MG Motors : భారత ఆటోమొబైల్ మార్కెట్లో ఎంజీ మోటార్ కొత్త రికార్డు.. జూన్ నెలలో ఊహించని రేంజ్‌లో సేల్స్

MG Motors : భారతదేశ ఆటోమొబైల్ రంగంలోకి కొద్ది సంవత్సరాల క్రితమే అడుగుపెట్టిన ప్రముఖ కార్ల తయారీ సంస్థ ఎంజీ మోటార్ విక్రయాల్లో సరికొత్త రికార్డులను సృష్టిస్తోంది. జూన్ నెలలో కంపెనీ తన చరిత్రలోనే అత్యధిక హోల్‌సేల్ అమ్మకాలను నమోదు చేసింది. ఈ ఒక్క నెలలోనే ఎంజీ మోటార్ భారత మార్కెట్లో ఏకంగా 7,500 కంటే ఎక్కువ వాహనాలను విక్రయించింది. గత ఏడాది ఇదే జూన్ నెల అమ్మకాలతో పోలిస్తే ఇది సుమారు 30 శాతం వార్షిక వృద్ధిని సూచిస్తోంది. ఇంధన ధరలు ఆకాశాన్ని తాకుతున్న తరుణంలో, ఎంజీ మోటార్ తీసుకొచ్చిన సరికొత్త వ్యూహాలు కస్టమర్లను విపరీతంగా ఆకట్టుకుంటున్నాయి.

ఎలక్ట్రిక్ వాహనాల విభాగంలో సరికొత్త సంచలనం 
ఒక మీడియా నివేదిక ప్రకారం, జూన్ నెలలో నమోదైన ఎంజీ మోటార్ మొత్తం అమ్మకాల్లో ఎలక్ట్రిక్ వాహనాల వాటా ఏకంగా 75 శాతానికి పైగా పెరగడం విశేషం. సాంప్రదాయ పెట్రోల్, డీజిల్ ఇంధన ధరలు భారీగా పెరగడం, అదే సమయంలో ఎలక్ట్రిక్ వాహనాలను నడపడానికి అయ్యే ఖర్చు చాలా తక్కువగా ఉండటమే ఈ మార్పుకు ప్రధాన కారణమని కంపెనీ తెలిపింది. ఈ విషయమై ఎంజీ మోటార్ చీఫ్ కమర్షియల్ ఆఫీసర్ వినయ్ రైనా మాట్లాడుతూ.. జూన్ నెల అమ్మకాల గణాంకాలు తమ కంపెనీ ప్రొడక్ట్ పోర్ట్‌ఫోలియోకు మార్కెట్లో ఉన్న బలమైన డిమాండ్‌ను స్పష్టం చేస్తున్నాయని, భవిష్యత్తులో కూడా తమ విక్రయాల్లో ఎలక్ట్రిక్ వాహనాలదే పైచేయిగా ఉండబోతోందని ధీమా వ్యక్తం చేశారు.

మార్కెట్లో విండ్సర్ ఈవీ జోరు 
ఎలక్ట్రిక్ వాహనాల విభాగంలో ఎంజీ మోటార్‌కు చెందిన విండ్సర్ ఈవీ మోడల్ ప్రస్తుతం మార్కెట్లో హాట్ కేకుల్లా అమ్ముడవుతోంది. ఈ ఎలక్ట్రిక్ క్రాస్ఓవర్ కారు లాంచ్ అయినప్పటి నుంచి ఇప్పటివరకు రికార్డు స్థాయిలో 65,000 కంటే ఎక్కువ యూనిట్ల విక్రయాలు జరిగాయి. ఇందులో మరో ఆసక్తికరమైన విషయమేమిటంటే, ఈ విండ్సర్ ఈవీ మొత్తం అమ్మకాల్లో దాదాపు 70 శాతం అమ్మకాలు కేవలం నాన్-మెట్రో (చిన్న నగరాలు, పట్టణాలు) నగరాల నుంచే వస్తున్నాయి. కేవలం 30 శాతం అమ్మకాలు మాత్రమే మెట్రో సిటీస్ నుంచి నమోదవుతున్నాయి. దీనిని బట్టి చూస్తే మెట్రో నగరాలకే పరిమితం అనుకున్న ఈవీ కార్ల క్రేజ్, ఇప్పుడు చిన్న పట్టణాలకు కూడా వేగంగా పాకిందని స్పష్టమవుతోంది. చిన్న నగరాల్లో సైతం ఛార్జింగ్ ఇన్‌ఫ్రాస్ట్రక్చర్ మెరుగుపడటం దీనికి ప్రధాన కారణం.

 అందుబాటు ధరలో లగ్జరీ కారు 
గత ఏడాది ఎంజీ మోటార్ తన విండ్సర్ ఈవీ కారుకు సంబంధించి సరికొత్త వెర్షన్ విండ్సర్ ఈవీ ప్రోని మార్కెట్లోకి తీసుకొచ్చింది. దీని సాధారణ ఎక్స్-షోరూమ్ ధర రూ.18 లక్షల కంటే కొంచెం ఎక్కువగా ఉంటుంది. అయితే, కంపెనీ ప్రవేశపెట్టిన వినూత్నమైన బ్యాటరీ-యాజ్-ఎ-సర్వీస్(BaaS) ఆప్షన్‌ను ఎంచుకోవడం ద్వారా ఈ కారు అసలు ధర భారీగా తగ్గిపోతుంది. ఈ ఆప్షన్ కింద కస్టమర్లు కారు కొనేటప్పుడు బ్యాటరీ ధరను చెల్లించాల్సిన అవసరం లేదు. దానికి బదులుగా కారును నడిపిన దూరానికి గాను కిలోమీటరుకు రూ.4.5 చొప్పున బ్యాటరీ రెంట్ చెల్లిస్తే సరిపోతుంది. ఈ సరికొత్త బడ్జెట్ ఫ్రెండ్లీ విధానం వల్ల మధ్యతరగతి కస్టమర్లు సైతం ఈ కారును కొనేందుకు ఆసక్తి చూపిస్తున్నారు.

సింగిల్ ఛార్జ్‌తో 440 కిమీ రేంజ్ 
ఎంజీ విండ్సర్ ఈవీ ప్రో వెర్షన్ సింగిల్ ఛార్జ్ చేస్తే ఏకంగా 440 కిలోమీటర్ల కంటే ఎక్కువ రేంజ్ ఇస్తుందని కంపెనీ క్లెయిమ్ చేస్తోంది. ఇందులో 136 hp పవర్, 200 Nm టార్క్‌ను ఉత్పత్తి చేసే పవర్‌ఫుల్ ఎలక్ట్రిక్ మోటార్‌ను అమర్చారు. భద్రత, సౌకర్యం పరంగా ఈ కారులో అడ్వాన్స్‌డ్ డ్రైవింగ్ అసిస్టెన్స్ సిస్టమ్ ఫీచర్లు ఉన్నాయి. ఇందులో ట్రాఫిక్ జామ్ అసిస్ట్, అడాప్టివ్ క్రూయిజ్ కంట్రోల్ వంటి అధునాతన టెక్నాలజీలను జోడించారు. సెడాన్ కార్లలో ఉండే విలాసవంతమైన కంఫర్ట్, ఎస్‌యూవీ కార్లలో ఉండే విశాలమైన స్పేస్ రెండూ కలగలిపి ఈ కారును డిజైన్ చేశారు. ప్రస్తుతం భారత ఈవీ మార్కెట్లో టాటా మోటార్స్ మొదటి స్థానంలో ఉన్నప్పటికీ, ఎంజీ మోటార్ తన విండ్సర్ ఈవీతో గట్టి పోటీ ఇస్తోంది.