే అవసరం తప్పుతుంది.

9. మైగవ్ 
దేశ పౌరులు ప్రభుత్వానికి తమ విలువైన సూచనలు, సలహాలు అందించడానికి, సరికొత్త ప్రభుత్వ సర్వేలలో పాల్గొనడానికి ఇది ఒక అధికారిక వేదిక. కేంద్ర ప్రభుత్వం ప్రవేశపెట్టే కొత్త పథకాలు, నిర్ణయాల గురించిన తాజా సమాచారం ఇందులో లభిస్తుంది. అంతేకాకుండా ఇందులో నిర్వహించే వివిధ క్విజ్ పోటీలలో పాల్గొని బహుమతులు, సర్టిఫికెట్లు కూడా గెలుచుకోవచ్చు.

10. ఫాస్ట్‌ట్యాగ్ 
మీరు తరచూ హైవేలపై ప్రయాణించే వారైతే టోల్ ప్లాజాల వద్ద సమయం వృథా కాకుండా ఉండేందుకు ఫాస్ట్‌ట్యాగ్ యాప్ ఎంతో ఉపయోగపడుతుంది. ఈ యాప్ ద్వారా మీ ఫాస్ట్‌ట్యాగ్ వాలెట్ బ్యాలెన్స్ ఎంతుందో తెలుసుకోవచ్చు, నిమిషాల్లో రీఛార్జ్ చేసుకోవచ్చు. టోల్ గేట్ల వద్ద జరిగిన లావాదేవీల పూర్తి హిస్టరీని సులభంగా తనిఖీ చేయవచ్చు.