Oppo Find X9 Ultra X9s: ఒప్పో నుంచి ఫోటోగ్రఫీ కింగ్.. భారత్‌లో ఫైండ్ X9 అల్ట్రా, X9s లాంచ్ ఖరారు

Oppo Find X9 Ultra, Oppo Find X9s: ప్రముఖ స్మార్ట్‌ఫోన్ బ్రాండ్ ఒప్పో తన అత్యంత శక్తివంతమైన ఫ్లాగ్‌షిప్ సిరీస్‌ను ఇండియాలోకి తీసుకురావడానికి సిద్ధమైంది. చైనా, గ్లోబల్ మార్కెట్లలో ఇప్పటికే సంచలనం సృష్టించిన  ఒప్పో ఫైండ్ X9 అల్ట్రా, ఒప్పో ఫైండ్ X9s మోడళ్లు ఈ నెలలోనే భారత గడ్డపై అడుగుపెట్టబోతున్నాయి. ఈ మేరకు కంపెనీ అధికారికంగా ప్రకటన చేస్తూ, ఈ ఫోన్ల లభ్యతకు సంబంధించిన వివరాలను వెల్లడించింది.

ఎక్కడ కొనుగోలు చేయవచ్చు?

ఒప్పో ఫైండ్ X9 అల్ట్రా, X9s ఫోన్ల కోసం ప్రముఖ ఇ-కామర్స్ సైట్లు అమెజాన్, ఫ్లిప్‌కార్ట్‎లో ఇప్పటికే ప్రత్యేక పేజీలు లైవ్ అయ్యాయి. వీటితో పాటు ఒప్పో ఇండియా అధికారిక వెబ్‌సైట్‌లో కూడా ఈ ఫోన్లు అందుబాటులో ఉంటాయి. ప్రస్తుతం కమింగ్ సూన్ అని చూపిస్తున్నప్పటికీ, మే నెల చివరి నాటికి ఇవి అమ్మకానికి వచ్చే అవకాశం ఉందని సమాచారం.

హ్యాసెల్‌బ్లాడ్ మ్యాజిక్ 

ఈ ఫోన్ల ప్రధాన ఆకర్షణ వీటి కెమెరా సెటప్. ప్రముఖ కెమెరా తయారీ సంస్థ హ్యాసెల్‌బ్లాడ్ సహకారంతో ఈ ఫోన్లను ఒప్పో రూపొందించింది. ముఖ్యంగా అల్ట్రా మోడల్‌లో 200 మెగాపిక్సెల్ ప్రైమరీ కెమెరాను అమర్చారు. ఇది మొబైల్ ఫోటోగ్రఫీని మరో స్థాయికి తీసుకెళ్తుందని టెక్ నిపుణులు చెబుతున్నారు. ఇక X9s మోడల్‌లో 50 మెగాపిక్సెల్ మెయిన్ కెమెరా ఉంది. ఈ రెండు ఫోన్లు కూడా అద్భుతమైన నైట్ ఫోటోగ్రఫీ, పోర్ట్రెయిట్ షాట్స్ అందిస్తాయి.

ప్రపంచంలోనే అత్యంత వేగవంతమైన చిప్‌సెట్లు

పనితీరు విషయంలో ఒప్పో ఎక్కడా రాజీ పడలేదు. ఒప్పో ఫైండ్ X9 అల్ట్రా ఫోన్‌లో క్వాల్కమ్ లేటెస్ట్ స్నాప్‌డ్రాగన్ 8 ఎలైట్ జెన్ 5 చిప్‌సెట్‌ను వాడారు. గేమింగ్, మల్టీ టాస్కింగ్‌కు ఇది స్మూత్ ఎక్స్ పీరియన్స్ ఇస్తుంది. మరోవైపు, X9s మోడల్ మీడియాటెక్ డైమెన్సిటీ 9500s ప్రాసెసర్‌తో వస్తుంది. ఇవి రెండు కూడా 5G నెట్‌వర్క్‌కు సపోర్ట్ చేస్తాయి.

ధరలు ఎలా ఉండవచ్చు?

అంతర్జాతీయ మార్కెట్లో ఒప్పో ఫైండ్ X9 అల్ట్రా ధర సుమారు రూ.1,03,000 (12GB+256GB) గా ఉంది. ఇక ఒప్పో ఫైండ్ X9s ధర దాదాపు రూ.85,000 (12GB+512GB) గా ఉంది. ఇండియాలో టాక్స్, ఇతర అంశాల వల్ల ధరలు కొంచెం అటు ఇటుగా ఉండవచ్చు. ప్రీమియం సెగ్మెంట్‌లో శాంసంగ్ గెలాక్సీ S26 అల్ట్రా, ఐఫోన్లకు ఇవి గట్టి పోటీనివ్వడం ఖాయం.

డిజైన్, డిస్‌ప్లే హైలైట్స్

ఈ ఫోన్ల వెనుక భాగంలో ఒక పెద్ద సర్క్యూలర్ కెమెరా మాడ్యూల్ ఉంటుంది, ఇది చూడటానికి చాలా స్టైలిష్‌గా కనిపిస్తుంది. హై-రిజల్యూషన్ అమోలెడ్ డిస్‌ప్లే, మెరుపు వేగంతో ఛార్జ్ అయ్యే బ్యాటరీ, అదిరిపోయే కలర్ ఆప్షన్లతో ఈ ఫోన్లు వినియోగదారులను ఆకట్టుకోనున్నాయి. లాంచ్ తేదీకి సంబంధించి ఒప్పో నుంచి మరిన్ని స్పష్టమైన వివరాలు త్వరలోనే వెలువడే అవకాశం ఉంది. మీరు మంచి కెమెరా ఫోన్ కోసం ఎదురుచూస్తుంటే, ఒప్పో ఫైండ్ X9 సిరీస్ కోసం ఇంకొన్ని రోజులు ఆగడం మంచిది.