Moto G77 Power : భారత మార్కెట్లోకి మోటో కొత్త పవర్‌హౌస్.. నేటి నుంచే Moto G77 Power సేల్స్ షురూ

Moto G77 Power : ప్రముఖ స్మార్ట్‌ఫోన్ల తయారీ సంస్థ మోటోరోలా భారతీయ మార్కెట్లోకి సరికొత్త బడ్జెట్ పవర్‌హౌస్‌ను తీసుకొచ్చింది. ఇటీవల ఇండియాలో లాంచ్ అయిన Moto G77 Power స్మార్ట్‌ఫోన్ ఈ రోజు నుంచే కస్టమర్లకు కొనుగోలు చేయడానికి అందుబాటులోకి వచ్చేసింది. మార్కెట్లో ప్రస్తుతం మిడ్-రేంజ్, బడ్జెట్ సెగ్మెంట్లో గట్టి పోటీ నడుస్తున్న తరుణంలో, మోటోరోలా తన లేటెస్ట్ ఫోన్‌ను అత్యంత ఆకర్షణీయమైన ఫీచర్లతో లాంచ్ చేసింది. ముఖ్యంగా భారీ బ్యాటరీ లైఫ్ కోరుకునే వారిని టార్గెట్ చేస్తూ ఈ ఫోన్‌ను డిజైన్ చేశారు. నేటి నుంచి ప్రారంభమైన ఈ సేల్ ద్వారా కస్టమర్లు ఆన్‌లైన్, ఆఫ్‌లైన్ ప్లాట్‌ఫారమ్‌లలో ఈ ఫోన్‌ను కొనుగోలు చేయవచ్చు.

లాంచ్ ఆఫర్ కింద రూ.2,000 డిస్కౌంట్ 
భారత్‌లో Moto G77 Power స్మార్ట్‌ఫోన్ ఒకే ఒక వేరియంట్‌లో లభిస్తుంది. 8GB రామ్, 128GB స్టోరేజ్ ఉన్న ఈ మోడల్ అధికారిక లాంచ్ ధర రూ.25,999గా ఉంది. అయితే, మోటోరోలా కంపెనీ కస్టమర్ల కోసం ఒక అదిరిపోయే లిమిటెడ్ పీరియడ్ లాంచ్ ఆఫర్‌ను ప్రకటించింది. ఎంపిక చేసిన కొన్ని బ్యాంకులకు చెందిన క్రెడిట్ కార్డ్స్ ద్వారా ఈ ఫోన్‌ను కొనుగోలు చేస్తే తక్షణమే రూ.2,000 డిస్కౌంట్ లభిస్తుంది. అంటే, ఆఫర్ కింద ఈ ఫోన్‌ను రూ.23,999కే సొంతం చేసుకోవచ్చు. మోటోరోలా అఫీషియల్ వెబ్‌సైట్‌తో పాటు ఫ్లిప్‌కార్ట్, దేశవ్యాప్తంగా ఉన్న ప్రముఖ రిటైల్ స్టోర్లలో ఈ ఫోన్ విక్రయానికి సిద్ధంగా ఉంది. ఈ స్మార్ట్‌ఫోన్ పాంటోన్ నాటికల్ బ్లూ, పాంటోన్ ఫురియా రెడ్, పాంటోన్ ఇంపెనెట్రబుల్ అనే మూడు డిఫరెంట్ కలర్ ఆప్షన్లలో అందుబాటులో ఉంది.

7000mAh భారీ బ్యాటరీ, సోనీ కెమెరా సెటప్ 
ఈ ఫోన్ ప్రధాన హైలైట్ దీనిలో ఉన్న 7,000mAh భారీ బ్యాటరీ. ఇది ఒక్కసారి చార్జ్ చేస్తే రెండు రోజుల పాటు సులువుగా బ్యాకప్ ఇస్తుంది. దీనికి తోడు 30W టర్బోపవర్ ఫాస్ట్ చార్జింగ్ సపోర్ట్, అలాగే ఇతర డివైజ్‌లను చార్జ్ చేసుకోవడానికి వీలుగా 6W వైర్డ్ రివర్స్ చార్జింగ్ సపోర్ట్‌ను కూడా ఇచ్చారు. ఇక కెమెరా విషయానికి వస్తే, ఫోన్ వెనుక భాగంలో క్వాడ్ పిక్సెల్ టెక్నాలజీ కలిగిన 50MP సోనీ లైటియా 600 ప్రైమరీ కెమెరాతో పాటు, 8MP అల్ట్రావైడ్ కెమెరాను అమర్చారు. రీల్స్, సెల్ఫీల కోసం ముందు భాగంలో ఏకంగా 32MP హై-రిజల్యూషన్ సెల్ఫీ కెమెరాను అందించడం విశేషం.

120Hz డిస్‌ప్లే, మీడియాటెక్ ప్రాసెసర్ 
Moto G77 Power ఫోన్ 6.72 ఇంచుల Full HD+ డిస్‌ప్లేను కలిగి ఉంది. ఇది 120Hz రీఫ్రెష్ రేట్, 1,050 నిట్స్ పీక్ బ్రైట్‌నెస్‌తో వస్తుంది. దీనివల్ల ఎండలో కూడా స్క్రీన్ చాలా స్పష్టంగా కనిపిస్తుంది. స్క్రీన్ ప్రొటెక్షన్ కోసం కార్నింగ్ గొరిల్లా గ్లాస్ 7i ని వాడారు. మల్టీమీడియా ప్రియుల కోసం డాల్బీ అట్మోస్ సపోర్ట్ ఉన్న స్టీరియో స్పీకర్లను ఇచ్చారు. ఈ ఫోన్ మీడియాటెక్ డైమెన్సిటీ 6400 చిప్‌సెట్‌తో పనిచేస్తుంది. ఇందులో 8GB రామ్ ఉన్నప్పటికీ, రామ్ బూస్ట్ ఫీచర్ ద్వారా దీనిని వర్చువల్‌గా 24GB వరకు పెంచుకోవచ్చు. అలాగే మెమరీ కార్డ్ ద్వారా స్టోరేజ్‌ను 1TB వరకు ఎక్స్‌పాండ్ చేసుకునే వీలు కల్పించడం వినియోగదారులకు ప్లస్ పాయింట్ అని చెప్పాలి.

Kia Syros EV : టాటా నెక్సాన్ ఈవీకి చెక్ పెట్టేందుకు వస్తున్న కియా సైరోస్ ఈవీ.. లీకైన లుక్స్ చూశారా?

సరికొత్త ఆండ్రాయిడ్ 16 ఆపరేటింగ్ సిస్టమ్ 
మోటోరోలా ఈ ఫోన్‌ను అత్యంత మన్నికైనదిగా రూపొందించింది. ఇది దుమ్ము, నీటి నుంచి రక్షణ కోసం IP64 రేటింగ్‌తో పాటు, మిలిటరీ గ్రేడ్ సేఫ్టీ సర్టిఫైడ్ (MIL-STD-810H) బాడీతో వస్తుంది. అంటే ఫోన్ పొరపాటున కింద పడినా అంత త్వరగా పాడైపోదు. సాఫ్ట్‌వేర్ పరంగా, ఈ ఫోన్ సరికొత్త ఆండ్రాయిడ్ 16  బేస్డ్ యూజర్ ఇంటర్‌ఫేస్‌తో రన్ అవుతుంది. అయితే, కంపెనీ ఈ ఫోన్‌కు కేవలం ఒకే ఒక్క మేజర్ ఓఎస్ అప్‌గ్రేడ్ (ఆండ్రాయిడ్ 17 వరకు), మూడు సంవత్సరాల సెక్యూరిటీ అప్‌డేట్స్ మాత్రమే ఇస్తామని ప్రామిస్ చేసింది. ప్రస్తుత మార్కెట్ ట్రెండ్‌తో పోలిస్తే సాఫ్ట్‌వేర్ అప్‌డేట్స్ కాస్త తక్కువగానే ఉన్నాయని మొబైల్ నిపుణులు అభిప్రాయపడుతున్నారు.