J700 అనే కోడ్‌నేమ్‌తో అభివృద్ధి చేస్తున్న ఈ మాక్‌బుక్ నిర్మాణ నాణ్యతలో మాత్రం ఎలాంటి రాజీ ఉండదని చెబుతున్నారు.

టెక్ దిగ్గజం Apple తన ల్యాప్‌టాప్ విభాగంలో కొత్త మార్పులకు శ్రీకారం చుడుతున్నట్టు సమాచారం.

ఇప్పటివరకు ప్రీమియం సెగ్మెంట్‌లోనే ఎక్కువగా దృష్టి పెట్టిన సంస్థ, ఈసారి తక్కువ ధరలో అందుబాటులో ఉండే కొత్త మాక్‌బుక్‌ను మార్కెట్‌లోకి తీసుకురావాలని భావిస్తున్నట్లు రిపోర్టులు చెబుతున్నాయి. కుపర్టినో కేంద్రంగా పనిచేస్తున్న ఈ సంస్థ మార్చి నెలలో ఒక ప్రత్యేక ఈవెంట్ నిర్వహించే అవకాశం ఉందని, ఆ వేదికపై ఈ కొత్త మాక్‌బుక్‌ను అధికారికంగా ఆవిష్కరించే అవకాశముందని తెలుస్తోంది.

బ్లూమ్‌బర్గ్ జర్నలిస్ట్ మార్క్ గుర్మన్ తన ‘పవర్ ఆన్' న్యూస్‌లెటర్‌లో ఈ విషయాన్ని ప్రస్తావించారు. మార్చి ఈవెంట్ పూర్తిగా ఈ మాక్‌బుక్‌కే కేటాయిస్తారా, లేక మరికొన్ని హార్డ్‌వేర్ ఉత్పత్తులను కూడా ప్రకటిస్తారా అన్నది మాత్రం ఇంకా స్పష్టతలోకి రాలేదు. అయితే ధర పరంగా చూస్తే, ఈ ల్యాప్‌టాప్‌ను 1000 డాలర్ల లోపు విభాగంలో ఉంచేలా కంపెనీ ప్రణాళికలు రచిస్తున్నట్టు సమాచారం. అంటే సుమారు రూ.90,000 ప్రాంతంలో ఉండే అవకాశముంది. అలా అయితే ఇది ఇప్పటివరకు వచ్చిన మాక్‌బుక్‌లలో అత్యంత చౌకైన మోడల్ అవుతుంది.

ధరను తగ్గించేందుకు సంస్థ తీసుకుంటున్న కీలక నిర్ణయం ప్రాసెసర్ ఎంపికలో కనిపిస్తోంది. ఈ కొత్త మాక్‌బుక్‌లో A18 Pro చిప్‌సెట్ ఉపయోగించే అవకాశముందని రిపోర్టులు సూచిస్తున్నాయి. ఇదే చిప్ ప్రస్తుతం iPhone 16 Pro మోడళ్లలో ఉపయోగిస్తున్నారు. అలాగే స్క్రీన్ పరిమాణం కూడా 13 ఇంచులకు కొంచెం తక్కువగా ఉండవచ్చని సమాచారం. దీంతో ఎయిర్, ప్రో మోడళ్లతో పోలిస్తే కొద్దిగా చిన్న డిస్‌ప్లే ఉండే అవకాశం ఉంది.

రంగుల విషయంలో కూడా ఈసారి యాపిల్ తన సాధారణ శైలిని మార్చేలా కనిపిస్తోంది. సాధారణంగా సిల్వర్, గ్రే వంటి సాఫ్ట్ షేడ్స్‌కు ప్రాధాన్యం ఇచ్చే కంపెనీ, ఈ కొత్త మోడల్ కోసం లైట్ యెల్లో, లైట్ గ్రీన్, బ్లూ, పింక్ వంటి ఆకర్షణీయమైన రంగులను పరీక్షిస్తున్నట్లు తెలుస్తోంది. అయితే అన్ని రంగులు విడుదల సమయంలో అందుబాటులో ఉంటాయా అన్నది ఇంకా అనిశ్చితంగానే ఉంది.

J700 అనే కోడ్‌నేమ్‌తో అభివృద్ధి చేస్తున్న ఈ మాక్‌బుక్ నిర్మాణ నాణ్యతలో మాత్రం ఎలాంటి రాజీ ఉండదని చెబుతున్నారు. అల్యూమినియం చాసిస్‌తో రూపొందించే ఈ డివైస్‌ను తక్కువ వ్యయంతో తయారు చేసే కొత్త తయారీ విధానాన్ని యాపిల్ ఉపయోగిస్తున్నట్టు సమాచారం. గత రిపోర్టుల ప్రకారం, ఇందులో 8GB RAM, దీర్ఘకాలిక బ్యాటరీ లైఫ్ ఉంటాయని చెబుతున్నారు. థండర్‌బోల్ట్ పోర్ట్ లేకపోవచ్చు కానీ USB Type-C పోర్టులు అందుబాటులో ఉంటాయి. అయితే ఎక్స్‌టర్నల్ డిస్‌ప్లే వినియోగంలో కొన్ని పరిమితులు ఉండే అవకాశముంది.