NASA Space Alert : భూమి వైపు దూసుకొస్తున్న భారీ గ్రహశకలం.. నాసా శాస్త్రవేత్తల హై అలర్ట్

NASA Space Alert : మన అంతరిక్షంలో దాదాపు 460 కోట్ల సంవత్సరాల క్రితం ఒక అద్భుతం జరిగింది. సైంటిస్టుల పరిశోధనల ప్రకారం.. ఒక పెద్ద వాయువుల మేఘం (దీనినే నెబ్యులా అంటారు)లో భారీ పేలుడు సంభవించడం వల్ల మన సౌర కుటుంబం జన్మించింది. ఈ మహా విస్ఫోటనం ద్వారానే సూర్యుడు, ఆ తర్వాత అతని చుట్టూ తిరిగే భూమితో సహా ఇతర గ్రహాలు ఏర్పడ్డాయి. అయితే, ఈ గ్రహాలు ఏర్పడే క్రమంలో కొన్ని ఖగోళ పదార్థాల ముక్కలు విశ్వంలో అలానే విడిపోయి మిగిలిపోయాయి. వీటినే మనం  ఆస్టరాయిడ్స్ లేదా గ్రహశకలాలు అని పిలుస్తాము. ఇవి అంతరిక్షంలో నిరంతరం ప్రయాణిస్తూనే ఉంటాయి.

ఆస్టరాయిడ్లలో దాగున్న చరిత్ర
అంతరిక్ష పరిశోధనలు చేసే శాస్త్రవేత్తల ప్రకారం.. ఈ ఆస్టరాయిడ్లు చాలా ప్రత్యేకమైనవి. ఎందుకంటే వీటిలో మన సౌర కుటుంబం ఎలా పుట్టింది? గ్రహాలు ఎలా ఏర్పడ్డాయి? అనే విషయాలకు సంబంధించిన కోట్లాది సంవత్సరాల నాటి చరిత్ర దాగి ఉంటుంది. ఒక రకంగా చెప్పాలంటే ఇవి విశ్వం పురాతన అవశేషాలు. అయితే, ఈ మధ్య కాలంలో కొన్ని పెద్ద పెద్ద గ్రహశకలాలు మన భూమికి చాలా దగ్గరగా వస్తుండటం వల్ల శాస్త్రవేత్తలలో సరికొత్త ఆందోళన మొదలైంది. ఇవి భూమిని ఢీకొడితే భారీ వినాశనం జరిగే ప్రమాదం ఉంది.

భూమి వైపు దూసుకొస్తున్న ఆస్టరాయిడ్ 2018 GE 
తాజాగా అమెరికా అంతరిక్ష పరిశోధనా సంస్థ నాసా భూమికి సంబంధించి ఒక కొత్త ఆస్టరాయిడ్ అలర్ట్‌ను జారీ చేసింది. నాసాకు చెందిన జెట్ ప్రొపల్షన్ ల్యాబొరేటరీ (JPL) తెలిపిన వివరాల ప్రకారం..  ఆస్టరాయిడ్ 2018 GE అని పిలవబడే ఒక భారీ అంతరిక్ష బండరాయి వేగంగా భూమి వైపు దూసుకొస్తోంది. దీని పరిమాణం ఒక పెద్ద ప్రయాణీకుల బస్సు అంత ఉంటుందని శాస్త్రవేత్తలు అంచనా వేస్తున్నారు. దాదాపు 35 అడుగుల పొడవున్న ఈ గ్రహశకలం ఈరోజే భూమికి అత్యంత సమీప స్థానం నుంచి దాటి వెళ్లనుంది.
 

Cuktech CP25 Power Bank : ఇన్‌బిల్ట్ కేబుల్స్, స్మార్ట్ ఎల్‌సీడీ డిస్‌ప్లే.. కుక్‌టెక్ CP25 పవర్ బ్యాంక్ ప్రత్యేకతలివే

భూమికి, ఆస్టరాయిడ్‌కు మధ్య దూరం
ఈ గ్రహశకలం భూమికి అత్యంత దగ్గరగా వచ్చినప్పుడు, మన గ్రహానికి దానికి మధ్య దూరం సుమారు 62,70,000 కిలోమీటర్లు ఉంటుంది. అంతరిక్ష పరిభాషలో ఇది చాలా తక్కువ దూరంగా పరిగణించబడుతుంది. గతంలో ఇది ఏప్రిల్ 2018లో కూడా భూమికి చాలా దగ్గరగా వచ్చి వెళ్ళింది. అత్యంత వేగంగా ప్రయాణించే గ్రహశకలాల జాబితాలో ఇది కూడా ఒకటి. ప్రస్తుతం ఇది సెకనుకు 3.1 కిలోమీటర్ల వేగంతో ప్రయాణిస్తోంది. అయితే, నాసా శాస్త్రవేత్తలు ఊరట కలిగించే విషయం ఒకటి చెప్పారు. ప్రస్తుతానికి ఇది భూమిని ఢీకొట్టే ప్రమాదం లేదని, సురక్షితమైన దూరం నుంచే వెళ్ళిపోతుందని స్పష్టం చేశారు.

పొంచి ఉన్న 16 వేల గండాలు.. నాసా నిఘా
మన భూమి చుట్టూ అంతరిక్షంలో ఇలాంటి ప్రమాదకరమైన గ్రహశకలాలు సుమారు 16,000 వరకు ఉన్నాయని నాసా గుర్తించింది. వీటిని నియర్ ఎర్త్ ఆబ్జెక్ట్స్ అని పిలుస్తారు. ఇవన్నీ ఎప్పుడైనా భూమికి ముప్పుగా మారే అవకాశం ఉంది. ఇప్పటివరకు శాస్త్రవేత్తలు నిశితంగా పరిశోధించి వేరు చేసిన ఈ 16 వేల గ్రహశకలాలలో.. దాదాపు 1,784 ఆస్టరాయిడ్లను అత్యంత ప్రమాదకరమైనవిగా నాసా ప్రకటించింది. ఎందుకంటే అంతరిక్షంలో ఇతర గ్రహాల గురుత్వాకర్షణ శక్తి వల్ల ఇవి ఏ క్షణంలోనైనా తమ ప్రయాణ దిశను మార్చుకుని భూమి వైపు వచ్చే ప్రమాదం ఉంది. అందుకే నాసా వీటిపై నిరంతరం నిఘా ఉంచుతోంది.