Oppo : మార్కెట్లోకి ఒప్పో కొత్త ఫోన్.. ఫీచర్లు చూస్తే ఐఫోన్, శామ్‌సంగ్‌లు వణికిపోవాల్సిందే

Oppo : భారతీయ స్మార్ట్‌ఫోన్ మార్కెట్లో ప్రీమియం ఫోన్లకు డిమాండ్ పెరుగుతున్న వేళ, ప్రముఖ మొబైల్ బ్రాండ్ ఒప్పో ఒక సెన్సేషనల్ ఫోన్‌ను పరిచయం చేసింది. తన మోస్ట్ అడ్వాన్స్‌డ్ ఫ్లాగ్‌షిప్ సిరీస్‌లో భాగంగా ఒప్పో Find X9 Ultraను దేశీయ మార్కెట్లోకి గురువారం అధికారికంగా విడుదల చేసింది. ఈ లైనప్‌లో ఇప్పటికే అందుబాటులో ఉన్న ఒప్పో Find X9, ఎక్స్9 ప్రో మోడల్స్‌తో పాటు, సరికొత్తగా Find X9s, టాప్ ఎండ్ మోడల్ అయిన ఈ ఆల్ట్రా ఫోన్‌ను జత చేసింది. అత్యంత శక్తివంతమైన ప్రాసెసర్, కెమెరా టెక్నాలజీతో వచ్చిన ఈ ఫోన్ ఆపిల్, శామ్‌సంగ్ వంటి బ్రాండ్ల ప్రీమియం మోడల్స్‌కు గట్టి పోటీ ఇవ్వనుంది.

భారతదేశంలో ఒప్పో Find X9 Ultra కేవలం ఒకే ఒక్క హై-ఎండ్ వేరియంట్‌లో లభిస్తుంది. 12GB RAM, 512GB ఇంటర్నల్ స్టోరేజ్ ఉన్న ఈ మోడల్ ధరను కంపెనీ రూ.1,69,999 గా నిర్ణయించింది. ఈ ఫోన్‌ను కస్టమర్లు క్యాన్యన్ ఆరెంజ్, టండ్రా అంబర్  అనే రెండు క్లాసీ కలర్ ఆప్షన్లలో కొనుగోలు చేయవచ్చు. ప్రస్తుతం ఈ ఫోన్ అమెజాన్, ఫ్లిప్‌కార్ట్‌లతో పాటు ఒప్పో అధికారిక ఆన్‌లైన్ స్టోర్లలో ప్రీ-బుకింగ్‎కు అందుబాటులో ఉంది.

ప్రీ-బుకింగ్ కస్టమర్లకు రూ.11,000 గిఫ్ట్ బాక్స్ ఫ్రీ 
కస్టమర్లను ఆకర్షించేందుకు ఒప్పో అదిరిపోయే లాంచ్ ఆఫర్లను ప్రకటించింది. మే 14 నుంచి మే 27 లోపు ఈ ఫోన్‌ను ప్రీ-బుక్ చేసుకునే వారికి రూ.11,000 విలువైన ప్రీమియం గిఫ్ట్ బాక్స్‌ను పూర్తిగా ఉచితంగా అందించనున్నారు. ఈ బాక్స్‌లో ఒప్పో Enco Air 5 Pro బ్లూటూత్ ఇయర్‌బడ్స్‌తో పాటు ఒరిజినల్ ఒప్పో Find X9 Ultra బ్యాక్ కవర్ కేస్ కూడా వస్తుంది. దీనితో పాటు పాత ఫోన్ ఎక్స్ఛేంజ్ చేసుకునే వారికి రూ.22,000 వరకు అదనపు బోనస్ లభిస్తుంది. ఎస్బీఐ, హెచ్‌డీఎఫ్‌సీ, కోటక్ మహీంద్రా, ఐడీఎఫ్‌సీ ఫస్ట్, యెస్ బ్యాంక్ కార్డులు లేదా యూపీఐ ద్వారా కొనుగోలు చేసే వారికి 10 శాతం ఇన్‌స్టంట్ క్యాష్‌బ్యాక్ లభిస్తుంది. అంతేకాదు, 24 నెలల నో-కాస్ట్ ఈఎంఐ ఆప్షన్ కూడా ఉంది.

అదనపు బెనిఫిట్స్, జియో యూజర్లకు బంపర్ ఆఫర్
కంపెనీ ఈ ఫోన్‌పై 60 శాతం అష్యూర్డ్ బైబ్యాక్ వాల్యూను ఇస్తోంది. అంటే భవిష్యత్తులో ఫోన్ అమ్మితే మంచి ధర వస్తుంది. అలాగే కొన్న 180 రోజుల్లో ఏదైనా హార్డ్‌వేర్ లోపం వస్తే ఉచితంగా రీప్లేస్‌మెంట్ సపోర్ట్ అందిస్తారు. గూగుల్ వన్ ఏఐ ప్రో సబ్‌స్క్రిప్షన్‌తో పాటు 5TB క్లౌడ్ స్టోరేజ్ 3 నెలల పాటు ఫ్రీగా లభిస్తుంది. దీనితో పాటు స్పాటిఫై ప్రీమియం 3 నెలలు ఉచితం. రిలయన్స్ జియో సిమ్ వాడే కస్టమర్లకు ఈ ఫోన్ కొంటే 6 నెలల పాటు 5,000GB క్లౌడ్ స్టోరేజ్, రూ.15,000 విలువైన గూగుల్ జెమిని బెనిఫిట్స్ టెలికాం బండిల్ ఆఫర్ కింద లభిస్తాయి.

మైండ్ బ్లోయింగ్ కెమెరా సెటప్ 
కెమెరా పరంగా ఈ ఫోన్ ఒక అద్భుతమని చెప్పవచ్చు. ప్రసిద్ధ కెమెరా తయారీ సంస్థ హాసెల్‌బ్లాడ్ భాగస్వామ్యంతో క్వాడ్ (నాలుగు) బ్యాక్ కెమెరా సెటప్‌ను డిజైన్ చేశారు. ఇందులో మెయిన్ కెమెరా ఏకంగా 200 మెగాపిక్సెల్ కాగా, దీనికి ఆప్టికల్ ఇమేజ్ స్టెబిలైజేషన్ (OIS) సపోర్ట్ ఉంది. దీనితో పాటు 50 మెగాపిక్సెల్ అల్ట్రా-వైడ్ కెమెరా, మరో 200 మెగాపిక్సెల్ టెలిఫోటో లెన్స్,  50 మెగాపిక్సెల్ అల్ట్రా-టెలిఫోటో కెమెరాలను అమర్చారు. ఈ అల్ట్రా-టెలిఫోటో లెన్స్ ద్వారా 10x ఆప్టికల్ జూమ్, ఏకంగా 120x డిజిటల్ జూమ్ చేసుకోవచ్చు. రంగులను అద్భుతంగా క్యాప్చర్ చేయడానికి ప్రత్యేక లెన్స్ కూడా ఉంది. సెల్ఫీల కోసం ముందు వైపు 50 మెగాపిక్సెల్ కెమెరా ఇచ్చారు. ఈ ఫోన్‌తో 8K వీడియోలను 30fps వద్ద, 4K వీడియోలను 120fps వేగంతో డాల్బీ విజన్ క్వాలిటీలో రికార్డ్ చేయవచ్చు.

పవర్‌ఫుల్ ప్రాసెసర్, సరికొత్త డిస్‌ప్లే టెక్నాలజీ
ఈ స్మార్ట్‌ఫోన్ ఆండ్రాయిడ్ 16 ఆధారిత కలర్ఓఎస్ 16 సాఫ్ట్‌వేర్‌పై రన్ అవుతుంది. ఇందులో 6.82 అంగుళాల క్యూహెచ్‌డీ+ ఫ్లెక్సిబుల్ అమోలెడ్ డిస్‌ప్లేను ఇచ్చారు. ఇది 120Hz రిఫ్రెష్ రేట్, 1,800 నిట్స్ పీక్ బ్రైట్‌నెస్, 10-బిట్ కలర్ డెప్త్‌తో వస్తుంది. స్క్రీన్ ప్రొటెక్షన్ కోసం కార్నింగ్ గొరిల్లా గ్లాస్ విక్టస్ 2ను వాడారు. ఫోన్ లోపల క్వాల్కమ్ సంస్థకు చెందిన లేటెస్ట్ స్నాప్‌డ్రాగన్ 8 ఎలైట్ జెన్ 5 చిప్‌సెట్ ఉంది. దీనికి అడ్రినో 840 జీపీయూ, 16GB వరకు ఎల్‌పీడీడీఆర్5ఎక్స్ రామ్ జత చేశారు.

మెగా బ్యాటరీ, ఫాస్ట్ ఛార్జింగ్ ఫీచర్లు
ఛార్జింగ్ సమస్య లేకుండా ఉండేందుకు ఒప్పో ఇందులో సరికొత్త టెక్నాలజీతో కూడిన 7,050mAh సిలికాన్-కార్బన్ భారీ బ్యాటరీని అమర్చింది. ఇది 100W వైర్డ్ ఫాస్ట్ ఛార్జింగ్‌ను, 50W వైర్‌లెస్ ఛార్జింగ్‌ను సపోర్ట్ చేస్తుంది. కనెక్టివిటీ కోసం వై-ఫై 7, బ్లూటూత్ 6.0, ఎన్‌ఎఫ్‌సీ, యూఎస్‌బీ టైప్-సి వంటి ఫీచర్లు ఉన్నాయి. భద్రత కోసం డిస్‌ప్లే లోపల 3D అల్ట్రాసోనిక్ ఫింగర్‌ప్రింట్ సెన్సార్ ఇచ్చారు. ఈ ఫోన్ బరువు 235 గ్రాములు ఉంటుంది.