YouTube : యూట్యూబ్ యూజర్లకు పండగే.. ఇక పిక్చర్-ఇన్-పిక్చర్ అందరికీ ఫ్రీ

YouTube : యూట్యూబ్ చూస్తూనే వాట్సాప్‌లో చాటింగ్ చేయాలన్నా లేదా వేరే యాప్స్ వాడుకోవాలన్నా ఇప్పటివరకు యూట్యూబ్ ప్రీమియం సబ్‌స్క్రిప్షన్ ఉండాల్సిందే. కానీ ఇకపై ఆ అవసరం లేదు.. యూట్యూబ్ తన అత్యంత ప్రజాదరణ పొందిన పిక్చర్-ఇన్-పిక్చర్ (PiP) ఫీచర్‌ను ప్రపంచవ్యాప్తంగా ఉన్న యూజర్లందరికీ అందుబాటులోకి తెస్తున్నట్లు అధికారికంగా ప్రకటించింది. గతంలో ఈ సౌకర్యం అమెరికాలోని ఉచిత యూజర్లకు, ఇతర దేశాల్లో కేవలం ప్రీమియం సభ్యులకు మాత్రమే ఉండేది. ఇప్పుడు రాబోయే కొద్ది నెలల్లో భారత్ సహా అన్ని దేశాల్లోని సాధారణ యూజర్లకు కూడా ఇది అందుబాటులోకి రానుంది.

పిక్చర్-ఇన్-పిక్చర్ (PiP) అంటే ఏమిటి?
మీరు యూట్యూబ్‌లో ఏదైనా వీడియో చూస్తున్నప్పుడు.. యాప్‌ను మినిమైజ్ చేసినా లేదా హోమ్ బటన్ నొక్కినా, ఆ వీడియో ఆగిపోకుండా స్క్రీన్ మీద ఒక చిన్న విండోలో ప్లే అవుతూనే ఉంటుంది. దీనినే PiP మోడ్ అంటారు. దీనివల్ల మీరు ఒక పక్క వీడియో చూస్తూనే మరోపక్క ఇమెయిల్స్ చెక్ చేసుకోవడం, మెసేజ్‌లు పంపడం వంటి పనులు చేసుకోవచ్చు. ఈ చిన్న విండోను మీరు స్క్రీన్ మీద ఎక్కడికైనా జరుపుకోవచ్చు.

ఎవరికి ఏది వర్తిస్తుంది?
యూట్యూబ్ నిబంధనల ప్రకారం.. ఈ గ్లోబల్ రోలవుట్‌లో కొన్ని పరిమితులు ఉన్నాయి. సాధారణ యూజర్లు మ్యూజిక్ వీడియోలు మినహా, మిగిలిన అన్ని రకాల లాంగ్-ఫార్మ్ వీడియోలను ఈ PiP మోడ్‌లో చూసుకోవచ్చు. ఒకవేళ మీరు మ్యూజిక్ వీడియోలను కూడా బ్యాక్‌గ్రౌండ్‌లో ప్లే చేయాలనుకుంటే మాత్రం కచ్చితంగా ప్రీమియం సబ్‌స్క్రిప్షన్ ఉండాల్సిందే. ప్రీమియం లైట్ మెంబర్లు కూడా నాన్-మ్యూజిక్ కంటెంట్‌ను PiPలో ఆస్వాదించవచ్చు.

మీ ఫోన్‌లో ఎలా ఆన్ చేసుకోవాలి?
ఈ ఫీచర్ మీ ఆండ్రాయిడ్ లేదా ఐఓఎస్ డివైజ్‌లలో పని చేయాలంటే కొన్ని సెట్టింగ్స్ మార్చుకోవాల్సి ఉంటుంది.
* ఆండ్రాయిడ్ యూజర్లు: ఫోన్ సెట్టింగ్స్ > యాప్స్ > యూట్యూబ్ > అడ్వాన్స్‌డ్ > పిక్చర్-ఇన్-పిక్చర్ లోకి వెళ్లి టాగల్ ఆన్ చేయాలి.
* యూట్యూబ్ యాప్ లో: సెట్టింగ్స్ > జనరల్ > పిక్చర్-ఇన్-పిక్చర్ ఆప్షన్‌ను ఎనేబుల్ చేసుకోవాలి.
ఒకవేళ మీకు ఈ ఫీచర్ వద్దనుకుంటే అక్కడే ఆఫ్ చేసే సదుపాయం కూడా ఉంది. వీడియోను పాజ్ చేసి యాప్ నుంచి బయటకు వస్తే PiP యాక్టివేట్ అవ్వదు.