Hydrogen Train : ప్రపంచంలోనే మొదటిసారి.. పట్టాలెక్కబోతున్న సరికొత్త హైడ్రోజన్ రైలు

Hydrogen Train : గ్లోబల్ రైల్వే రంగంలో సస్టైనబిలిటీని సరికొత్త టెక్నాలజీతో ముడిపెడుతూ ఒక అద్భుతమైన ఆవిష్కరణ జరిగింది. ప్రముఖ రైల్వే తయారీ సంస్థ స్టాడ్లర్, ఇటలీకి చెందిన ARST సంస్థతో కలిసి ప్రపంచంలోనే మొట్టమొదటి నారో-గేజ్ హైడ్రోజన్ రైలును ప్రదర్శించింది. ఇటలీ ప్రాంతీయ రైల్వే రవాణా వ్యవస్థలో సరికొత్త ప్రమాణాలను నెలకొల్పేందుకు ఈ ప్రాజెక్ట్ రూపుదిద్దుకుంది. పర్యావరణానికి ఎటువంటి హాని చేయని ఈ వినూత్న రైలును 2028 నుంచి ఇటలీలో నారో-గేజ్ లైన్లపై అధికారికంగా నడపనున్నారు.

సార్డీనియా కొండల కోసం ప్రత్యేక డిజైన్
ఇటలీలోని సార్డీనియా ప్రాంతంలో ఉన్న భౌగోళిక పరిస్థితుల ఆధారంగా ఈ రైలును ప్రత్యేకంగా డిజైన్ చేశారు. అక్కడి రైల్వే మార్గాల్లో వంకరటింకర మలుపులు, ఎత్తైన కొండలు ఎక్కువగా ఉండటం వల్ల సాధారణ విద్యుత్ లైన్లు వేయడం లేదా భారీ ఎలక్ట్రిక్ రైళ్లను నడపడం అసాధ్యంగా మారింది. దీనిని అధిగమించడానికి నారో-గేజ్ లైన్ల కోసం హైడ్రోజన్ రైళ్లను తయారు చేయగల ప్రపంచంలోని ఏకైక సంస్థ అయిన స్టాడ్లర్ ఈ ఛాలెంజ్‌ను స్వీకరించింది. ఈ రైళ్లు సార్డీనియాలోని అల్గెరో ఎయిర్‌పోర్ట్ నుండి మాముంటానాస్, ససారి నుండి అల్గెరో, ససారి నుంచి సోర్సో మధ్య నడవనున్నాయి.

కాలుష్యానికి శాశ్వతంగా గుడ్‌బై
పర్యావరణ పరిరక్షణే ధ్యేయంగా ఈ హైడ్రోజన్ రైలు పనిచేస్తుంది. ఈ రైలు నడుస్తున్నప్పుడు సైలెన్సర్ నుండి సాధారణ రైళ్లలాగా నల్లటి పొగ రాదు. దానికి బదులుగా కేవలం స్వచ్ఛమైన నీటి ఆవిరి మాత్రమే పర్యావరణంలోకి విడుదలవుతుంది. ప్రారంభంలో ఇటలీలోని సార్డీనియా రీజియన్‌లో మొత్తం 10 సరికొత్త హైడ్రోజన్ రైళ్లను ప్రవేశపెట్టనున్నారు. ఈ రైళ్ల వల్ల పాత డీజిల్ రైళ్లతో పోలిస్తే ప్రతి సంవత్సరం ఏకంగా 2,100 టన్నులకు పైగా కార్బన్ డై ఆక్సైడ్ (CO₂) ఉద్గారాలు తగ్గుతాయి. సాధారణ కారుతో ప్రపంచాన్ని దాదాపు 450 సార్లు చుట్టి వస్తే ఎంత కాలుష్యం పుడుతుందో, అంత కాలుష్యాన్ని ఈ రైళ్లు నివారిస్తాయి.

vivo y05e : భారత మార్కెట్లోకి వివో సరికొత్త బడ్జెట్ ఫోన్.. వివో Y05e లాంచ్‌కు ముహూర్తం ఫిక్స్

100 శాతం సోలార్ ఎనర్జీతో ఇంధనం
ఈ రైలు ప్రొపల్షన్ సిస్టమ్ పూర్తిగా ఫ్యూయల్ సెల్స్, హైడ్రోజన్ ట్యాంకులపై ఆధారపడి పనిచేస్తుంది. ఈ మొత్తం సిస్టమ్‌ను రైలు మధ్యలో ఉండే ఒక ప్రత్యేక డిబ్బీలో అమర్చారు. ఇది ఒక బ్యాటరీ ఛార్జర్‌లా పనిచేస్తూ, హైడ్రోజన్‌ను విద్యుత్ శక్తిగా మారుస్తుంది. ఆ విద్యుత్ ద్వారా రైలులోని ట్రాక్షన్ బ్యాటరీలు నిరంతరం రీఛార్జ్ అవుతూ ఇంజన్‌కు పవర్‌ను అందిస్తాయి. దీనివల్ల కరెంట్ వైర్లు లేని లైన్లపై కూడా రైలు రాకెట్లా దూసుకుపోతుంది. అత్యంత విశేషం ఏంటంటే, ఈ రైలు కోసం వాడే హైడ్రోజన్ ఇంధనాన్ని 100 శాతం సోలార్ ఎనర్జీ  ద్వారా తయారు చేస్తారు. అంటే ఇంధనం తయారీ నుంచి రైలు నడిచే వరకు ఎక్కడా చిన్న కాలుష్యం కూడా ఉండదు.

సరికొత్త డిజైన్, లగ్జరీ ఫీచర్లు
కొండ ప్రాంతాల ట్రాక్‌లపై ఎటువంటి ఇబ్బంది లేకుండా ప్రయాణించడానికి ఈ రైలును చాలా తేలికపాటి మెటీరియల్‌తో తయారు చేశారు. దీనివల్ల ట్రాక్‌లపై ఎక్స్ల్ లోడ్ చాలా తక్కువగా పడుతుంది. ఇక రైలు లోపలి భాగం అత్యంత విలాసవంతంగా ఉంటుంది. ప్రయాణికులు బయటి అందాలను ఆస్వాదించడానికి పెద్ద పనోరమిక్ కిటికీలను ఏర్పాటు చేశారు. ప్రయాణం అంతా ఫుల్ ఏసీ కండిషన్‌తో చాలా సౌకర్యవంతంగా సాగుతుంది. లో-ఫ్లోర్ డిజైన్ వల్ల ప్రయాణికులు సులభంగా రైలు ఎక్కవచ్చు మరియు దిగవచ్చు. పాత డీజిల్ రైళ్లతో పోలిస్తే ఇందులో శబ్దం మరియు ప్రకంపనలు చాలా తక్కువగా ఉండటం వల్ల ప్రయాణం మరింత ఆహ్లాదకరంగా మారుతుంది.