Realme P4 Series : రియల్‌మీ కస్టమర్లకు భారీ షాక్.. పీ4 సిరీస్ స్మార్ట్‌ఫోన్ల ధరలను పెంచేసిన కంపెనీ

Realme P4 Series : భారతీయ స్మార్ట్‌ఫోన్ మార్కెట్లో రియల్‌మీ బ్రాండ్‌కు ఉన్న క్రేజ్ గురించి ప్రత్యేకంగా చెప్పక్కర్లేదు. అయితే, ఈ బ్రాండ్ మొబైల్స్ కొనాలనుకునే వారికి ఒక షాకింగ్ అప్‌డేట్ వచ్చింది. భారత్‌లో తన పాపులర్ పీ4 సిరీస్‌కు చెందిన పలు స్మార్ట్‌ఫోన్ల ధరలను కంపెనీ పెంచినట్లు నివేదికలు పేర్కొంటున్నాయి. ఎక్స్ లో ఒక లేటెస్ట్ పోస్ట్ ఆధారంగా చూస్తే, రియల్‌మీ పీ4 5జీ, రియల్‌మీ పీ4ఎక్స్ 5జీ, రియల్‌మీ పీ4 లైట్ 4జీ, రియల్‌మీ పీ4 లైట్ 5జీ వంటి మోడళ్లపై వేరియంట్లను బట్టి రూ.500 నుంచి రూ.3,000 వరకు ధరలను పెంచారు. ఈ కొత్త ధరలు జూన్ 23 నుంచే అమల్లోకి వచ్చినట్లు లీక్ అయిన ఒక అఫీషియల్ పార్ట్‌నర్ నోటీస్ ద్వారా వెల్లడైంది.

ప్రముఖ టెక్ టిప్‌స్టర్ అహ్‌సాన్ ఖర్బాయి షేర్ చేసిన డాక్యుమెంట్ ప్రకారం.. స్మార్ట్‌ఫోన్ తయారీకి అవసరమయ్యే విడిభాగాల ఖర్చులు పెరగడమే ఈ ధరల పెంపునకు ప్రధాన కారణం. కంపెనీ తన బిజినెస్ పార్ట్‌నర్లకు పంపిన నోటీసులో ఈ విషయాన్ని స్పష్టంగా పేర్కొంది. మొబైల్స్‌లో ఉపయోగించే మెమొరీ కార్డ్స్, పవర్‌ఫుల్ చిప్‌సెట్లు, పూర్తి స్మార్ట్‌ఫోన్ ఎకోసిస్టమ్‌కు సంబంధించిన తయారీ వ్యయం గత కొంతకాలంగా విపరీతంగా పెరిగిపోయింది. ఈ పెరిగిన కాంపోనెంట్ ఖర్చుల భారాన్ని తట్టుకోవడానికే ఎంపిక చేసిన కొన్ని మోడళ్ల ధరలను సవరించక తప్పలేదని రియల్‌మీ వివరించింది.

రియల్‌మీ పీ4 5జీ కొత్త ధరల వివరాలు
ఈ ప్రైస్ హైక్‌లో అత్యధికంగా ‘రియల్‌మీ పీ4 5జీ' మోడల్ ధరలు పెరిగాయి. దీని బేస్ వేరియంట్ అయిన 6GB + 128GB మోడల్ ధర ఇదివరకు రూ. 23,999 ఉండగా, ఇప్పుడు దానిని రూ. 25,999 కి పెంచారు. అలాగే, 8GB + 128GB వేరియంట్ ధర రూ. 24,999 నుంచి ఏకంగా రూ. 27,999 కి చేరింది. ఇక టాప్ ఎండ్ వేరియంట్ అయిన 8GB + 256GB మోడల్ ధరను రూ. 26,999 నుంచి రూ. 29,999 కి పెంచారు. అంటే ఈ స్మార్ట్‌ఫోన్‌పై వేరియంట్లను బట్టి గరిష్టంగా రూ. 2,000 నుంచి రూ. 3,000 వరకు అదనపు భారం పడనుంది.

రియల్‌మీ పీ4ఎక్స్ 5జీ ధరల మార్పు
మిడ్-రేంజ్ సెగ్మెంట్‌లో మంచి ఆదరణ పొందిన రియల్‌మీ పీ4ఎక్స్ 5జీ స్మార్ట్‌ఫోన్ కూడా ఇప్పుడు ఖరీదైనదిగా మారింది. ఈ ఫోన్‌కు చెందిన 6GB + 128GB వేరియంట్ పాత ధర రూ. 21,499 కాగా, ఇప్పుడు అది రూ. 22,999 కి పెరిగింది. అదేవిధంగా, దీని లోని 8GB + 128GB మోడల్ కొత్త ధర రూ. 24,999 గా మారింది. ఈ సిరీస్ లోని రెండు వేరియంట్లపై సమానంగా రూ.1,500 వరకు ధరలను పెంచుతూ కంపెనీ నిర్ణయం తీసుకుంది.

Smartphones : స్మార్ట్‌ఫోన్ మార్కెట్లో రివర్స్ ట్రెండ్.. సరికొత్త మిడ్-రేంజ్ 4G ఫోన్ల రీ-ఎంట్రీ

బడ్జెట్ మోడల్స్  పీ4 లైట్ కూడా ప్రియం
సాధారణ మధ్యతరగతి వినియోగదారులను ఆకట్టుకునే బడ్జెట్ సెగ్మెంట్ ఫోన్లు కూడా ఈ ధరల పెంపు నుంచి తప్పించుకోలేకపోయాయి. రియల్‌మీ పీ4 లైట్ 4జీ (4GB + 64GB) వేరియంట్ ధర రూ. 11,999 నుంచి రూ. 12,999 కి పెరిగింది. మరోవైపు, రియల్‌మీ పీ4 లైట్ 5జీ మోడల్స్ కూడా ప్రియమయ్యాయి. దీని 4GB + 64GB వేరియంట్ ధర రూ. 14,999 నుండి రూ. 15,499 కి (రూ. 500 పెంపు), 4GB + 128GB వేరియంట్ ధర రూ. 16,499 నుండి రూ. 17,499 కి (రూ. 1,000 పెంపు) మరియు 6GB + 128GB టాప్ మోడల్ ధర రూ. 18,499 నుండి ఏకంగా రూ. 19,999 కి (రూ.1,500 పెంపు) పెరిగింది.

కంపెనీ అధికారిక ప్రకటన రాలేదు
ధరల పెంపునకు సంబంధించిన లీక్‌లు, డాక్యుమెంట్లు బయటకు వచ్చినప్పటికీ, రియల్‌మీ సంస్థ ఇప్పటివరకు ఈ ప్రైస్ హైక్‌పై ఎలాంటి బహిరంగ లేదా అధికారిక ప్రకటన చేయలేదు. గ్యాడ్జెట్స్ 360 బృందం ఆన్‌లైన్ స్టోర్లను పరిశీలించినప్పుడు ఒక ఆసక్తికరమైన విషయం వెలుగులోకి వచ్చింది. ప్రముఖ ఈ-కామర్స్ సైట్ ఫ్లిప్‌కార్ట్ , రియల్‌మీ అధికారిక వెబ్‌సైట్ (Realme.com) లలో ఇప్పటికీ పాత ధరలే చూపిస్తున్నాయి. కాబట్టి ఆన్‌లైన్‌లో రేట్లు అప్‌డేట్ అవ్వడానికి కంటే ముందే పాత ధరలకే ఈ ఫోన్లను సొంతం చేసుకునే అవకాశం కస్టమర్లకు ఉంది.